ಉಗುಳು ಹಚ್ಚದೆ 4 ಗಂಟೆ ಕಾಲ ಅಭ್ಯಾಸ: ಕುಲದೀಪ್‌ ಯಾದವ್‌

Team Udayavani, Jun 9, 2020, 6:50 AM IST

ಲಕ್ನೋ: ಎಡಗೈ ಸ್ಪಿನ್ನರ್‌ ಕುಲದೀಪ್‌ ಯಾದವ್‌ ಲಾಕ್‌ಡೌನ್‌ ಮುಗಿಸಿ ಇಲ್ಲಿನ ಲಾಲ್‌ ಬಂಗ್ಲಾ ವಠಾರದ “ರೋವರ್ ಗ್ರೌಂಡ್‌’ನಲ್ಲಿ ಕಳೆದೊಂದು ವಾರದಿಂದ ಕಠಿನ ಬೌಲಿಂಗ್‌ ಅಭ್ಯಾಸ ಆರಂಭಿಸಿದ್ದಾರೆ. ಈ ವೇಳೆ ಚೆಂಡಿಗೆ ಉಗುಳು ಹಚ್ಚದಿರಲು ಪ್ರಯತ್ನಿಸುತ್ತಿರುವುದಾಗಿ ಹೇಳಿದ್ದಾರೆ.

“ಎರಡು ಹಂತಗಳಲ್ಲಿ ನನ್ನ ಬೌಲಿಂಗ್‌ ಅಭ್ಯಾಸ ಸಾಗುತ್ತಿದೆ. ಬೆಳಗ್ಗೆ 7.30ರಿಂದ 9, ಬಳಿಕ ಸಂಜೆ 4ರಿಂದ 8. ಬೆಳಗ್ಗೆ ವ್ಯಾಯಾಮ ನಡೆಸಿದರೆ, ಸಂಜೆ ಬಳಿಕ ನೆಟ್ಸ್‌ ನಲ್ಲಿ ಬೌಲಿಂಗ್‌ ನಡೆಸುತ್ತೇನೆ. ಬಾಲ್ಯದ ಕೋಚ್‌ ಕಪಿಲ್‌ ಪಾಂಡೆ ಕೂಡ ಇರುತ್ತಾರೆ. ಉಳಿದ ವೇಳೆ ಮನೆಯಲ್ಲೇ ಇರುತ್ತೇನೆ. ಸ್ಪರ್ಧಾತ್ಮಕ ಕ್ರಿಕೆಟಿಗೆ ನಾನೀಗ ಸಿದ್ಧ…’ ಎಂಬುದಾಗಿ ಕುಲದೀಪ್‌ ಹೇಳಿದರು.

ಚೆಂಡಿಗೆ ಉಗುಳು ನಿಷೇಧದ ಕುರಿತು ಪ್ರತಿಕ್ರಿಯಿಸಿದ ಕುಲದೀಪ್‌ ಯಾದವ್‌, “ಬಾಲ್ಯದಿಂದಲೇ ನಾವು ಚೆಂಡಿಗೆ ಉಗುಳು ಹಚ್ಚುವುದನ್ನು ಅಭ್ಯಾಸ ಮಾಡಿಕೊಂಡಿದ್ದೇವೆ. ಚೆಂಡಿಗೆ ಹೊಳಪು ಬರಲು ಇದು ಅಗತ್ಯ. ಆದರೆ ಐಸಿಸಿಯ ನೂತನ ನಿಯಮದಂತೆ ನಾನೀಗ ಉಗುಳು ಹಚ್ಚದೇ ಇರಲು ಪ್ರಯತ್ನಿಸುತ್ತಿದ್ದೇನೆ’ ಎಂದರು.