Deepfakesಗೆ ಕಡಿವಾಣ ಹಾಕಿ: ಸಾಮಾಜಿಕ ಜಾಲತಾಣಗಳಿಗೆ ಅಪ್ಪಣೆ

Team Udayavani, Dec 27, 2023, 12:34 AM IST

ಹೊಸದಿಲ್ಲಿ: ನಟಿ ರಶ್ಮಿಕಾ ಮಂದಣ್ಣ ಸೇರಿದಂತೆ ಹಲವರ ಫೋಟೋ ಡೀಪ್‌ಫೇಕ್‌ ಆದ ಬಳಿಕ ದೇಶದಲ್ಲಿ ಈ ಎಐ ಆಧಾರಿತ ತಂತ್ರಜ್ಞಾನದ ಬಗ್ಗೆ ಕಾಳಜಿ ಹೆಚ್ಚಿದ್ದು, ಡೀಪ್‌ಫೇಕ್‌ಗೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಎಲ್ಲ ಸಾಮಾಜಿಕ ಜಾಲತಾಣ ವೇದಿಕೆಗಳಿಗೆ ಕೇಂದ್ರ ಸರಕಾರ ಮಂಗಳವಾರ ಹೊಸ ಮಾರ್ಗಸೂಚಿ ಬಿಡುಗಡೆ ಗೊಳಿಸಿದೆ. ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವಾಲಯ ಹೊರಡಿಸಿರುವ ಮಾರ್ಗ ಸೂಚಿಯಲ್ಲಿ ಎಲ್ಲ ಜಾಲತಾಣ ವೇದಿಕೆಗಳೂ ದೇಶದ ಐಟಿ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸುವಂತೆ ಸೂಚಿಸಲಾಗಿದೆ.

ಜಾಲತಾಣ ಬಳಕೆದಾರರಿಗೆ ಐಟಿ ನಿಯಮಗಳ ಅನ್ವಯ ನಿಷೇಧಿಸಿರುವ ಕಂಟೆಂಟ್‌ಗಳನ್ನು ಜಾಲತಾಣದಲ್ಲಿ ಹಬ್ಬಿಸದಂತೆ ವಿಶೇಷವಾಗಿ 3(1)(ಬಿ) ಅನ್ವಯ ವಿಧಿಸಿರುವ ಕ್ರಮಗಳನ್ನು ಮೀರ ದಂತೆ ನಿಖರವಾಗಿ ತಿಳಿಸಬೇಕು ಎಂದು ಸೂಚಿಸಿದೆ. ಬಳಕೆದಾರರು ಎಸಗುವ ತಪ್ಪುಗಳಿಗೆ ಐಟಿ ಕಾಯ್ದೆ 2000 ಹಾಗೂ ಐಪಿಸಿ ಸೆಕ್ಷನ್‌ಗಳ ಅನ್ವಯ ವಿಧಿಸಬಹು ದಾದ ಶಿಕ್ಷೆಗಳ ಬಗ್ಗೆಯೂ ಮಾಹಿತಿ ನೀಡಲಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಕೂಡ ಇತ್ತೀಚೆಗಷ್ಟೇ ಡೀಪ್‌ಫೇಕ್‌ ತಂತ್ರಜ್ಞಾನದ ಬಗ್ಗೆ ಆತಂಕ ವ್ಯಕ್ತ ಪಡಿಸಿ ಜನರಿಗೆ ಈ ಬಗ್ಗೆ ತಿಳಿವಳಿಕೆ ನೀಡುವಂತೆ ಮಾಧ್ಯಮಗಳನ್ನು ಕೋರಿದ್ದರು.

ಡೀಪ್‌ಫೇಕ್‌ ವೀಡಿಯೋಗಳಲ್ಲಿ ಜಾಲತಾಣಗಳಲ್ಲಿ ವೈರಲ್‌ ಆಗಿ ಈ ಸಂಬಂಧಿಸಿದಂತೆ ಹಲವು ಪ್ರಕರಣಗಳು ದಾಖಲಾದ ಬಳಿಕ ಮೆಟಾ, ಸ್ನ್ಯಾಪ್‌ಚಾಟ್‌, ಶೇರ್‌ಚಾಟ್‌, ಟೆಲಿಗ್ರಾಮ್‌, ಕೂ ಸೇರಿದಂತೆ ಹಲವು ಜಾಲತಾಣ ವೇದಿಕೆಗಳ ಅಧಿಕಾರಿಗಳು ಕೇಂದ್ರ ಐಟಿ ಖಾತೆ ರಾಜ್ಯ ಸಚಿವ ರಾಜೀವ್‌ ಚಂದ್ರಶೇಖರ್‌ ಅವರನ್ನು ಭೇಟಿಯಾಗಿದ್ದರು. ಅದಾದ ಒಂದು ತಿಂಗಳ ಬಳಿಕ ಈ ಮಾರ್ಗಸೂಚಿ ಬಂದಿದೆ.