Politics: ಆನಂದ ಸಿಂಗ್‌ ನನ್ನನ್ನು ಸಂಪರ್ಕಿಸಿಲ್ಲ:ಶಿವರಾಜ ತಂಗಡಗಿ

Team Udayavani, Aug 16, 2023, 11:40 PM IST

ಕೊಪ್ಪಳ: ಬಾಂಬೆ ಬಾಯ್ಸ ಕಾಂಗ್ರೆಸ್‌ಗೆ ಬರುವ ವಿಚಾರ ನನಗೆ ಗೊತ್ತಿಲ್ಲ. ಆನಂದ ಸಿಂಗ್‌ ನನ್ನನ್ನು ಸಂಪರ್ಕಿಸಿಲ್ಲ ಎಂದು ಹಿಂದುಳಿದ ವರ್ಗಗಳ ಇಲಾಖೆ ಸಚಿವ ಶಿವರಾಜ ತಂಗಡಗಿ ಹೇಳಿದರು.

ಮುನಿರಾಬಾದ್‌ನಲ್ಲಿ ಸುದ್ದಿಗಾರರ ಜತೆ ಮಾತನಾಡಿದ ಅವರು, ಬಾಂಬೆ ಬಾಯ್ಸ ಬರ್ತಾರೋ, ಕೋಲ್ಕತ್ತಾ ಬಾಯ್ಸ ಬರ್ತಾರೋ ನನಗೆ ಗೊತ್ತಿಲ್ಲ. ಅವರನ್ನು ಕರೆದುಕೊಳ್ಳುವುದಿದ್ದರೂ ಅದು ಸಿಎಂ ಹಾಗೂ ಪಕ್ಷದ ಹೈಕಮಾಂಡ್‌ನ‌ ಜವಾಬ್ದಾರಿ. ಕಾಂಗ್ರೆಸ್‌ ಗ್ಯಾರಂಟಿ ಯೋಜನೆಗಳಿಂದ ಬಿಜೆಪಿ ಹಾಗೂ ಜೆಡಿಎಸ್‌ ನಾಯಕರು ನಮ್ಮತ್ತ ಬರುತ್ತಿರಬಹುದು. ಮುಂದೆ ನಮಗೆ ಸತತ ಅಧಿ ಕಾರ ಸಿಗುವ ನಿರೀಕ್ಷೆಯಿಂದಲೂ ಬರುತ್ತಿರಬಹುದು. ಮುಂದಿನ ದಿನದಲ್ಲಿ ಜೆಡಿಎಸ್‌ ಹಾಗೂ ಬಿಜೆಪಿಯಲ್ಲಿ ಯಾರಿಗೂ ಭವಿಷ್ಯವಿಲ್ಲವೆಂದು ನಾನು ಹಿಂದೆಯೇ ಹೇಳಿದ್ದೆ. ಅದು ಈಗ ನಿಜವಾಗುತ್ತಿದೆ ಎಂದರು.

ಮಾಜಿ ಸಿಎಂ ಕುಮಾರಸ್ವಾಮಿ ಅಧಿ ಕಾರ ಇಲ್ಲದೆ ಹತಾಶರಾಗಿದ್ದಾರೆ. ಹಾಗಾಗಿ ಮನಸ್ಸಿಗೆ ಬಂದಂತೆ ಮಾತನಾಡುತ್ತಿದ್ದಾರೆ. ಹೇಗಾದರೂ ಮಾಡಿ ಅಧಿ ಕಾರ ಹಿಡಿಯಬಹುದು ಎಂದು ಎಚ್‌ಡಿಕೆ ಕನಸು ಕಂಡಿದ್ದರು. ರಾಜ್ಯದ ಜನತೆ ಕಾಂಗ್ರೆಸ್‌ಗೆ 136 ಸ್ಥಾನ ಕೊಟ್ಟಿದ್ದಕ್ಕೆ ಹತಾಶರಾಗಿದ್ದಾರೆ. ಅವರು ಏನೇನೋ ನಿರೀಕ್ಷೆ ಇಟ್ಟುಕೊಂಡಿದ್ದರು. ಹೀಗಾಗಿ ಅವರು ಹೊಟ್ಟೆ ಉರಿಯಿಂದ ಮಾತನಾಡುತ್ತಿದ್ದು, ಅದಕ್ಕೆ ಬೆಲೆಯಿಲ್ಲ ಎಂದರು.