ಟ್ವಿಟರ್‌ ಮುಖ್ಯ ಕಚೇರಿ ನಿರಾಶ್ರಿತರ ತಾಣವಾಗಲಿ ಎಂದು ಟ್ವೀಟ್ ಮಾಡಿದ್ದ ಎಲಾನ್‌ ಮಸ್ಕ್

Team Udayavani, Apr 12, 2022, 7:45 AM IST

ವಾಷಿಂಗ್ಟನ್‌: ಉದ್ಯಮಿ ಎಲಾನ್‌ ಮಸ್ಕ್ ಟ್ವಿಟರ್‌ ಸಂಸ್ಥೆಯ ಶೇ. 9 ಷೇರು ಖರೀದಿ ಮಾಡಿದ ಬೆನ್ನಲ್ಲೇ ಸಂಸ್ಥೆಯಲ್ಲಿ ತರಬೇಕಾದ ಅನೇಕ ಬದಲಾವಣೆಗಳ ಬಗ್ಗೆ ಟ್ವೀಟ್‌ ಮಾಡಿದ್ದಾರೆ.

“ಟ್ವಿಟರ್‌ನ ಪ್ರಧಾನ ಕಚೇರಿಯಲ್ಲಿ ಯಾರೂ ಕೆಲಸ ಮಾಡುವುದಿಲ್ಲ. ಹಾಗಾಗಿ ಅದನ್ನು ಹಾಗೆಯೇ ಬಿಡುವ ಬದಲು ನಿರಾಶ್ರಿತರ ಕೇಂದ್ರ ಮಾಡಬಹುದು’ ಎಂದು ಬರೆದುಕೊಂಡಿದ್ದಾರೆ.

ಇದಕ್ಕೆ ಅಮೆಜಾನ್‌ ಮುಖ್ಯಸ್ಥ ಜೆಫ್ ಬೆಜೋಸ್‌ ಕೂಡ ಪ್ರತಿಕ್ರಿಯಿಸಿ, “ಇದು ಉತ್ತಮ ಉಪಾಯ. ಅರ್ಧ ಭಾಗವನ್ನು ವಾಸಕ್ಕೆ ಯೋಗ್ಯ ಮಾಡಿಕೊಟ್ಟರೆ ಸಿಬಂದಿಗೂ ಸಹಾಯವಾಗುತ್ತದೆ’ ಎಂದಿದ್ದಾರೆ. ಇದಾದ ಕೆಲವೇ ಕ್ಷಣಗಳಲ್ಲಿ ಮಸ್ಕ್ ತಮ್ಮ ಟ್ವೀಟ್‌ ಡಿಲೀಟ್‌ ಮಾಡಿದ್ದಾರೆ.

ಮಂಡಳಿಯಲ್ಲಿ ಮಸ್ಕ್ ಗಿಲ್ಲಾ ಸ್ಥಾನ: ಇನ್ನೊಂದೆಡೆ, ಮಸ್ಕ್ ಅವರನ್ನು ಟ್ವಿಟರ್‌ ಸಂಸ್ಥೆಯ ನಿರ್ದೇಶಕರ ಮಂಡಳಿಗೆ ಸೇರಿಸಿ ಕೊಂಡಿದ್ದಾಗಿ ವರದಿಯಾಗಿತ್ತು. ಆದರೆ ಟ್ವಿಟರ್‌ ನಿರ್ದೇಶಕರ ಮಂಡಳಿಗೆ ಮಸ್ಕ್ ಸೇರಿಕೊಂಡಿಲ್ಲ ಎಂದು ಟ್ವಿಟರ್‌ ಸಿಇಒ ಪರಾಗ್‌ ಅಗರ್ವಾಲ್‌ ತಿಳಿಸಿದ್ದಾರೆ. ಎ. 9ರಂದು ಅವರು ನಿರ್ದೇ ಶಕರಾಗಿ ಅಧಿಕಾರ ಸ್ವೀಕರಿಸಬೇಕಿತ್ತು. ಆದರೆ ಅದರ ಹಿಂದಿನ ದಿನವೇ ಅವರು ಆ ಸ್ಥಾನ ವಹಿಸಿಕೊಳ್ಳುವುದಿಲ್ಲ ಎಂದು ತಿಳಿಸಿದ್ದಾರೆ ಎಂದು ಅಗರ್ವಾಲ್‌ ಮಾಹಿತಿ ನೀಡಿದ್ದಾರೆ.