Google ವಿರುದ್ಧ ಅಮೆರಿಕ ಮಹಿಳೆ ಕೇಸು- ಕುಸಿದ ಸೇತುವೆಯ ಮಾರ್ಗ ಮ್ಯಾಪ್‌ ತೋರಿಸಿದ ಆರೋಪ

Team Udayavani, Sep 21, 2023, 10:04 PM IST

ವಾಷಿಂಗ್ಟನ್‌: ಗೂಗಲ್‌ ಮ್ಯಾಪ್‌ ಹಿಂಬಾಲಿಸಿ ಕುಸಿದ ಸೇತುವೆ ಮೇಲೆ ಕಾರು ಚಲಾಯಿಸಿ ವ್ಯಕ್ತಿ ಸಾವಿಗೀಡಾಗಿದ್ದ. ಈ ಹಿನ್ನೆಲೆಯಲ್ಲಿ ಅಮೆರಿಕದ ಉತ್ತರ ಕೆರೊಲಿನಾದ ವ್ಯಕ್ತಿಯ ಪತ್ನಿ ಸಂಸ್ಥೆ ವಿರುದ್ಧ ದಾವೆ ಹೂಡಿದ್ದಾರೆ.

ವೇಕ್‌ಕೌಂಟಿ ಸುಪೀರಿಯರ್‌ ಕೋರ್ಟ್‌ನಲ್ಲಿ ಮೊಕದ್ದಮೆ ದಾಖಲಾಗಿದೆ. ಆ ಪ್ರಕಾರ, 2022ರ ಸೆ. 30ರ ರಾತ್ರಿ ಫಿಲಿಪ್‌ ಪ್ಯಾಕ್ಸನ್‌ ಎಂಬ ವ್ಯಕ್ತಿ ಪಾರ್ಟಿ ಮುಗಿಸಿಕೊಂಡು ಮನೆಗೆ ತೆರಳುತ್ತಿದ್ದರು. ಆ ಸ್ಥಳ ಅಪರಿಚಿತವಾದ ಹಿನ್ನೆಲೆಯಲ್ಲಿ ಮರಳಿ ಬರುವಾಗ ಗೂಗಲ್‌ ಮ್ಯಾಪ್‌ ನಿರ್ದೇಶನಗಳನ್ನು ಅನುಸರಿಸಿ ಅದು ತೋರಿಸಿದ ಮಾರ್ಗದಲ್ಲೇ ಕಾರು ಚಲಾಯಿಸಿದ್ದಾರೆ.

ಮ್ಯಾಪ್‌ ಕುಸಿದ ಸೇತುವೆ ಮೇಲೆ ಮಾರ್ಗ ತೋರಿಸಿದ್ದು, ಅದೇ ಮಾರ್ಗದಲ್ಲಿ ತೆರಳಿದಾಗ ಕಾರು ಕಂದಕಕ್ಕೆ ಉರುಳಿ ಫಿಲಿಪ್‌ ಮೃತಪಟ್ಟಿದ್ದರು. ಈ ಹಿನ್ನೆಲೆಯಲ್ಲಿ ಗೂಗಲ್‌ನ ಬೇಜವಾಬ್ದಾರಿಯೇ ಫಿಲಿಪ್‌ ಸಾವಿಗೆ ಕಾರಣವೆಂದು ಆರೋಪಿಸಿ ಆಕೆಯ ಪತ್ನಿ ಗೂಗಲ್‌ ವಿರುದ್ಧ ಮೊಕದ್ದಮೆ ದಾಖಲಿಸಿದ್ದಾರೆ. ರಸ್ತೆ ಕುಸಿದ ಬಗ್ಗೆ ಹಲವು ವರ್ಷದ ಹಿಂದೆಯೇ ಜನರು ಗೂಗಲ್‌ಗೆ ಮಾಹಿತಿ ನೀಡಿದ್ದರೂ, ಸಂಸ್ಥೆ ಅದನ್ನು ಅಪ್‌ಡೇಟ್‌ ಮಾಡುವಲ್ಲಿ ವಿಫ‌ಲವಾಗಿದೆ ಎಂದು ಆರೋಪಿಸಿದ್ದಾರೆ.