ಗೋವಾದ ಅಭಯಾರಣ್ಯಗಳಲ್ಲಿ 6 ಹುಲಿಗಳು: ರಕ್ಷಣೆ ಅಗತ್ಯ

Team Udayavani, Apr 18, 2022, 6:39 PM IST

ಪಣಜಿ: ಗೋವಾದ ಮಹದಾಯಿ ಹಾಗೂ ಮೋಲೆಂ ಅಭಯಾರಣ್ಯದಲ್ಲಿ ಹುಲಿಗಳು ಇರುವ ಪುರಾವೆಯಿದೆ. ಮಹದಾಯಿ ಅಭಯಾರಣ್ಯದಲ್ಲಿ 3, ಮೋಲೆಂ ಅಭಯಾರಣ್ಯದಲ್ಲಿ 3 ಹುಲಿಗಳು ಇರುವುದು ಖಚಿತವಾಗಿದೆ. ಈ 6 ಹುಲಿಗಳ ರಕ್ಷಣೆ ಅಗತ್ಯವಿದೆ. ಈ ಹಿನ್ನೆಲೆಯಲ್ಲಿ ನಾನು ಸರ್ಕಾರಕ್ಕೆ ಪತ್ರ ಬರೆಯುತ್ತೇನೆ ಎಂದು ಗೋವಾ ರಾಜ್ಯ ಪರಿಸರ ಹೋರಾಟಗಾರ ರಾಜೇಂದ್ರ ಕೇರಕರ್ ಹೇಳಿದ್ದಾರೆ.

ಪಣಜಿಯಲ್ಲಿ ಸುದ್ಧಿಗಾರರೊಂದಿಗೆ ಮಾತನಾಡಿ, ಕಳೆದ 12 ವರ್ಷದಲ್ಲಿ ನಾವು 5 ಹುಲಿಗಳನ್ನು ಕಳೆದುಕೊಂಡಿದ್ದೇವೆ. 2009 ರಲ್ಲಿ 1, 2020 ರಲ್ಲಿ ದನಕರುಗಳ ರಕ್ಷಣೆಯ ಹೆಸರಲ್ಲಿ 4 ಹುಲಿಗಳ ಹತ್ಯೆ ನಡೆದಿದೆ.  ಇದರಿಂದಾಗಿ ಗೋವಾದಲ್ಲಿ ಹುಲಿಗಳು ಸುರಕ್ಷಿತವಾಗಿಲ್ಲ ಎಂಬುದು ಕಂಡುಬರುತ್ತದೆ. ಇದರಿಂದಾಗಿ ಹುಲಿಗಳ ರಕ್ಷಣೆ ಅಗತ್ಯವಿದೆ. ಇದಕ್ಕಾಗಿ ಯಾವುದಾದರೂ ಯೋಜನೆ ಅಥವಾ ವ್ಯವಸ್ಥೆ ಕಲ್ಪಿಸುವ ಅಗತ್ಯವಿದೆ. ನಾನು ರಾಜ್ಯ ಸರ್ಕಾರಕ್ಕೆ ಈ ಕುರಿತಂತೆ ಪತ್ರ ಬರೆಯುತ್ತೇನೆ. ಮಹದಾಯಿ ಮತ್ತು ಮೋಲೆಂ ಅಭಯಾರಣ್ಯದಲ್ಲಿ ಹುಲಿಗಳಿರುವುದು ಖಚಿತವಾಗಿದೆ ಎಂದು ಪರಿಸರ ಹೋರಾಟಗಾರ ರಾಜೇಂದ್ರ ಕೇರಕರ್ ಹೇಳಿದರು.

ರಾಜ್ಯದಲ್ಲಿ ಎಷ್ಟು ಹುಲಿಗಳಿವೆ? ಎಂಬ ಕುರಿತಂತೆ ಈ ಹಿಂದೆ ಸರ್ವೆ ನಡೆದಿದೆ. ಇದೀಗ ಮತ್ತೆ ಸರ್ವೆ ನಡೆಯಲಿದೆ. ಈ ಸರ್ವೆಯ ನಂತರ ಗೋವಾದಲ್ಲಿ ಎಷ್ಟು ಹುಲಿಗಳಿವೆ ಎಂಬುದು ಮತ್ತೆ ಖಚಿತವಾಗಲಿದೆ. ಪುರಾವೆಯ ಅನುಸಾರ ರಾಜ್ಯದ ಅಭಯಾರಣ್ಯದಲ್ಲಿ ಸದ್ಯ 6 ಹುಲಿಗಳಿವೆ. ಇದನ್ನು ಹೊರತುಪಡಿಸಿ ಸತ್ತರಿ, ಸಾಂಗೆ ಧಾರಾಬಾಂದೊಡಾ ಅರಣ್ಯದಲ್ಲಿ ಹುಲಿಗಳಿರುವ ಸಾಧ್ಯತೆಯಿದೆ. ಇದರಿಂದಾಗಿ ರಾಜ್ಯದಲ್ಲಿ ಹುಲಿಗಳ ಸಂಖ್ಯೆ ಹೆಚ್ಚಿರುವ ಸಾಧ್ಯತೆಯಿದೆ ಎಂದು ರಾಜೇಂದ್ರ ಕೇರಕರ್ ಹೇಳಿದರು.