Kerala: ಶಾಲೆಗೆ ನುಗ್ಗಿ ಗುಂಡು ಹಾರಿಸಿದ ಮಾಜಿ ವಿದ್ಯಾರ್ಥಿ

Team Udayavani, Nov 21, 2023, 11:07 PM IST

ತ್ರಿಶೂರ್‌: ಅಮೆರಿಕದಂತಹ ಪಾಶ್ಚಾತ್ಯ ದೇಶಗಳಲ್ಲಿ ಬಂದೂಕುಧಾರಿಗಳು ಶಾಲೆಗಳಿಗೆ ನುಗ್ಗಿ ಗುಂಡಿನ ಮಳೆಗರೆಯುವಂಥ ಸುದ್ದಿ ಓದಿರುತ್ತೇವೆ. ಈಗ ಭಾರತದಲ್ಲೂ ಇಂಥದ್ದೊಂದು ಘಟನೆ ನಡೆದಿದೆ. ಕೇರಳದ ತ್ರಿಶೂರ್‌ನಲ್ಲಿ ಖಾಸಗಿ ಶಾಲೆಯೊಂದರ ಮಾಜಿ ವಿದ್ಯಾರ್ಥಿಯೊಬ್ಬ ಮಂಗಳವಾರ ಗನ್‌ ಹಿಡಿದುಕೊಂಡು ಶಾಲೆಗೆ ನುಗ್ಗಿದ್ದಲ್ಲದೆ, ಏಕಾಏಕಿ ಗುಂಡಿನ ದಾಳಿ ನಡೆಸಿದ್ದಾನೆ. ಅದೃಷ್ಟವಶಾತ್‌ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ.

ಆರೋಪಿ ಜಗನ್‌ನನ್ನು ಪೊಲೀಸರು ವಶಕ್ಕೆ ಪಡೆದು, ವಿಚಾರಣೆ ನಡೆಸಿದ್ದಾರೆ. ಶಾಲೆಯ ಬೋಧಕ ಸಿಬ್ಬಂದಿಯಿದ್ದ ಕೊಠಡಿಗೆ ನುಗ್ಗಿದ ಈತ ತನ್ನ ಬ್ಯಾಗ್‌ನಿಂದ ಗನ್‌ ತೆಗೆದು ಹಲವು ಸುತ್ತು ಗುಂಡು ಹಾರಿಸಿದ್ದಲ್ಲದೇ, ಬೇರೆ ಬೇರೆ ತರಗತಿಗಳಿಗೂ ನುಗ್ಗಿ ಸಿಬ್ಬಂದಿ ಹಾಗೂ ಮಕ್ಕಳನ್ನು ಬೆದರಿಸಿದ್ದಾನೆ. ಘಟನಾ ಸ್ಥಳಕ್ಕೆ ಭೇಟಿ ನೀಡಿರುವ ಜಿಲ್ಲಾಧಿಕಾರಿ ವಿ.ಆರ್‌. ಕೃಷ್ಣ ತೇಜಾ, ಘಟನೆ ಬಗ್ಗೆ ಮಾಹಿತಿ ಪಡೆದಿದ್ದಾರೆ. ಪರಿಸ್ಥಿತಿ ನಿಯಂತ್ರಣಕ್ಕೆ ಬಂದಿದೆ, ಹೆತ್ತವರು ಯಾರೂ ಆತಂಕ ಪಡಬೇಕಾಗಿಲ್ಲ ಎಂದಿದ್ದಾರೆ.