ಪಶ್ಚಿಮ ಬಂಗಾಲ : ಬೆಳಗ್ಗೆ ಗಂಟೆ 2ಕ್ಕೆ ವಿಧಾನಸಭೆ ಅಧಿವೇಶನ!

Team Udayavani, Feb 26, 2022, 8:20 AM IST

ಕೋಲ್ಕತಾ: ವಿಧಾನಸಭೆ ಅಧಿವೇಶನ ಕಲಾಪಗಳು ಬೆಳಗ್ಗೆ 11 ಗಂಟೆಗೋ ಅಪರಾಹ್ನ 2ಗಂಟೆಗೂ ಆರಂಭಗೊಳ್ಳುವುದು ಸಾಮಾನ್ಯ ರೂಢಿ.

ಆದರೆ ಪಶ್ಚಿಮ ಬಂಗಾಲ ವಿಧಾನಸಭೆಯ ಅಧಿವೇಶನವನ್ನು ಮಾರ್ಚ್‌ 7ರ ಬೆಳಗ್ಗೆ 2 ಗಂಟೆಗೆ ಕರೆದಿರುವುದಾಗಿ ರಾಜ್ಯಪಾಲ ಜಗದೀಪ್‌ ಧನ್ಕರ್‌ ಅಧಿಸೂಚನೆ ಹೊರಡಿಸಿದ್ದಾರೆ.

ಈ ಅಧಿಸೂಚನೆ ಇದೀಗ ಎಲ್ಲರ ಅಚ್ಚರಿಗೆ ಕಾರಣವಾಗಿದ್ದು ಟೈಪಿಂಗ್‌ನಲ್ಲಾದ ದೋಷದಿಂದಾಗಿ ಅಪರಾಹ್ನದ ಬದಲು ಬೆಳಗ್ಗೆ ಎಂದಾಗಿರಬಹುದು ಎಂದು ವಿಧಾನಸಭೆ ಸ್ಪೀಕರ್‌ ಬಿಮನ್‌ ಬ್ಯಾನರ್ಜಿ ಸ್ಪಷ್ಟನೆ ನೀಡಿದ್ದಾರೆ.
ಇದನ್ನು ಸರಿಪಡಿಸುವ ವಿಚಾರ ಸಂಪುಟಕ್ಕೆ ಬಿಟ್ಟದ್ದು. ಸಂಪುಟ ವಿಧಾನಸಭೆ ಅಧಿವೇಶನದ ಪರಿಷ್ಕೃತ ವೇಳಾಪಟ್ಟಿಯನ್ನು ರಾಜ್ಯಪಾಲರಿಗೆ ಸಲ್ಲಿಸಿ ಹೊಸದಾಗಿ ಅಧಿಸೂಚನೆಯನ್ನು ಹೊರಡಿಸಬಹುದು ಎಂದು ತಿಳಿಸಿದ್ದಾರೆ.

ಮಮತಾ ಬ್ಯಾನರ್ಜಿ ನೇತೃತ್ವದ ಟಿಎಂಸಿ ಸರ್ಕಾರ ಮತ್ತು ರಾಜ್ಯಪಾಲ ಧನ್ಕರ್‌ ನಡುವೆ ಪದೇಪದೆ ಭಿನ್ನಾಭಿಪ್ರಾಯಗಳು ಕಾಣಿಸಿಕೊಳ್ಳುತ್ತಿರುವ ನಡುವೆಯೇ ಈ ಅಧಿಸೂಚನೆ ರಾಜಕೀಯವಾಗಿ ಒಂದಿಷ್ಟು ಕುತೂಹಲಕ್ಕೆ ಎಡೆ ಮಾಡಿಕೊಟ್ಟಿರುವುದಂತೂ ಸುಳ್ಳಲ್ಲ.