By Election: ಮಗನಿಗಾಗಿ ಎಚ್‌ಡಿಕೆ ನಿಮ್ಮ ಊರು ಹುಡುಕಿ ಬರುತ್ತಾರಷ್ಟೇ: ಡಿ.ಕೆ.ಸುರೇಶ್‌

Team Udayavani, Nov 5, 2024, 11:50 PM IST

ಚನ್ನಪಟ್ಟಣ: ಕುಮಾರಸ್ವಾಮಿ ಅವರು ಈವರೆಗೂ ನಿಮ್ಮ ಊರಿನ ಕಡೆ ತಿರುಗಿ ನೋಡಿಲ್ಲ. ಈಗ ತನ್ನ ಮಗನಿಗಾಗಿ ನಿಮ್ಮ ಊರು ಹುಡುಕಿಕೊಂಡು ಬರುತ್ತಿದ್ದಾರೆ ಎಂದು ಮಾಜಿ ಸಂಸದ ಡಿ.ಕೆ. ಸುರೇಶ್‌ ವಾಗ್ಧಾಳಿ ನಡೆಸಿದರು.

ಬಿ.ವಿ. ಹಳ್ಳಿಯಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿಯೋಗೇಶ್ವರ್‌ ಪರ ಡಿ.ಕೆ. ಸುರೇಶ್‌ ಮಂಗಳವಾರ ಮತಯಾಚನೆ ವೇಳೆ ಮಾತನಾಡಿದರು. ಕುಮಾರಸ್ವಾಮಿ ಅವರನ್ನು ನೀವು ಶಾಸಕರಾಗಿ ಮಾಡಿದ ಅನಂತರ ಅದನ್ನು ಬಿಟ್ಟು ಈಗ ಕೇಂದ್ರದ ಮಂತ್ರಿಯಾಗಿದ್ದಾರೆ. ಅದರ ಬಗ್ಗೆ ನಮ್ಮ ತಕರಾರಿಲ್ಲ. ಇಲ್ಲಿ ನಷ್ಟ ಆಗಿರುವುದು ನಿಮ್ಮ ಮನೆ ಮಗ ಯೋಗೇಶ್ವರ್‌ಗೆ. ಯೋಗೇಶ್ವರ್‌ ಹಗಲು ರಾತ್ರಿ ನಿಮಗಾಗಿ ಶ್ರಮಿಸಿದ್ದರು. ರೈತರನ್ನು ರಕ್ಷಿಸಲು ಕೆರೆಗೆ ನೀರು ತುಂಬಿಸಿದರು. ಅವರಿಗೆ ರಾಜಕೀಯವಾಗಿ ಶಕ್ತಿ ತುಂಬಿ ನಿಮ್ಮ ಸೇವೆಗೆ ಅವಕಾಶ ಮಾಡಿಕೊಡಿ ಎಂದು ಮನವಿ ಮಾಡಿದರು.