ದೇಹದಾರ್ಢ್ಯ : “ಮಿಸ್ಟರ್‌ ಇಂಡಿಯಾ’ ಸ್ಪರ್ಧೆಗೆ ಸೋಮಶೇಖರ್‌ ಖಾರ್ವಿ

Team Udayavani, Mar 17, 2021, 12:47 AM IST

ಕುಂದಾಪುರ: ರಾಯಚೂರಿನಲ್ಲಿ ನಡೆದ ದೇಹದಾರ್ಢ್ಯ ಸ್ಪರ್ಧೆಯ 65 ಕೆ.ಜಿ. ವಿಭಾಗ ದಲ್ಲಿ ಕಂಚಿನ ಪದಕ ಗೆದ್ದ ತ್ರಾಸಿ ಕಂಚುಗೋಡಿನ ಸೋಮಶೇಖರ್‌ ಖಾರ್ವಿ ಅವರು ರಾಷ್ಟ್ರ ಮಟ್ಟದ “ಮಿಸ್ಟರ್‌ ಇಂಡಿಯಾ’ ಸ್ಪರ್ಧೆಗೆ ಆಯ್ಕೆಯಾಗಿದ್ದಾರೆ. ಈ ಸ್ಪರ್ಧೆ ಹೊಸದಿಲ್ಲಿಯಲ್ಲಿ ನಡೆಯಲಿದೆ. ಈ ಸ್ಪರ್ಧೆಯಲ್ಲಿ ಚಾಂಪಿಯನ್‌ ಆಗುವುದು ಇವರ ಬಹು ದೊಡ್ಡ ಕನಸು.

ಮೂಲತಃ ಭಟ್ಕಳದವರಾದ ಸೋಮಶೇಖರ್‌, ಬದುಕು ಕಟ್ಟಿ ಕೊಳ್ಳಲು ತಂದೆಯ ಊರಾದ ತ್ರಾಸಿಯ ಕಂಚುಗೋಡಿಗೆ ಬಂದರು. ವೃತ್ತಿಯಲ್ಲಿ ಮೀನುಗಾರರಾಗಿದ್ದು, ಅತ್ಯಂತ ಬಡ ಕುಟುಂಬವಾಗಿದೆ. ಓದಿದ್ದು 2ನೇ ತರಗತಿಯಾದರೂ ದೇಹದಾರ್ಢ್ಯ ಸ್ಪರ್ಧೆಯಲ್ಲಿ ಉನ್ನತ ಸಾಧನೆಗೈದಿದ್ದಾರೆ. ಈ ಹಿಂದೆಯೂ ಹಲವು ಬಾರಿ ರಾಜ್ಯ ಮಟ್ಟದ ಸ್ಪರ್ಧೆಗಳಲ್ಲಿ ಉತ್ತಮ ಸಾಧನೆ ತೋರಿ, ರಾಷ್ಟ್ರ ಮಟ್ಟದ ದೇಹದಾರ್ಢ್ಯ ಸ್ಪರ್ಧೆಗಳಿಗೆ ಆಯ್ಕೆಯಾಗಿದ್ದರೂ ಆರ್ಥಿಕ ಅಡಚಣೆಯಿಂದ ಮಿಸ್ಟರ್‌ ಇಂಡಿಯಾ ಸ್ಪರ್ಧೆಯಲ್ಲಿ ಭಾಗವಹಿಸಲು ಇವರಿಗೆ ಸಾಧ್ಯವಾಗಿರಲಿಲ್ಲ.