25 ಅಡಿ ಎತ್ತರದ ಬೃಹತ್‌ ಶೇಂಗಾಕಾಯಿ ಶಿವಲಿಂಗ ನಿರ್ಮಾಣ!

Team Udayavani, Feb 19, 2023, 7:33 AM IST

ಕಲಬುರಗಿ: ನಗರದ ಹೊರ‌ವಲಯದಲ್ಲಿರುವ ಈಶ್ವರೀಯ ಬ್ರಹ್ಮಕುಮಾರಿ ವಿಶ್ವವಿದ್ಯಾಲಯದ ಅಮೃತ ಸರೋವರದಲ್ಲಿ ಈ ಬಾರಿ ಶಿವರಾತ್ರಿ ಆಚರಣೆ ಹಿನ್ನೆಲೆಯಲ್ಲಿ 25 ಅಡಿ ಎತ್ತರದ ಬೃಹತ್‌ ಶೇಂಗಾಕಾಯಿ ಶಿವಲಿಂಗ ನಿರ್ಮಾಣ ಮಾಡಲಾಗಿದೆ.

ಇದು ಈಗ ದೊಡ್ಡ ಪ್ರಮಾಣದಲ್ಲಿ ಭಕ್ತರನ್ನು ಸೆಳೆಯುತ್ತಿದೆ. 10 ದಿನಗಳ ಕಾಲ ಪ್ರದರ್ಶನ ನಡೆಯಲಿದೆ.

ಈ ಶಿವಲಿಂಗವನ್ನು ನಿರ್ಮಾಣ ಮಾಡಲು ಬರೋಬ್ಬರಿ ಎಂಟು ಕ್ವಿಂಟಲ್‌ ಶೇಂಗಾವನ್ನು ಬಳಕೆ ಮಾಡಲಾಗಿದೆ. ಅದರಲ್ಲೂ ಪ್ರಮುಖವಾಗಿ ಒಂದೇ ಅಳತೆಯ ಶೇಂಗಾವನ್ನು ಬಳಕೆ ಮಾಡಿರುವುದು ಗಮನಾರ್ಹ. ಇದಕ್ಕೆ ಅರಿಶಿಣ ಮತ್ತು ಕುಂಕುಮವನ್ನು ಲೇಪನ ಮಾಡಲಾಗಿದೆ. ಇದರಿಂದಾಗಿ ಶಿವಲಿಂಗ ಆಕರ್ಷಕ ಬಣ್ಣಗಳಲ್ಲಿ ಕಂಗೊಳಿಸುವಂತಾಗಿದೆ.

ಜತೆಯಲ್ಲಿಯೇ 12 ಜ್ಯೋತಿರ್ಲಿಂಗಗಳನ್ನು ಕೂಡ ನಾಣ್ಯ, ಕಲ್ಲು ಸಕ್ಕರೆ, ಗೋಡಂಬಿ, ಸಿರಿಧಾನ್ಯಗಳಲ್ಲಿ ನಿರ್ಮಾಣ ಮಾಡಿರುವುದು ಕೂಡ ಭಕ್ತರನ್ನು ಸೆಳೆಯುತ್ತಿದೆ.