ಬ್ರಜಿಲ್‌ಏರುತ್ತಲಿರುವ ಸೋಂಕಿತರ ಸಂಖ್ಯೆ : ತುದಿ ಕಾಣದ ಬೆಟ್ಟವನ್ನು ಹತ್ತುವ ಸ್ಥಿತಿ

Team Udayavani, Jun 6, 2020, 6:09 PM IST

ರಿಯೊ ಡಿ ಜನೆರೊ: ತುದಿ ಕಾಣದ ಬೆಟ್ಟವನ್ನು ಹತ್ತುವುದು ಎಂಬಂತಾಗಿದೆ ಬ್ರಜಿಲ್‌ನಲ್ಲಿ ಕೋವಿಡ್‌ ವೈರಸ್‌ ನಿಯಂತ್ರಣ. ಕೋವಿಡ್‌ ವೈರಸ್‌ ಅತಿ ಹೆಚ್ಚು ಬಾಧಿತ ದೇಶಗಳಲ್ಲಿ ಒಂದಾಗಿರುವ ಬ್ರಜಿಲ್‌ನಲ್ಲಿ ಸದ್ಯಕ್ಕೆ ಎಲ್ಲ ಲೆಕ್ಕಾಚಾರಗಳು ಬುಡಮೇಲಾಗುತ್ತಿವೆ. ಎಷ್ಟು ಮಂದಿ ಕೋವಿಡ್‌ ಸೋಂಕಿತರು ಇದ್ದಾರೆ ಎಂಬ ಪ್ರಶ್ನೆಗೆ ತಜ್ಞರು ತುದಿ ಕಾಣದ ಬೆಟ್ಟವನ್ನು ಹತ್ತುವ ಉದಾಹರಣೆ ನೀಡುತ್ತಾರೆ. ನಿರಂತರವಾಗಿ ಕೋವಿಡ್‌ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಲೇ ಇದ್ದೇವೆ. ಆದರೆ ರೋಗಿಗಳ ಸಂಖ್ಯೆ ಮಾತ್ರ ಕಡಿಮೆಯಾಗುತ್ತಿಲ್ಲ ಎನ್ನುತ್ತಿದ್ದಾರೆ ಇಲ್ಲಿನ ವೈದ್ಯರು.

ಮೃತರ ಜತೆ ಒಂದೇ ತಾಸು
ಯಾರೇ ಕೋವಿಡ್‌ಗೆ ಬಲಿಯಾದರೂ ಮೃತದೇಹದ ಜತೆಗೆ ಇರಲು ಮನೆಯವರಿಗೆ ಸಿಗುವುದು ಒಂದೇ ತಾಸಿನ ಸಮಯ. ಹೆಚ್ಚೆಂದರೆ 10 ಮಂದಿ ಮಾತ್ರ ಅಂತ್ಯ ಸಂಸ್ಕಾರದಲ್ಲಿ ಭಾಗವಹಿಸಬಹುದು.

ಶವ ಸಂಸ್ಕಾರ ನೆರವೇರಿಸುವ ಅಂಡರ್‌ಟೇಕರ್‌ಗಳಿಗೆ ಇನ್ನೂ ಕಟ್ಟುನಿಟ್ಟಿನ ನಿಯಮಗಳಿವೆ. ಗುಂಡಿ ಅಗೆಯಲು ಇಳಿಯುವ ಮೊದಲು ಅವರಿಗೆ ಸಣ್ಣ ಚೀಟಿಯೊಂದನ್ನು ನೀಡಲಾಗುತ್ತದೆ. ಅದರಲ್ಲಿ ಈ3 ಎಂದು ಬರೆದಿರುತ್ತದೆ. ಇದರ ಅರ್ಥ ಇಷ್ಟೇ ಕೋವಿಡ್‌ನಿಂದಾಗಿ ಸಾವು ಎಂದು. ಈ ಚೀಟಿ ಸಿಕ್ಕಿದ ಕೂಡಲೇ ಅಂಡರ್‌ಟೇಕರ್ ಸುರಕ್ಷಾ ಉಡುಗೆ, ಮಾಸ್ಕ್, ಗ್ಲೌಸ್‌ಗಳನ್ನು ಧರಿಸಿ ಕೆಲಸಕ್ಕಿಳಿಯುತ್ತಾರೆ.

