Uttarkashi: ಡ್ರಿಲ್ಲಿಂಗ್‌ ಸ್ಥಗಿತ- ಸುರಂಗ ಕಾರ್ಯಾಚರಣೆ ವಿಳಂಬc

Team Udayavani, Nov 24, 2023, 11:39 PM IST

ಉತ್ತರಕಾಶಿ: ಉತ್ತರಾಖಂಡದ ಸಿಲ್ಕ್ ಯಾರಾ ಸುರಂಗದಲ್ಲಿ ಸಿಲುಕಿರುವ 41 ಕಾರ್ಮಿಕರನ್ನು ರಕ್ಷಿಸುವ ಕಾರ್ಯ ಮತ್ತಷ್ಟು ವಿಳಂಬವಾಗಿದೆ. ಪದೇ ಪದೆ ಡ್ರಿಲ್ಲಿಂಗ್‌ ಯಂತ್ರ ಕೈಕೊಡುತ್ತಿರುವುದೇ ಇದಕ್ಕೆ ಕಾರಣ. ಗುರುವಾರ ರಾತ್ರಿ ಆಗರ್‌ ಯಂತ್ರವು ದುರಸ್ತಿಗೀಡಾದ ಕಾರಣ, ಕೊರೆಯುವ ಪ್ರಕ್ರಿಯೆ ಸ್ಥಗಿತಗೊಳಿಸಲಾಗಿತ್ತು. ಶುಕ್ರವಾರ ಸಂಜೆ ವೇಳೆಗೆ ಯಂತ್ರ ದಲ್ಲಿದ್ದ ತಾಂತ್ರಿಕ ದೋಷ ಸರಿಪಡಿಸಿ ಇನ್ನೇನು ಡ್ರಿಲ್ಲಿಂಗ್‌ ಆರಂಭಿಸಬೇಕು ಎನ್ನುವಷ್ಟರಲ್ಲಿ ಮತ್ತೆ ಸಮಸ್ಯೆ ತಲೆದೋರಿದ ಕಾರಣ, ಪ್ರಕ್ರಿಯೆ ಸ್ಥಗಿತಗೊಳಿಸಲಾಗಿದೆ.

ಕಾರ್ಮಿಕರನ್ನು ತಲುಪಲು ಇನ್ನು 12 ಮೀ. ಕೊರೆಯಲು ಬಾಕಿಯಿದೆ. ಆಗರ್‌ ಯಂತ್ರ ಸರಿಯಾಗಿ ಕಾರ್ಯ ನಿರ್ವಹಿಸಿದರೆ ಗಂಟೆಗೆ 4-5 ಮೀ. ಕೊರೆಯುತ್ತದೆ. ಒಮ್ಮೆ ಪೂರ್ತಿ ಡ್ರಿಲ್ಲಿಂಗ್‌ ಮುಗಿದು, ಸ್ಟೀಲ್‌ ಪೈಪ್‌ ಅನ್ನು ತೂರಿಸುವ ಕೆಲಸ ಪೂರ್ಣಗೊಂಡರೆ, ಕಾರ್ಮಿಕರನ್ನು ಹೊರಕರೆತರಲು ಸಾಧ್ಯವಾಗುತ್ತದೆ ಎಂದು ಎನ್‌ಡಿಆರ್‌ಎಫ್ ಹೇಳಿದೆ. ಇದೇ ವೇಳೆ ಗಾಲಿಗಳಿರುವ ಸ್ಟ್ರೆಚರ್‌ಗೆ ಹಗ್ಗ ಕಟ್ಟಿ ಕಾರ್ಮಿಕರನ್ನು ಹೇಗೆ ಹೊರಗೆ ಎಳೆಯಲಾಗುತ್ತದೆ ಎಂಬ ರಿಹರ್ಸಲ್‌ ಕೂಡ ಶುಕ್ರವಾರ ನಡೆದಿದೆ.