ರಷ್ಯಾ ಈಗ ನಂಬರ್‌ 2 ಆದರೂ ಲಾಕ್‌ಡೌನ್‌ ತೆರವು

Team Udayavani, May 14, 2020, 5:39 PM IST

ಮಾಸ್ಕೊ: ಕೋವಿಡ್ ವೈರಸ್‌ ಸೋಂಕಿತರ ಪಟ್ಟಿಯಲ್ಲಿ ರಷ್ಯಾ ಈಗ ಎರಡನೇ ಸ್ಥಾನ ಪಡೆದಿದೆ. ಇಲ್ಲಿ ಸೋಂಕಿತರ ಸಂಖ್ಯೆ 2.32 ಲಕ್ಷಕ್ಕೇರಿದೆ. ಕಳೆದ 24 ತಾಸುಗಳಲ್ಲಿ ರಷ್ಯಾದಲ್ಲಿ 10,899 ಜನರಲ್ಲಿ ಕೋವಿಡ್ ಪಾಸಿಟಿವ್‌ ಪತ್ತೆಯಾಗಿದೆ. ಈ ಮೂಲಕ 10 ದಿನಗಳಿಂದ ಪ್ರತಿ ದಿನವೂ 10 ಸಾವಿರಕ್ಕಿಂತಲೂ ಹೆಚ್ಚು ಸೋಂಕಿತರು ಪತ್ತೆಯಾದಂತಾಗಿದೆ.

ಅಮೆರಿಕ ಬಳಿಕ ರಷ್ಯಾದಲ್ಲಿ ಹೆಚ್ಚು ಸೋಂಕಿತರು ಕಂಡುಬಂದಿದ್ದರೂ, ಸಾವಿನ ಸಂಖ್ಯೆ ಮಾತ್ರ ಕಡಿಮೆ ಇದೆ. ಇಲ್ಲಿಯವರೆಗೂ ರಷ್ಯಾದಲ್ಲಿ 2,116 ಮಂದಿ ಕೋವಿಡ್ ವೈರಸ್‌ನಿಂದ ಮೃತಪಟ್ಟಿದ್ದಾರೆ.

ಒಂದು ಕಡೆ ಸೋಂಕಿತರ ಸಂಖ್ಯೆ ಹೆಚ್ಚುತ್ತಿದ್ದರೂ ರಷ್ಯಾ ಲಾಕ್‌ಡೌನ್‌ ಸಡಿಲಿಕೆ ಮಾಡಿದೆ. 6 ವಾರಗಳ ಬಳಿಕ ರಷ್ಯನ್ನರು ಕೆಲಸ ಪ್ರಾರಂಭಿಸಿದ್ದಾರೆ. ಫ್ಯಾಕ್ಟರಿ ಮತ್ತು ಕಟ್ಟಡ ನಿರ್ಮಾಣ ಕಾರ್ಯಗಳಿಗೆ ಅನುಮತಿ ನೀಡಲಾಗಿದೆ. ಆರ್ಥಿಕತೆಯ ವೃದ್ಧಿಗಾಗಿ ಎಲ್ಲಾ ಕ್ಷೇತ್ರಗಳು ಪುನರಾರಂಭಗೊಳ್ಳಬೇಕು ಎಂಬ ಕಾರಣಕ್ಕೆ ಲಾಕ್‌ಡೌನ್‌ ಸಡಿಲಿಕೆ ಮಾಡಲಾಗಿದ್ದು, ಮತ್ತೆ ಕೋವಿಡ್ ಪ್ರಕರಣ ಹೆಚ್ಚಾದರೆ ನಿಯಂತ್ರಿಸಲು ಸ್ಥಳೀಯ ಅಧಿಕಾರಿಗಳು ಕಠಿನ ನಿರ್ಬಂಧಗಳನ್ನು ಹೇರಬಹುದಾಗಿದೆ.

ರಾಜಧಾನಿ ಮಾಸ್ಕೊದಲ್ಲಿ ಅತಿ ಹೆಚ್ಚು ಕೋವಿಡ್ ಸೋಂಕಿತರು ಪತ್ತೆಯಾಗಿದ್ದಾರೆ. ಸಾವಿನ ಪ್ರಮಾಣವೂ ಇಲ್ಲಿ ಹೆಚ್ಚೇ ಇದೆ. ಹೀಗಾಗಿ ಮಾಸ್ಕೊ ಮೇಯರ್‌ ಮೇ 31ರ ವರೆಗೂ ಲಾಕ್‌ಡೌನ್‌ ಘೋಷಿಸಿದ್ದಾರೆ.