ಸರಾಸರಿ 40 ಶವ ಸಂಸ್ಕಾರ
ಬ್ರೆಜಿಲ್‌ನ ಅತಿ ದೊಡ್ಡ ನಗರ ಸಾವೊ ಪೌಲೊ ಒಂದರಲ್ಲೇ ನಿತ್ಯ ಸರಾಸರಿಯಾಗಿ 40 ಶವ ಸಂಸ್ಕಾರಗಳು ನೆರವೇರುತ್ತಿವೆ. ಕೆಲವೊಮ್ಮೆ ಒಂದೇ ದಿನದಲ್ಲಿ 60 ಶವಗಳನ್ನು ದಫ‌ನ ಮಾಡಿದ್ದೂ ಇದೆ. ಇತ್ತೀಚೆಗಷ್ಟೇ ನಗರಪಾಲಿಕೆ ಹೆಚ್ಚುವರಿಯಾಗಿ 5,000 ಶವಚೀಲಗನ್ನು ಖರೀದಿಸಿದೆ ಹಾಗೂ ಶವ ಸಂಸ್ಕಾರಕ್ಕಾಗಿ ಹೆಚ್ಚುವರಿ ಜನರನ್ನು ನೇಮಿಸಿಕೊಂಡಿದೆ. ಇಷ್ಟಾಗಿಯೂ ಬ್ರೆಜಿಲ್‌ನಲ್ಲಿ ಕೋವಿಡ್‌ ಪರಾಕಾಷ್ಠೆಗೆ ತಲುಪಿಲ್ಲ. ಜೂನ್‌ ಅಥವಾ ಜುಲೈಯಲ್ಲಿ ಪರಾಕಾಷ್ಠೆಗೆ ತಲುಪುವ ನಿರೀಕ್ಷೆಯಿದೆ ಎನ್ನುತ್ತಿದ್ದಾರೆ ತಜ್ಞರು.

ಪ್ರಯೋಗಾ ಲಯಗಳಿಗೆ ಪುರುಸೊತ್ತಿಲ್ಲ ದೇಶದಲ್ಲಿರುವ ಎಲ್ಲ ಪ್ರಯೋಗಾಲಯಗಳಿಗೆ ಪುರುಸೊತ್ತಿಲ್ಲದಷ್ಟು ಕೆಲಸ. ಎಷ್ಟೋ ಸಲ ಗಂಟಲ ದ್ರವ ಪರೀ ಕ್ಷೆಯ ವರದಿ ಬರುವ ಮೊದಲೇ ರೋಗಿ ಸತ್ತು ಹೋಗಿ ರುತ್ತಾನೆ. ಪರೀಕ್ಷಾ ಮಾದರಿಗಳು ವಾರಗಟ್ಟಲೆ ವಿಳಂಬ ವಾಗುತ್ತಿವೆ. ಪ್ರಯೋಗಾಲಯಗಳು ಇಷ್ಟು ಸಂಖ್ಯೆಯ ಪ್ರಯೋಗಗಳನ್ನು ಮಾಡುವ ಸಾಮರ್ಥ್ಯವನ್ನೇ ಹೊಂದಿಲ್ಲ.

300 ಪರೀಕ್ಷೆ
ಬ್ರೆಜಿಲ್‌ನಲ್ಲಿ ಈಗಲೂ ದಿನಕ್ಕೆ ಪ್ರತಿ 10 ಲಕ್ಷದಲ್ಲಿ ಹೆಚ್ಚೆಂದರೆ 300 ಮಂದಿಯ ಪರೀಕ್ಷೆ ಮಾಡಲಾಗುತ್ತಿದೆ. ಅದೇ ಅಮೆರಿಕದಲ್ಲಿ ಪ್ರತಿ 10 ಲಕ್ಷಕ್ಕೆ 9,500 ಮಂದಿಯನ್ನು ಪರೀಕ್ಷಿಸಲಾಗುತ್ತಿದೆ. ಪರೀಕ್ಷೆಗೆ ಅಗತ್ಯವಿರುವ ಸಾಧನಗಳ ಕೊರತೆಯೇ ದೊಡ್ಡ ಸಮಸ್ಯೆಯಾಗಿದೆ. ಇಡೀ ಜಗತ್ತು ಈ ಸಾಧನಗಳಿಗೆ ಬೇಡಿಕೆ ಸಲ್ಲಿಸುತ್ತಿರುವುದರಿಂದ ಪೂರೈಕೆ ಕಡಿಮೆಯಾಗಿದೆ. ಬ್ರೆಜಿಲ್‌ನಲ್ಲಿ ಈಗ ಆಸ್ಪತ್ರೆಗೆ ದಾಖಲಾಗಿರುವ ಚಿಂತಾಜನ ಸ್ಥಿತಿಯಲ್ಲಿರುವವರನ್ನು ಮಾತ್ರ ಪರೀಕ್ಷಿಸಲಾಗುತ್ತಿದೆ.

