B.Y. Vijayendra: ಮುಡಾ ದಾಖಲೆ ನೀಡಲು ರಮೇಶ್‌ ಬಾಬು ಯತ್ನ

Team Udayavani, Jul 15, 2024, 7:09 AM IST

ಬೆಂಗಳೂರು: ದೇವೇಗೌಡರ ಕುಟುಂಬಕ್ಕೆ ಮುಡಾದಲ್ಲಿ ಅಕ್ರಮವಾಗಿ 48 ನಿವೇಶನಗಳು ಹಂಚಿಕೆಯಾಗಿದ್ದು ಈ ಸಂಬಂಧ ತನಿಖೆ ಮಾಡುವಂತೆ ಕೋರಿ ಮಾಜಿ ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ 2011ರ ಮಾರ್ಚ್‌ 17ರಂದು ವಿಧಾನ ಸಭೆಯಲ್ಲಿ ಪ್ರಸ್ತಾವಿಸಿದ ದಾಖಲೆಗಳನ್ನು ಅವರ ಪುತ್ರ, ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಅವರಿಗೆ ನೀಡಿ ಸದನದಲ್ಲಿ ಈ ಬಗ್ಗೆ ವಿಚಾರ ಪ್ರಸ್ತಾವಿಸುವಂತೆ ಮನವಿ ಮಾಡಲು ಕೆಪಿಸಿಸಿಯ ಮಾಧ್ಯಮ ಮತ್ತು ಸಂವಹನ ಘಟಕದ ಅಧ್ಯಕ್ಷ ರಮೇಶ್‌ ಬಾಬು ವಿಜಯೇಂದ್ರ ಅವರ ಭೇಟಿಗೆ ಪ್ರಯತ್ನಿಸಿದರು.

ರವಿವಾರ ವಿಜಯೇಂದ್ರ ಅವರ ಶಿವಾನಂದ ವೃತ್ತದ ಬಳಿಯಿರುವ ಮನೆಗೆ ತೆರಳಿ ದಾಖಲೆಗಳನ್ನು ನೀಡಲು ರಮೇಶ್‌ ಮುಂದಾಗಿದ್ದರು. ಆದರೆ ಈ ಬಗ್ಗೆಗಿನ ಮಾಹಿತಿ ಮೊದಲೇ ಪಡೆದಿದ್ದ ಪೊಲೀಸರು ಅವರನ್ನು ಆ ರಸ್ತೆಗೆ ಪ್ರವೇಶಿಸಲು ಅವಕಾಶ ನೀಡಲಿಲ್ಲ.

ಬಳಿಕ ರಮೇಶ್‌ ಬಾಬು ಮಾಧ್ಯಮಗಳ ಜತೆ ಮಾತನಾಡಿ, ವಿಜಯೇಂದ್ರ ಅವರ ನಿವಾಸದಲ್ಲಿ ಇಲ್ಲ ಎಂದು ಪೊಲೀಸರು ಹೇಳುತ್ತಿದ್ದಾರೆ. ಹಾಗೆಯೇ ದಾಖಲೆಗಳನ್ನು ನಮಗೆ ನೀಡಿ ನಾವು ಅವರಿಗೆ ತಲುಪಿಸುತ್ತೇವೆ ಎಂದಿದ್ದಾರೆ. ನಾನು ದಾಖಲೆಗಳನ್ನು ಪೊಲೀಸರಿಗೆ ನೀಡಿದ್ದೇನೆ ಎಂದರು.