Sikkim: ಸಿಕ್ಕಿಂನಲ್ಲಿ 1 ಸಾವಿರ ಪ್ರವಾಸಿಗರ ರಕ್ಷಿಸಿದ ಸೇನೆ

Team Udayavani, Dec 14, 2023, 8:53 PM IST

ಗ್ಯಾಂಗ್ಟಕ್‌: ಹಿಮಪಾತ ಮತ್ತು ಪ್ರತಿಕೂಲ ಹವಾಮಾನದ ಕಾರಣ ಪೂರ್ವ ಸಿಕ್ಕಿಂನಲ್ಲಿ ಸಿಲುಕಿದ್ದ 1,217 ಪ್ರವಾಸಿಗರನ್ನು ಭಾರತೀಯ ಸೇನೆಯು ರಕ್ಷಿಸಿದ್ದು, ಸುರಕ್ಷಿತ ಸ್ಥಳಕ್ಕೆ ಅವರನ್ನು ಸ್ಥಳಾಂತರಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಭಾರತೀಯ ಸೇನೆಯ ತ್ರಿಶಕ್ತಿ ಕಾರ್ಪ್ಸ್‌ ಘಟಕವು ಡಿ.13 ಮತ್ತು 14ರಂದು ಈ ರಕ್ಷಣಾ ಕಾರ್ಯಾಚರಣೆ ಕೈಗೊಂಡಿತು. ಪೂರ್ವ ಸಿಕ್ಕಿಂನಲ್ಲಿ ಸಿಲುಕ್ಕಿದ್ದ 1,217 ಪ್ರವಾಸಿಗರನ್ನು ರಕ್ಷಿಸಿದ್ದು, ಸೇನೆಯ ತಾತ್ಕಾಲಿಕ ವಸತಿ ಸೌಲಭ್ಯಕ್ಕೆ ಅವರನ್ನು ಸ್ಥಳಾಂತರಿಸಲಾಗಿದೆ. ಅವರಿಗೆ ವಸತಿ, ಚೆಚ್ಚಗಿನ ಬಟ್ಟೆಗಳು, ವೈದ್ಯಕೀಯ ನೆರವು ಹಾಗೂ ಬಿಸಿಯೂಟವನ್ನು ಒದಗಿಸಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.

ರಸ್ತೆಗಳಲ್ಲಿ ಹಿಮದ ರಾಶಿಯ ಹೊರತಾಗಿಯೂ ಎಲ್ಲಾ ಪ್ರವಾಸಿಗರನ್ನು ಸುರಕ್ಷಿತವಾಗಿ ಗ್ಯಾಂಗ್ಟಕ್‌ಗೆ ಸ್ಥಳಾಂತರಿಸಲಾಗಿದೆ. ಪ್ರವಾಸಿರಿಗೆ ವಸತಿ ಕಲ್ಪಿಸಲು ಹಲವು ಸೈನಿಕರು ತಮಗೆ ಮೀಸಲಿಟ್ಟಿದ್ದ ವಸತಿ ಸೌಲಭ್ಯವನ್ನೇ ಬಿಟ್ಟುಕೊಟ್ಟಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.