ಕೈಕೊಟ್ಟ ಬಿಎಸ್‌ಎನ್‌ಎಲ್‌: ವ್ಯಾಪಾರಸ್ಥರ ಪರದಾಟ

Team Udayavani, Jan 8, 2021, 3:50 PM IST

ಬ್ಯಾಡಗಿ: ಮಾರುಕಟ್ಟೆ ದಿನವಾದ ಗುರುವಾರ ಬ್ಯಾಡಗಿ ಪಟ್ಟಣದಲ್ಲಿ ಸರಕಾರಿ ಸ್ವಾಮ್ಯದ ಬಿಎಸ್‌ಎನ್‌ಎಲ್‌ ನೆಟ್‌ವರ್ಕ್‌ ಕೈಕೊಟ್ಟ ಪರಿಣಾಮ ಮಾರುಕಟ್ಟೆಯಲ್ಲಿ ವ್ಯಾಪಾರಸ್ಥರು ಪರದಾಡುವಂತಾಯಿತು.

ಪಟ್ಟಣದ ಮೆಣಸಿನಕಾಯಿ ಮಾರುಕಟ್ಟೆಯಲ್ಲಿ ಬಹುತೇಕ ವ್ಯಾಪಾರಸ್ಥರು ಬಿಎಸ್‌ಎನ್‌ಎಲ್‌ ನೆಟ್‌ವರ್ಕ್‌ ಬಳಕೆ ಮಾಡುತ್ತಿದ್ದಾರೆ. ಗುರುವಾರ ಬೆಳಿಗ್ಗೆ ಏಕಾ ಏಕಿ ನೆಟ್‌ವರ್ಕ್‌ ಕೈಕೊಟ್ಟಿದ್ದು ವ್ಯಾಪಾರಸ್ಥರಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿತು. ಈ ಟೆಂಡರ್‌ ಮೂಲಕ ಮೆಣಸಿನಕಾಯಿಗೆ ಧಾರಣೆ ನಿಗದಿ ಮಾಡಲು ನೆಟ್‌ ವರ್ಕ್‌ ಅತ್ಯವಶ್ಯಕವಾಗಿದ್ದು, ಮೊದಲೇ ಗುರುವಾರ ಅಕಾಲಿಕ ಮಳೆಯಿಂದ ತಡವಾಗಿದ್ದ ಟೆಂಡರ್‌ ಪ್ರಕ್ರಿಯೆಗೆ, ನೆಟ್‌ ವರ್ಕ್‌ ಸಮಸ್ಯೆ ಗಾಯದ ಮೇಲೆ ಬರೆ
ಎಳೆದಂತೆ ಮಾಡಿತು. ಇದರಿಂದಾಗಿ ಹಲವು ವ್ಯಾಪಾರಸ್ಥರು ಬಿಎಸ್‌ಎನ್‌ಎಲ್‌ ಕಚೇರಿ ಬಳಿ ತೆರಳಿ ಸಿಬ್ಬಂದಿಯೊಂದಿಗೆ ವಾಗ್ವಾದ ನಡೆಸುತ್ತಿದ್ದ ದೃಶ್ಯಗಳು ಕಂಡುಬಂದವು.

ಇದನ್ನೂ ಓದಿ:ಮೆಣಸಿನಕಾಯಿ ದರದಲ್ಲಿ ದಿಢೀರ್‌ ಕುಸಿತ : ಆವಕ ಪ್ರಮಾಣವೂ ಇಳಿಮುಖ

ಶಿಗ್ಗಾವಿಯಲ್ಲಿ ದುರಸ್ತಿ ನಡೆಯುತ್ತಿರುವ ಕಾರಣ ತೊಂದರೆಯಾಗಿದೆ ಎಂದುನೌಕರರು ಸಮಜಾಯಿಷಿ ನೀಡಿದರು ಸಹ ಜಗ್ಗದ ವ್ಯಾಪಾರಸ್ಥರು ವಾಗ್ವಾದ ಮುಂದುವರೆಸಿದರು. ಆದಷ್ಟು ಬೇಗ ನೆಟ್‌ವರ್ಕ್‌ ಸಮಸ್ಯೆ ಪರಿಹಸಿರಿ. ಇಲ್ಲವೇ, ನಿಮ್ಮ ಸಂಪರ್ಕ ಕಡಿತಗೊಳಿಸಿ ಎಂದು ಕಿಡಿಕಾರಿದರು.