ಕೇರಳ ದೇಗುಲಕ್ಕೆ ಇ-ಆನೆ; ಇರಿಂಜಾಲಪ್ಪಿಲಿ ಶ್ರೀಕೃಷ್ಣ ದೇಗುಲದಲ್ಲಿ ಹೊಸ ಪ್ರಯೋಗ

Team Udayavani, Feb 21, 2023, 7:25 AM IST

ತಿರುವನಂತಪುರ : ದೇವಸ್ಥಾನಗಳ ಸಮಾರಂಭಗಳಲ್ಲಿ ಆನೆಗಳ ಉಪಸ್ಥಿತಿ ಸರ್ವೇಸಾಮಾನ್ಯ. ಅದೇ ರೀತಿ ಅವುಗಳ ಖರೀದಿ, ನಿರ್ವಹಣೆಗೆ ಆಗುವ ವೆಚ್ಚವೂ ಅಪಾರ. ಅದನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ಕೇರಳದ ದೇಗುಲವೊಂದು ಹೊಸ ಕಾರ್ಯಕ್ಕೆ ಕೈ ಹಾಕಿದ್ದು, ಇ-ಆನೆಯನ್ನು ಖರೀದಿಸಿದೆ.

ತ್ರಿಶ್ಶೂರ್‌ ಜಿಲ್ಲೆಯ ಇರಿಂಜಾಲಕ್ಕುಡ ಸಮೀಪವಿರುವ ಇರಿಂಜಾಡಪ್ಪಿಲ್ಲಿ ಶ್ರೀ ಕೃಷ್ಣ ದೇವಸ್ಥಾನ, ಇಲೆಕ್ಟ್ರಾನಿಕ್‌ ಆನೆಯನ್ನು ಖರೀದಿಸಿದೆ. 11 ಅಡಿ ಎತ್ತರವಿರುವ ಈ ಆನೆಯನ್ನು ಉಕ್ಕಿನಿಂದ ತಯಾರಿಸಲಾಗಿದ್ದು, ಮೇಲೆ ರಬ್ಬರ್‌ ಚರ್ಮದ ಹೊದಿಕೆಯನ್ನು ಹೊಂದಿದೆ. ಅಲ್ಲದೇ, ಥೇಟ್‌ ನಿಜವಾದ ಆನೆಯಂತೆ ಇ-ಆನೆ ತಲೆ ಆಡಿಸಲು ಮೋಟಾರ್‌ಗಳನ್ನು ಅಳವಡಿಸಲಾಗಿದೆ. 4 ಮಂದಿಯನ್ನು ಹೊತ್ತು ಆನೆ ಸಾಗಬಲ್ಲದ್ದಾಗಿದ್ದು, ಕಾಲಿಗೆ ಚಕ್ರಗಳನ್ನು ಅಳವಡಿಸಲಾಗಿದೆ.

800 ಕೆಜಿ ತೂಕವಿರುವ ಆನೆಯನ್ನು ಭಕ್ತರು ನೀಡಿದ ದೇಣಿಗೆ ಹಾಗೂ ಪ್ರಾಣಿ ಕಲ್ಯಾಣ ಸಂಘಗಳು ನೀಡಿದ ಸಹಾಯಧನದಿಂದ ಅಭಿವೃದ್ಧಿಪಡಿಸಲಾಗಿದ್ದು, 5 ಲಕ್ಷ ರೂ.ವೆಚ್ಚವಾಗಿದೆ. ಫೆ. 26ರಂದು ದೇಗುಲದಲ್ಲಿ ಇ-ಆನೆಯ ಅನಾವರಣವಾಗಲಿದೆ. ಅದಕ್ಕೆ ಆನೆಗೆ ಇರಿಂಜಾಡಪ್ಪಿಲ್ಲಿ ರಾಮನ್‌ ಎಂದು ಹೆಸರನ್ನಿಡಲಾಗಿದೆ ಎಂದು ದೇಗುಲ ಆಡಳಿತ ಮಂಡಳಿ ತಿಳಿಸಿದೆ.