H1B ದೇಶಿಯ ನವೀಕರಣ- ಡಿಸೆಂಬರ್‌ನಲ್ಲಿ ಅಮೆರಿಕ ಚಾಲನೆ

Team Udayavani, Nov 29, 2023, 11:28 PM IST

ವಾಷಿಂಗ್ಟನ್‌: ಉದ್ಯೋಗ ವೀಸಾ ಎಚ್‌1ಬಿಯ ದೇಶಿಯ ನವೀಕರಣಕ್ಕೆ ಸಂಬಂಧಿಸಿದಂತೆ ಅಮೆರಿಕವು ಡಿಸೆಂಬರ್‌ನಲ್ಲಿ ಹೊಸ ಯೋಜನೆಯನ್ನು ಆರಂಭಿಸಲಿದೆ. ಇದರಿಂದ ಅಮೆರಿಕದಲ್ಲಿ ಗಣನೀಯ ಸಂಖ್ಯೆಯಲ್ಲಿರುವ ಭಾರತೀಯ ತಂತ್ರಜ್ಞಾನ ವೃತ್ತಿಪರರಿಗೆ ನೆರವಾಗಲಿದೆ ಎಂದು ಅಮೆರಿಕದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರು ಅಮೆರಿಕಗೆ ಭೇಟಿ ನೀಡಿದ್ದ ವೇಳೆಯೇ ಬೈಡನ್‌ ಸರ್ಕಾರ ಈ ಯೋಜನೆಯನ್ನು ಘೋಷಿಸಿತ್ತು.

ವೀಸಾ ಸೇವೆಗಳ ಉಪಸಹಾಯಕ ಕಾರ್ಯದರ್ಶಿ ಜ್ಯೂಲಿ ಸ್ಟಫ್ಟ್ ಈ ಕುರಿತು ಸಂದರ್ಶನವೊಂದರಲ್ಲಿ ಮಾಹಿತಿ ನೀಡಿದ್ದಾರೆ. ಈ ವೇಳೆ ಭಾರತದಲ್ಲಿ ಅಮೆರಿಕದ ಉದ್ಯೋಗ ವೀಸಾಗಳಿಗೆ ಭಾರೀ ಬೇಡಿಕೆ ಇದೆ. ಅರ್ಜಿದಾರರು ತಮ್ಮ ಸ್ಲಾಟ್‌ಗಳಿಗಾಗಿ 6,8,12 ತಿಂಗಳುಗಳ ವರೆಗೆ ಕಾಯಬೇಕಾದ ಪರಿಸ್ಥಿತಿ ಇದೆ. ಹೊಸದಾಗಿ ಅರ್ಜಿ ಸಲ್ಲಿಸುವವರಿಗೆ ಮಾತ್ರವಲ್ಲದೇ, ನವೀಕರಣಕ್ಕೆ ಅರ್ಜಿ ಸಲ್ಲಿಸುವವರದ್ದು ಇದೇ ಪಾಡಾಗಿದೆ. ಈ ಹಿನ್ನೆಲೆಯಲ್ಲಿ ಭಾರತೀಯ ವೃತ್ತಿಪರರಿಗೆ, ವಲಸಿಗರಿಗೆ ಸಹಾಯವಾಗುವ ನಿಟ್ಟಿನಲ್ಲಿ ಅತ್ಯಂತ ವೇಗದಲ್ಲಿ ವೀಸಾ ನವೀಕರಣಕ್ಕೆ ಅನುವು ಮಾಡಿಕೊಡಲು ದೇಶಿಯವಾಗಿಯೇ ವೀಸಾ ನವೀಕರಣಗೊಳಿಸುವ ಬಗ್ಗೆ ಚಿಂತನೆ ನಡೆಸಲಾಗಿದೆ. ಅದರ ಭಾಗವಾಗಿಯೇ ಡಿಸೆಂಬರ್‌ನಲ್ಲಿ ಪ್ರಾಯೋಗಿಕ ಕಾರ್ಯಕ್ರಮ ನಡೆಯಲಿದೆ ಎಂದಿದ್ದಾರೆ.

ಏನಿದು ಯೋಜನೆ ?
ಭಾರತೀಯ ವೃತ್ತಿಪರರು ಭಾರತಕ್ಕೆ ಬಂದು ಅರ್ಜಿ ಸಲ್ಲಿಸಿ ವೀಸಾ ನವೀಕರಣಕ್ಕೆ ಕಾಯುವ ಬದಲು ಅಮೆರಿಕದಲ್ಲೇ ಅಲ್ಲಿನ ವಿದೇಶಾಂಗ ಸಚಿವಾಲಯ ವೀಸಾಗಳ ನವೀಕರಣವನ್ನು ನಡೆಸಲಿದೆ. ಇದಕ್ಕಾಗಿ ಡಿಸೆಂಬರ್‌ನಿಂದ 3 ತಿಂಗಳಿನವರೆಗೆ ಅಭಿಯಾನ ನಡೆಯಲಿದೆ. ಈ ವೇಳೆ ಒಟ್ಟು 20,000 ವಿದೇಶಿಗಳಿಗೆ ವೀಸಾ ನೀಡಲು ಯೋಜಿಸಲಾಗಿದೆ ಎಂದು ಜ್ಯೂಲಿ ತಿಳಿಸಿದ್ದಾರೆ.