ಲೆಕ್ಕ ಪಕ್ಕಾ ಅಲ್ಲ
ಬ್ರೆಜಿಲ್‌ನ ಸರಕಾರಿ ಅಂಕಿಅಂಶಗಳು “ಉಸಿರಾಟದ ಸಮಸ್ಯೆ’ಯಿಂದ ಸಾಯುತ್ತಿರುವವರ ಸಂಖ್ಯೆ ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಶೇ. 10ರಷ್ಟು ಹೆಚ್ಚಾಗಿದೆ ಎಂದು ಹೇಳುತ್ತಿವೆ. ಆದರೆ ಬರೀ ಸರಕಾರಿ ಲೆಕ್ಕ ಮಾತ್ರ. ವಾಸ್ತವದಲ್ಲಿ ಸೋಂಕಿನ ಮತ್ತು ಸಾವಿನ ಪ್ರಮಾಣ ಬಹಳ ಹೆಚ್ಚು ಇದೆ.

ನಿಧಾನ ಗತಿ
ಬ್ರೆಜಿಲ್‌ನಲ್ಲಿ ಎಲ್ಲವೂ ನಿಧಾನ ಗತಿಯಲ್ಲಿ ಸಾಗುತ್ತಿದೆ ಎನ್ನುವುದು ಜನರ ಮಾತ್ರವಲ್ಲ ತಜ್ಞರ ಆಕ್ರೋಶವೂ ಹೌದು. ವೈರಾಣು ತಜ್ಞ ಡಾ| ಡೇನಿಯಲ್‌ ತಬಕ್‌ ಹೇಳುವಂತೆ ದೇಶ ವೈರಸ್‌ ಎದುರಿಸುವ ತಯಾರಿ ಮಾಡುವಲ್ಲಿಯೇ ನಿಧಾನ ಗತಿ ಅನುಸರಿಸಿತ್ತು. ವೈರಸ್‌ ಬದಲಾಗಿ ದೇಶದಲ್ಲಿ ಕಾರ್ನಿವಲ್‌ನ ತಯಾರಿ ನಡೆಯುತ್ತಿತ್ತು. ಫೆ.26ರಂದು ಮೊದಲ ಸೋಂಕು ಪತ್ತೆಯಾಯಿತು. ಅನಂತರ ನಿರಂತರ ವಾಗಿ ಏರುಗತಿಯಲ್ಲಿದೆ ಎನ್ನುತ್ತಾರೆ ಡಾ| ಡೇನಿಯಲ್‌.

ಸಾಮಾಜಿಕ ಅಂತರ ಪಾಲನೆ ಹಾಗೂ ಇತರ ನಿರ್ಬಂಧಗಳಿಂದ ವೈರಸ್‌ ಹರಡುವುದನ್ನು ತಡೆಯಬಹುದಾದರೂ ಇದನ್ನು ದೇಶದ ಅಧ್ಯಕ್ಷ ಜೈರ್‌ ಬೊಲ್ಸನಾರೊ ಅವರೇ ವಿರೋಧಿಸುತ್ತಿದ್ದಾರೆ.

ಬ್ರೆಜಿಲ್‌ನಲ್ಲಿ ಕಡಿಮೆಯೆಂದರೂ 15 ಲಕ್ಷ ಕೋವಿಡ್‌ ಸೋಂಕಿತರು ಇರುವ ಸಾಧ್ಯತೆಯಿದೆ.ಇದು ಸರಕಾರಿ ಲೆಕ್ಕಕ್ಕಿಂತ 15 ಪಟ್ಟು ಹೆಚ್ಚು. ನಗರಳಲ್ಲಿರುವ ಸ್ಲಮ್‌ಗಳೇ ಕೋವಿಡ್‌ನ‌ ಕೇಂದ್ರ ಬಿಂದುಗಳಾಗಿವೆ.