ಬ್ರಹ್ಮರಕೂಟ್ಲು ಟೋಲ್‌ ಫ್ಲಾಜಾ: ಸರ್ವೀಸ್‌ ರಸ್ತೆಯಲ್ಲಿ ಲಾರಿ ಓಡಾಟ; ಆತಂಕ

Team Udayavani, Mar 11, 2021, 5:10 AM IST

ಬಂಟ್ವಾಳ: ಬಿ.ಸಿ.ರೋಡ್‌ ಭಾಗದಿಂದ ತುಂಬೆ ಹಾಗೂ ಇತರ ಪ್ರದೇಶಗಳಿಗೆ ಮರಳು ಸಾಗಾಟಕ್ಕೆ ತೆರಳುವ ಖಾಲಿ ಲಾರಿಗಳು ಬ್ರಹ್ಮರಕೂಟ್ಲು ಟೋಲ್‌ ಫ್ಲಾಜಾದ ಬಳಿ ಟೋಲ್‌ ಬೂತಿನ ಮೂಲಕ ಸಾಗದೆ ಕೆಳಗಿನ ಸರ್ವೀಸ್‌ ರಸ್ತೆಯಲ್ಲಿ ಸಾಗುತ್ತಿದ್ದು, ಸ್ಥಳೀಯರ ಆತಂಕಕ್ಕೆ ಕಾರಣವಾಗಿದೆ.

ಸರ್ವೀಸ್‌ ರಸ್ತೆಯು ಕಿರಿದಾಗಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಬೃಹತ್‌ ಲಾರಿಗಳು ಸರ್ವೀಸ್‌ ರಸ್ತೆಯಲ್ಲಿ ಸಾಗುತ್ತಿರುವುದರಿಂದ ಏನಾದರೂ ಅಪಘಾತಗಳು ನಡೆಯುತ್ತದೆಯೇ ಎಂಬುದು ಸ್ಥಳೀಯರ ಆತಂಕಕ್ಕೆ ಕಾರಣವಾಗಿದೆ. ಟೋಲ್‌ ಪಾವತಿ ತಪ್ಪಿಸು ವುದಕ್ಕೋ ಅಥವಾ ಇನ್ಯಾವ ಉದ್ದೇಶದಿಂದ ಲಾರಿಗಳು ಈ ರೀತಿ ಸರ್ವೀಸ್‌ ರಸ್ತೆಯಲ್ಲಿ ಸಾಗುತ್ತಿವೆ ಎಂದು ಸ್ಥಳೀಯರು ಪ್ರಶ್ನಿಸುತ್ತಿದ್ದಾರೆ.

ಬಿ.ಸಿ.ರೋಡ್‌ ಭಾಗದಿಂದ ಮಂಗಳೂರು ಭಾಗಕ್ಕೆ ತೆರಳುವ ಲಾರಿಗಳು ಸರ್ವೀಸ್‌ ರಸ್ತೆಗೆ ಇಳಿಯಬೇಕಾದರೆ ತಲಪಾಡಿಯಲ್ಲಿ ಹೆದ್ದಾರಿ ಕ್ರಾಸ್‌ ಮಾಡಬೇಕಿದೆ. ಈ ಸಂದರ್ಭದಲ್ಲಿ ಹೆದ್ದಾರಿಯಲ್ಲಿ ಎದುರು ಭಾಗದಿಂದ ವೇಗವಾಗಿ ಬರುವ ವಾಹನಗಳು ಢಿಕ್ಕಿ ಹೊಡೆಯುವ ಅಪಾಯವೂ ಇದೆ.

ಒಂದು ಭಾಗದ ಟೋಲ್‌ ಬೂತ್‌ ಕಳೆದ ತತ್‌ಕ್ಷಣ ಲಾರಿಗಳು ಮತ್ತೆ ಸರ್ವೀಸ್‌ ರಸ್ತೆಯಿಂದ ಹತ್ತಿ ಹೆದ್ದಾರಿಗೆ ಸಾಗಬೇಕಿದೆ. ಈ ಸಂದರ್ಭದಲ್ಲಿ ಇತರ ವಾಹನಗಳಿಗೆ ಸಾಕಷ್ಟು ತೊಂದರೆ ಉಂಟಾಗುತ್ತಿದೆ. ಲಾರಿಗಳಿಗೆ ಈ ರೀತಿ ಸಾಗುವುದಕ್ಕೆ ಯಾಕೆ ಅವಕಾಶ ನೀಡಲಾಗಿದೆ ಎಂಬುದು ಸಾರ್ವಜನಿಕರ ಪ್ರಶ್ನೆಯಾಗಿದೆ. ಇದರ ಜತೆಗೆ ಇತರ ವಾಹನಗಳು ಹೆಚ್ಚಿನ ಸಂಖ್ಯೆಯಲ್ಲಿ ಸರ್ವೀಸ್‌ ರಸ್ತೆಯಲ್ಲಿ ಸಾಗುತ್ತಿವೆ.