Congress: ದೇಣಿಗೆ- 2 ವಾರದಲ್ಲಿ 10 ಕೋಟಿ ಸಂಗ್ರಹ

Team Udayavani, Jan 3, 2024, 12:26 AM IST

ಹೊಸದಿಲ್ಲಿ: ಕಾಂಗ್ರೆಸ್‌ನ “ದೇಶಕ್ಕಾಗಿ ದೇಣಿಗೆ” ಅಭಿಯಾನ ಆರಂಭವಾಗಿ 2 ವಾರಗಳಲ್ಲೇ ಒಟ್ಟು 10 ಕೋಟಿ ರೂ.ಗಳನ್ನು ಸಂಗ್ರಹಿಸಿದೆ ಎಂದು ಪಕ್ಷದ ಖಜಾಂಚಿ ಅಜಯ್‌ ಮಾಕನ್‌ ಮಂಗಳವಾರ ತಿಳಿಸಿದ್ದಾರೆ.

ಲೋಕಸಭೆ ಚುನಾವಣೆ ಹಿನ್ನೆಲೆಯಲ್ಲಿ ಡಿ.18ರಂದು ಜನರಿಂದಲೇ ದೇಣಿಗೆ ಸಂಗ್ರಹಿಸುವ ನಿಟ್ಟಿನಲ್ಲಿ “ದೇಶಕ್ಕಾಗಿ ದೇಣಿಗೆ’ ಹೆಸರಿನಲ್ಲಿ ಆನ್‌ಲೈನ್‌ ದೇಣಿಗೆ ಸಂಗ್ರಹ ಅಭಿಯಾನವನ್ನು ಪಕ್ಷ ಆರಂಭಿಸಿತ್ತು. “ಹೊಸ ವರ್ಷದಂದೇ ಹೊಸ ಮೈಲುಗಲ್ಲು ನಿರ್ಮಾಣವಾಗಿದ್ದು, 2 ವಾರಗಳಲ್ಲೇ 10 ಕೋಟಿ ರೂ. ದೇಣಿಗೆ ಸಂಗ್ರಹವಾಗಿದೆ’ ಎಂದು ಮಾಕನ್‌ ಎಕ್ಸ್‌ನಲ್ಲಿ ಬರೆದುಕೊಂಡಿದ್ದಾರೆ. 2 ವಾರಗಳ ಅವಧಿಯಲ್ಲಿ ಒಟ್ಟು 2.49 ಲಕ್ಷ ವಹಿವಾಟುಗಳು ನಡೆದಿದ್ದು, ಒಟ್ಟು 10 ಕೋಟಿ ರೂ.ಗಳು ಸಂಗ್ರಹವಾಗಿವೆ ಎಂದು ತಿಳಿಸಿದ್ದಾರೆ.