NCP: ಮರಳಿ ಗೂಡಿಗೆ ಅಜಿತ್‌ ಪವಾರ್‌?

Team Udayavani, Aug 22, 2023, 7:51 PM IST

ಮುಂಬೈ: ಶರದ್‌ ಪವಾರ್‌ ಜತೆಗೆ ಮತ್ತೆ ಸೇರಿಕೊಳ್ಳಲಿದ್ದಾರಾ ಅಜಿತ್‌ ಪವಾರ್‌? ಹೌದು ಎಂಬ ವದಂತಿಗಳು ಮಹಾರಾಷ್ಟ್ರದ ರಾಜಕೀಯದಲ್ಲಿ ಚರ್ಚೆಯಾಗುತ್ತಿದೆ. ಅಜಿತ್‌ ಪವಾರ್‌ ತಮ್ಮ ಬೆಂಬಲಿಗ ಶಾಸಕರೊಂದಿಗೆ ಬಿಜೆಪಿ ಮತ್ತು ಏಕನಾಥ ಶಿಂಧೆ ಬಣದ ಸರ್ಕಾರಕ್ಕೆ ಬೆಂಬಲ ನೀಡಿದ ನಂತರ ಎನ್‌ಸಿಪಿ ಒಡೆದ ಮನೆಯಾಗಿದೆ. ಲೋಕಸಭೆ ಚುನಾವಣೆ ಮೊದಲು ಅಥವಾ ನಂತರ ಅವರು ಪುನಃ ಮರಳಲಿದ್ದಾರೆ ಎಂಬ ಸುದ್ದಿ ಹರಡಿದೆ.

ಸೋದರಳಿಯ ಅಜಿತ್‌ ಪವಾರ್‌ ಕುರಿತು ಈಗಲೂ ಶರದ್‌ ಪವಾರ್‌ ಮೃಧು ಧೋರಣೆ ತಾಳಿದ್ದಾರೆ. ಶರದ್‌ ಯಾವುದೇ ಸಭೆ ಮತ್ತು ಸಮಾರಂಭದಲ್ಲಿ ಅಜಿತ್‌ ಪವಾರ್‌ ಮತ್ತು ಅವರ ಬೆಂಬಲಿತ ಶಾಸಕರ ಕುರಿತು ನಕಾರಾತ್ಮಕವಾಗಿ ಮಾತನಾಡುವುದಿಲ್ಲ ಮತ್ತು ಅವರನ್ನು ಟೀಕಿಸುವುದಿಲ್ಲ. ಅದೇ ನಿಯಮ ಪಾಲಿಸುವಂತೆ ಪುತ್ರಿ ಸುಪ್ರಿಯಾ ಸುಳೆ ಅವರಿಗೂ ಶರದ್‌ ಪವಾರ್‌ ಸಲಹೆ ನೀಡಿದ್ದಾರೆ ಎನ್ನಲಾಗಿದೆ. ಶರದ್‌ ಪವಾರ್‌, ಅಜಿತ್‌ ಪವಾರ್‌ ಸೇರಿದಂತೆ ಒಟ್ಟಾರೆಯಾಗಿ ಎನ್‌ಸಿಪಿಯ ನಾಯಕರ ವಿರುದ್ಧ ಇ.ಡಿ., ಸಿಬಿಐ ಸೇರಿದಂತೆ ಕೇಂದ್ರ ತನಿಖಾ ಸಂಸ್ಥೆಗಳ ತನಿಖೆ ಇದೆ. ಹೀಗಾಗಿಯೇ, ಅಜಿತ್‌ ಪವಾರ್‌ ಬಿಜೆಪಿ ಜತೆಗೆ ಕೈಜೋಡಿಸಿದ್ದಾರೆ ಎನ್ನುವುದು ಹಳೆಯ ಸುದ್ದಿ.