Pension: ಪಿಂಚಣಿ ವಿವರ ಸಲ್ಲಿಸಲು ಮೇ 31ರವರೆಗೆ ಗಡುವು ವಿಸ್ತರಣೆ

Team Udayavani, Jan 4, 2024, 9:42 PM IST

ನವದೆಹಲಿ: ಪಿಂಚಣಿದಾರರಿಗೆ ಮತ್ತು ಉದ್ಯೋಗದಾತರಿಗೆ ಸಂತಸದ ಸುದ್ದಿಯನ್ನು ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯ ನೀಡಿದೆ. ಕಂಪನಿಗಳ ಮಾಲಿಕರು ಪಿಂಚಣಿದಾರರ ವೇತನ ವಿವರವನ್ನು ಸಲ್ಲಿಸಲು ಈ ವರ್ಷ ಮೇ 31ರವರೆಗೆ ಗಡುವನ್ನು ವಿಸ್ತರಿಸಲಾಗಿದೆ. ಇದರಿಂದ ಕಂಪನಿಗಳು ನಿರಾಳವಾಗಿ ವೇತನ ವಿವರವನ್ನು ಸಲ್ಲಿಸಬಹುದು. ಮಾತ್ರವಲ್ಲ ದೊಡ್ಡ ಪ್ರಮಾಣದಲ್ಲಿ ವೇತನವನ್ನು ಪಡೆಯುವ ವ್ಯಕ್ತಿಗಳ ವಿವರ ಸಲ್ಲಿಸಲು ಸುಲಭವಾಗಲಿದೆ.

ಪಿಂಚಣಿ ನೀಡುವ ಹೊಣೆ ಹೊತ್ತಿರುವ ಇಪಿಎಫ್ಒ (ಉದ್ಯೋಗಿಗಳ ಪಿಂಚಣಿ ಸಂಸ್ಥೆ) ವಿವರ ಸಲ್ಲಿಕೆಗೆ ಆನ್‌ಲೈನ್‌ ಮೂಲಕ ಅವಕಾಶ ಕಲ್ಪಿಸಿದೆ. ಇಪಿಎಫ್ಒ ವೆಬ್‌ನಲ್ಲಿ ಅರ್ಜಿ ಸಲ್ಲಿಸಿ, ಅಲ್ಲೇ ದೃಢೀಕರಿಸಿಕೊಳ್ಳಬಹುದು. ಈ ಸೌಲಭ್ಯ ಕಳೆದ ವರ್ಷ ಫೆ.26ರಂದೇ ಬಿಡುಗಡೆಯಾಗಿತ್ತು. ಮೇ 3ರವರೆಗೆ ಗಡುವು ನೀಡಲಾಗಿತ್ತು. ಹಲವು ಬಾರಿ ಈ ಗಡುವನ್ನು ವಿಸ್ತರಿಸಿರುವ ಇಪಿಎಫ್ಒ, ಈಗ ಇನ್ನೂ ಐದು ತಿಂಗಳು ವಿಸ್ತರಿಸಿದೆ. ಈಗಾಗಲೇ 3.6 ಲಕ್ಷ ಅರ್ಜಿಗಳು ಈಗಲೂ ದೃಢೀಕರಣಕ್ಕಾಗಿ ಕಾಯುತ್ತಿವೆ. ಆದ್ದರಿಂದಲೇ ಗಡುವು ವಿಸ್ತರಣೆ ಮಾಡಲಾಗಿದೆ ಎಂದು ಸಚಿವಾಲಯ ಹೇಳಿದೆ.