Nude: “ಬೆತ್ತಲೆ” ತೋರಿಸುವ ಕನ್ನಡಿಯಾಸೆಗೆ 9 ಲಕ್ಷ ರೂ. ನಷ್ಟ!

Team Udayavani, Aug 18, 2023, 7:10 AM IST

ನವದೆಹಲಿ: ನಿಮಗೆ ಎದುರಿರುವ ವ್ಯಕ್ತಿಗಳನ್ನು ಬೆತ್ತಲೆಯಾಗಿ ತೋರಿಸುವ, ಭವಿಷ್ಯವನ್ನು ಹೇಳುವ ಕನ್ನಡಿ ಬೇಕೇ? ಎಂಬ ಮಾತುಗಳಿಗೆ ಮರುಳಾದ ಉತ್ತರಪ್ರದೇಶದ ಅವಿನಾಶ್‌ ಕುಮಾರ್‌ ಶುಕ್ಲಾ ಬರೋಬ್ಬರಿ 9 ಲಕ್ಷ ರೂ. ಕಳೆದುಕೊಂಡಿದ್ದಾರೆ!

ಆಸೆಗೆ ಬಿದ್ದ 74 ವರ್ಷದ ವೃದ್ಧ ಅವಿನಾಶ್‌ ತಾವು ಮೋಸ ಹೋಗಿದ್ದು ಗೊತ್ತಾಗುತ್ತಿದ್ದಂತೆ ಪೊಲೀಸರಿಗೆ ದೂರು ನೀಡಿದ್ದಾರೆ. ಈ ವಂಚನೆಯ ಜಾಲವನ್ನು ಹೆಣೆದ ಪಶ್ಚಿಮ ಬಂಗಾಳದ ಪಾರ್ಥ ಸಿಂಘ್ರಾಯ್‌, ಮೊಲಯ ಸರ್ಕಾರ್‌, ಸುದೀಪ್ತ ಸಿನ್ಹಾ ರಾಯ್‌ರನ್ನು ಒಡಿಶಾದ ನಯಾಪಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಅವರಿಂದ ಕಾರು, 28,000 ರೂ. ನಗದು, ಕೆಲ ನಕಲಿ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಆಗಿದ್ದೇನು?:
ಸಿಂಗಾಪುರದ ಖ್ಯಾತ ಕಂಪನಿಯೊಂದರ ಉದ್ಯೋಗಿಗಳಂತೆ ಪ.ಬಂಗಾಳದ ಮೂವರು ವ್ಯಕ್ತಿಗಳು ನಟಿಸಿದ್ದಾರೆ. ಇದೇ ವೇಳೆ ಅವಿನಾಶ್‌ಗೂ ಇವರ ಪರಿಚಯವಾಗಿದೆ. ಈ ಮೂವರು ತಾವು ಪ್ರಾಚ್ಯ ವಸ್ತುಗಳನ್ನು ಹೊಂದಿದ್ದೇವೆ. ಅದರಲ್ಲೊಂದು ಈ ಅದ್ಭುತ ಕನ್ನಡಿ, ಅದಕ್ಕೆ ವಿಶೇಷ ಶಕ್ತಿಯಿದೆ. ಆ ಕನ್ನಡಿ ಮೂಲಕ ನೋಡಿದರೆ ಎದುರಿರುವ ವ್ಯಕ್ತಿ ನಿಮಗೆ ಬೆತ್ತಲೆಯಾಗಿ ಕಾಣುತ್ತಾನೆ. ನಾಸಾ ಕೂಡ ಅದನ್ನು ಬಳಸುತ್ತದೆ, ನೀವದನ್ನು ಕೊಳ್ಳಬೇಕಾದರೆ 2 ಕೋಟಿ ರೂ. ಕೊಡಿ ಎಂದು ನಂಬಿಸಿದ್ದಾರೆ. ಅಂತೂ ಭುವನೇಶ್ವರದ ಹೋಟೆಲ್‌ಗೆ ಅವಿನಾಶ್‌ರನ್ನು ಕರೆಸಿಕೊಳ್ಳಲು ಯಶಸ್ವಿಯಾಗಿದ್ದಾರೆ. ಅಲ್ಲಿ ಇವೆಲ್ಲ ಬರೀ ನಾಟಕ ಎಂದು ಗೊತ್ತಾಗಿದೆ. ಅಷ್ಟರಲ್ಲಾಗಲೇ ಈ ವ್ಯಕ್ತಿ 9 ಲಕ್ಷ ರೂ. ಕಳೆದುಕೊಂಡಾಗಿತ್ತು!