ಬ್ರಿಟನ್‌ ಮುಸ್ಲಿಮರ ಎತ್ತಿಕಟ್ಟಲು ಕಾಶ್ಮೀರ ಅಸ್ತ್ರ; ಖಲಿಸ್ತಾನ ಪರ ಗುಂಪುಗಳ ಕಿಡಿಗೇಡಿತನ

Team Udayavani, Feb 10, 2023, 9:57 PM IST

ಲಂಡನ್‌ : ಕಾಶ್ಮೀರ ವಿಚಾರ ಬಳಸಿಕೊಂಡು, ಬ್ರಿಟನ್‌ನಲ್ಲಿರುವ ಮುಸ್ಲಿಂ ಸಮುದಾಯಗಳನ್ನು ಭಾರತದ ವಿರುದ್ಧ ಎತ್ತಿಕಟ್ಟುವ ಕೆಲಸವನ್ನು ಪಾಕಿಸ್ತಾನ ಮಾಡುತ್ತಿದೆ.

ಇಂಥ ಒಂದು ಆಘಾತಕಾರಿ ಅಂಶ ಬೆಳಕಿಗೆ ಬಂದಿದೆ. ಖಲಿಸ್ತಾನಿ ಪರ ಗುಂಪುಗಳು ಕೂಡ ಭಾರತದ ವಿರುದ್ಧ ದ್ವೇಷ ಹರಡಲು ಪ್ರಯತ್ನಿಸಿವೆ. ಯು.ಕೆ. ಸರ್ಕಾರ ಈ ಬಗ್ಗೆ ಕಳವಳ ವ್ಯಕ್ತಪಡಿಸಿ, ಇದರಿಂದ ಭಾರತದ ಜತೆಗೆ ಇರುವ ಬಾಂಧವ್ಯಕ್ಕೆ ಧಕ್ಕೆ ಉಂಟಾಗಲಿದೆ ಎಂದು ಹೇಳಿದೆ.

ಬ್ರಿಟನ್‌ನಲ್ಲಿ ಭಯೋತ್ಪಾದಕ ಚಟುವಟಿಕೆಗಳಿಗೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಸರ್ಕಾರ ಯೋಜನೆಯೊಂದನ್ನು ರೂಪಿಸುತ್ತಿದ್ದು, ಈ ಸಂಬಂಧಿಸಿದಂತೆ ಶಿಫಾರಸು ಕೋರಿದೆ. ಸರ್ಕಾರಿ ನೇಮಕಾತಿಗಳ ಆಯುಕ್ತ ವಿಲಿಯಂ ಶಾಕ್ರಾಸ್‌ ಕೆಲ ಶಿಫಾರಸು ಮಾಡಿದ್ದು, ಈ ವೇಳೆ ಈ ವಿಚಾರಗಳನ್ನು ಪ್ರಸ್ತಾಪಿಸಿದ್ದಾರೆ.

ಯು.ಕೆ.ಯಲ್ಲಿರುವ ಮುಸ್ಲಿಂ ಸಮುದಾಯಗಳ ಮೇಲೆ ಪಾಕ್‌ ಪ್ರಭಾವ ಹಾಗೂ ಭಾರತದ ವಿರುದ್ಧ ಅಭಿಪ್ರಾಯ ಹುಟ್ಟುಹಾಕಲು ಪ್ರಯತ್ನಿಸುತ್ತಿರುವ ಖಲಿಸ್ಥಾನಿ ಗುಂಪುಗಳ ಸುಳ್ಳು ಪ್ರಚಾರ ತಡೆಗೆ ಕ್ರಮ ಕೈಗೊಳ್ಳುವುದು ಅಗತ್ಯ ಎಂದಿದ್ದಾರೆ.