ಕಾಂಗ್ರೆಸ್ ಹೈಕಮಾಂಡ್ ವಿರುದ್ಧವೂ ಸಿಡಿದೆದ್ದ ಇಬ್ರಾಹಿಂ

Team Udayavani, Jan 29, 2022, 7:29 PM IST

ಬೆಂಗಳೂರು : ರಣದೀಪ್ ಸಿಂಗ್ ಸುರ್ಜೇವಾಲಾನ ಅಪ್ಪನ‌ ಜತೆ ನಾನು ಕೆಲಸ ಮಾಡಿದ್ದೇನೆ. ನಾನು ಹಿರಿಯ.‌ಈಗ ಅವರಿಗೆ ವರದಿ ಒಪ್ಪಿಸಿ ಎಂದರೆ ಹೇಗೆ ? ಎಂದು ಕಾಂಗ್ರೆಸ್ ತೊರೆಯಲು ಸಿದ್ದವಾಗಿರುವ ಮಾಜಿ ಸಚಿವ ಸಿಎಂ ಇಬ್ರಾಹಿಂ ಗುಡುಗಿದ್ದಾರೆ.

ರಾಷ್ಟ್ರೀಯ ಸುದ್ದಿ ವಾಹನಿಗಳ ಜತೆ ಮಾತನಾಡಿದ ಅವರು, ” ನಮ್ಮಂತ ಹಿರಿಯರ ಜತೆಗೆ ರಾಹುಲ್ ಗಾಂಧಿ ಮಾತನಾಡುವುದೇ ಇಲ್ಲ. ಸಮಸ್ಯೆ ಹೇಳಿದರೆ ಸುರ್ಜೇವಾಲಾ ಜತೆ ಮಾತನಾಡಿ ಎಂದು ಸಾಗ ಹಾಕಲು‌ ನೋಡುತ್ತಾರೆ. ಯಾರು ಈ ಸುರ್ಜೆವಾಲಾ, ಇವನ ಅಪ್ಪನ ಜತೆಗೆ ನಾನು‌‌‌ ಕೆಲಸ ಮಾಡಿದ್ದೇನೆ. ನನಗಿಂತ ಜ್ಯೂನಿಯರ್ ಗೆ ರಿಪೋರ್ಟ್ ಮಾಡಿಕೊಳ್ಳಬೇಕಾ ? ಎಂದು ಪ್ರಶ್ನಿಸಿದ್ದಾರೆ.

ಇಬ್ಬರು ಭ್ರಷ್ಟ ಎಐಸಿಸಿ ಪ್ರಧಾನ ಕಾರ್ಯದರ್ಶಿಗಳಿಂದ ರಾಜ್ಯ ಕಾಂಗ್ರೆಸ್ ಹಾಳಾಗುತ್ತಿದೆ. ಕೆ.ಸಿ.ವೇಣುಗೋಪಾಲ ಹಾಗೂ ಸುರ್ಜೇವಾಲಾಗೆ ಚುನಾವಣೆಯಲ್ಲಿ ಗೆದ್ದ ಅನುಭವವೇ ಇಲ್ಲ. ಅಂಥವರನ್ನು ನಂಬಿಕೊಂಡು‌ ಕಾಂಗ್ರೆಸ್ ವರಿಷ್ಠರು ಕುಳಿತಿದ್ದಾರೆ. ಸ್ಥಳೀಯ ನಾಯಕರ ಜತೆ ನೇರವಾಗಿ ಮಾತನಾಡುವುದಕ್ಕೆ ರಾಹುಲ್ ಗಾಂಧಿ, ಸೋನಿಯಾ ಗಾಂಧಿಗೆ ಏನು ಸಮಸ್ಯೆ ? ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕಾಂಗ್ರೆಸ್ ನಲ್ಲಿ ಆಂತರಿಕ ಪ್ರಜಾಪ್ರಭುತ್ವವೇ ಇಲ್ಲ.‌ವಿಧಾನ ಪರಿಷತ್ ವಿಪಕ್ಷ ನಾಯಕ ಸ್ಥಾನಕ್ಕೆ ಆಂತರಿಕ ಮತದಾನ ನಡೆಸಿ ಎಂದರೆ ದಿಲ್ಲಿಯಿಂದ ಆದೇಶ ರವಾನಿಸಿದ್ದಾರೆ ಎಂದು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.