Anandapura: ಮೋರಿ ಕುಸಿದು ಭಾರಿ ಗಾತ್ರದ ಗುಂಡಿ; ಗ್ರಾಮಸ್ಥರ ಆಕ್ರೋಶ

Team Udayavani, Oct 29, 2024, 5:31 PM IST

ಆನಂದಪುರ: ರಾಷ್ಟ್ರೀಯ ಹೆದ್ದಾರಿ 69 ರ ಆನಂದಪುರ ಸಾಗರ ರಸ್ತೆಯಲ್ಲಿ ಮೋರಿ ಕುಸಿದು ಭಾರಿ ಗಾತ್ರದ ಗುಂಡಿ ಬಿದ್ದಿದ್ದರು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದವರು ಕಣ್ಣು ಮುಚ್ಚಿ ಕುಳಿತಿದ್ದಾರೆ ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.

ಪ್ರತಿದಿನ ಸಾವಿರಾರು ವಾಹನಗಳು ಸಂಚರಿಸುವ ಆನಂದಪುರ ಸಾಗರ ರಸ್ತೆಯ ಅರಣ್ಯ ಇಲಾಖೆಯ ವಸತಿ ನಿಲಯ ಸಮೀಪ ಕಳೆದ 2-3 ವರ್ಷಗಳಿಂದ ಮೋರಿ ಕುಸಿಯುತ್ತಿದ್ದರೂ ನೆಪ ಮಾತ್ರಕ್ಕೆ ಹೆದ್ದಾರಿಯವರು ತೇಪೆ ಹಚ್ಚುವ ಕಾರ್ಯ ಮಾಡುತ್ತಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಈ ರಸ್ತೆಯಲ್ಲಿ ಅಪಘಾತಗಳು ಹೆಚ್ಚಾಗುತ್ತಿದ್ದು ಕುಸಿದು ಹೋದ ಮೋರಿಯನ್ನು ಸರಿಪಡಿಸುವಲ್ಲಿ  ಹೆದ್ದಾರಿಯವರು ನಿರ್ಲಕ್ಷ್ಯ ತೋರುತ್ತಿದ್ದಾರೆ ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.

ರಾತ್ರಿ ವೇಳೆ ಸಂಚರಿಸುವಂತಹ ವಾಹನಗಳಿಗೆ ಮೋರಿ ಕುಸಿದು ಗುಂಡಿ ಕಾಣದೆ ಅಪಘಾತಗಳು ಸಂಭವಿಸಬಹುದು ಆದ್ದರಿಂದ  ಹೆದ್ದಾರಿ ಪ್ರಾಧಿಕಾರದವರು ತಕ್ಷಣವೇ ಈ ಕುಸಿದ ಮೋರಿಯನ್ನು ಸರಿಪಡಿಸುವಂತೆ ಒತ್ತಾಯಿಸಿದ್ದಾರೆ. ಸ್ಥಳೀಯ ಗ್ರಾಮಸ್ಥರಾದ ರಾಘವೇಂದ್ರ , ನಾಗ ಭಂಡಾರಿ, ಮಂಜುನಾಥ್, ಮಧು, ವೀರೇಶ್ ಹೆದ್ದಾರಿ ಗುಂಡಿಗೆ ಹಸಿರು ಗಿಡವ ನೆಟ್ಟು ವಾಹನ ಚಾಲಕರಿಗೆ ಎದ್ದು ಕಾಣುವಂತೆ ಮಾಡಿದ್ದಾರೆ.