ಹೈಡ್ರೋಕ್ಸಿಕ್ಲೋರೊಕ್ವಿನ್‌ಗೆ ವಿರೋಧ

Team Udayavani, May 17, 2020, 2:30 PM IST

ಬ್ರಝಿಲಿಯ: ಮಹಾಮಾರಿ ಕೋವಿಡ್‌ -19 ಚಿಕಿತ್ಸೆಗೆ ಹೈಡ್ರೋಕ್ಸಿಕ್ಲೋರೊಕ್ವಿನ್‌ ಬಳಸುವುದಕ್ಕೆ ಸಂಬಂಧಿಸಿ ಬ್ರಝಿಲ್‌ ಅಧ್ಯಕ್ಷ ಜೈರ್‌ ಬೊಲ್ಸನಾರೊ ಅವರೊಂದಿಗಿನ ಭಿನ್ನಾಭಿಪ್ರಾಯದಿಂದಾಗಿ ಆರೋಗ್ಯ ಸಚಿವ ನೆಲ್ಸನ್‌ ಟೀಕ್‌ ರಾಜೀನಾಮೆ ನೀಡಿದ್ದಾರೆ.

ಮಲೇರಿಯ ಚಿಕಿತ್ಸೆಗೆ ಹೆಚ್ಚಾಗಿ ಬಳಸಲಾಗುವ ಹೈಡ್ರೋಕ್ಸಿಕ್ಲೋರೊಕ್ವಿನ್‌ ಔಷಧವನ್ನು ಕೋವಿಡ್‌ ಚಿಕಿತ್ಸೆಗೆ ದೇಶದಲ್ಲಿ ವ್ಯಾಪಕವಾಗಿ ಬಳಸುವುದಕ್ಕೆ ಮಾರ್ಗಸೂಚಿ ಹೊರಡಿಸುವಂತೆ ಅಧ್ಯಕ್ಷರು ಆರೋಗ್ಯ ಸಚಿವರಿಗೆ ಆದೇಶಿಸಿದ್ದರು. ಆದರೆ ಕೋವಿಡ್‌ ಚಿಕಿತ್ಸೆಗೆ ಇದು ಪರಿಣಾಮಕಾರಿಯೆಂದು ಸಾಬೀತಾಗಿಲ್ಲ ಮತ್ತು ಇದರಿಂದ ಹೃದ್ರೋಗಿಗಳ ಮೇಲೆ ಅಡ್ಡ ಪರಿಣಾಮಗಳಾಗುತ್ತವೆಯೆಂದು ವಿರೋಧಿಸಿ ಟೀಕ್‌ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದರು. ಟೀಕ್‌ ಅವರ ಪೂರ್ವಾಧಿಕಾರಿ ಲೂಯಿಸ್‌ ಹೆನ್ರಿಕ್‌ ಕೂಡ ಒಂದು ತಿಂಗಳ ಹಿಂದೆ ಇದೇ ಕಾರಣಕ್ಕೆ ಆರೋಗ್ಯ ಸಚಿವನ ಸ್ಥಾನ ತ್ಯಜಿಸಿದ್ದರು.

ಬ್ರಝಿಲ್‌ನ ಕೋವಿಡ್‌-19 ತೀವ್ರವಾಗಿ ಹಬ್ಬುತ್ತಿದ್ದು ಈತನಕ 2.20 ಲಕ್ಷ ಮಂದಿ ಸೋಂಕುಪೀಡಿತರಾಗಿದ್ದಾರೆ ಮತ್ತು 15,502 ಮಂದಿ ಸಾವಿಗೀಡಾಗಿದ್ದಾರೆ.