Shiv Linga: ಕುಸಿದು ಬಿದ್ದ ರಿಜಿಸ್ಟ್ರಾರ್‌- ಶಿವಲಿಂಗ ತೆರವಿಗೆ ತಡೆ!

Team Udayavani, Aug 10, 2023, 6:34 AM IST

ಕೋಲ್ಕತ: ಜಮೀನು ವಿವಾದದ ಪ್ರಕರಣವೊಂದಕ್ಕೆ ಸಂಬಂಧಿಸಿದಂತೆ ಶಿವಲಿಂಗವನ್ನು ತೆರವುಗೊಳಿಸಲು ಕೋಲ್ಕತ ಹೈಕೋರ್ಟ್‌ ನೀಡಿದ್ದ ಅಧಿಕೃತ ಆದೇಶ ಪ್ರಕಟಿಸುವ ಸಂದರ್ಭದಲ್ಲಿ ರಿಜಿಸ್ಟ್ರಾರ್‌ ಕುಸಿದುಬಿದ್ದಿದ್ದಾರೆ. ಈ ಹಿನ್ನೆಲೆಯಲ್ಲಿ ನ್ಯಾಯಮೂರ್ತಿಗಳು ಆದೇಶ ಪ್ರಕಟಿಸುವ ನಿರ್ಧಾರದಿಂದಲೇ ಹಿಂದೆ ಸರಿದು, ಕೆಳ ನ್ಯಾಯಾಲಯದಲ್ಲಿ ಪ್ರಕರಣ ಇತ್ಯರ್ಥಗೊಳಿಸಲು ಸೂಚನೆ ನೀಡಿದ್ದಾರೆ.

ಪಶ್ಚಿಮ ಬಂಗಾಳದ ಖಾದಿರ್‌ಪುರ ಗ್ರಾಮದ ಗೋವಿಂದ್‌ ಮಂಡಲ್‌ ಎಂಬುವವರ ಜಮೀನಿನಲ್ಲಿ ಶಿವಲಿಂಗವೊಂದಿದ್ದು, ಇದು ತಮ್ಮ ಪೂರ್ವಜರ ಜಮೀನು ಎಂದು ಅವರು ವಾದಿಸಿದ್ದಾರೆ. ಅದೇ ಜಮೀನಿಗೆ ನಾವು ಹಕ್ಕುದಾರರು, ಶಿವಲಿಂಗ ಮೊದಲು ಇರಲಿಲ್ಲ, ಅದನ್ನು ಈಗ ಪ್ರತಿಷ್ಠಾಪಿಸಲಾಗಿದೆ ಎಂದು ಸುದೀಪ್‌ ಪಾಲ್‌ ಎಂಬವರು ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿದ್ದಾರೆ. ಈ ಸಂಬಂಧಿಸಿದಂತೆ ವಾದ-ಪ್ರತಿವಾದವನ್ನು ಆಲಿಸಿದ ನ್ಯಾಯಮೂರ್ತಿ ಜಾಯ್‌ ಸೇನ್‌ಗುಪ್ತ, ದಾಖಲೆಗಳು ಸುದೀಪ್‌ ಪರವಾಗಿದ್ದ ಹಿನ್ನೆಲೆ ಶಿವಲಿಂಗ ತೆರವಿಗೆ ಆದೇಶ ನೀಡಿದ್ದರು. ಆದರೆ ಅದೇ ವೇಳೆ ಈ ವಿಲಕ್ಷಣ ಘಟನೆ ನಡೆದ ಹಿನ್ನೆಲೆ ತೀರ್ಪು ಪ್ರಕಟಿಸದೇ ಹಿಂದೆ ಸರಿದಿದ್ದಾರೆ.