Car crash: ಇನ್ನು ನಮ್ಮಲ್ಲಿಯೇ ಕಾರ್‌ ಕ್ರ್ಯಾಶ್‌ ಟೆಸ್ಟ್‌- ಅ.1ರಿಂದ ನೂತನ ವ್ಯವಸ್ಥೆ ಜಾರಿ

Team Udayavani, Aug 22, 2023, 11:35 PM IST

ಹೊಸದಿಲ್ಲಿ: ರಸ್ತೆ ಸುರಕ್ಷತೆಗೆ ಸಂಬಂಧಿಸಿದಂತೆ ಭಾರತ ಹೊಸ ಮೈಲಿಗಲ್ಲು ಸಾಧಿಸಿದೆ. ಕಾರುಗಳ ಸುರಕ್ಷತೆಯನ್ನು ಅಳೆಯುವ ಸ್ವಂತ ನ್ಯೂ ಕಾರ್‌ ಅಸೆಸ್‌ಮೆಂಟ್‌ ಪ್ರೋಗ್ರಾಂ(ಎನ್‌ಸಿಎಪಿ)ಗೆ ಕೇಂದ್ರ ಹೆದ್ದಾರಿ ಮತ್ತು ಸಾರಿಗೆ ಸಚಿವ ನಿತಿನ್‌ ಗಡ್ಕರಿ ಮಂಗಳವಾರ ಚಾಲನೆ ನೀಡಿದ್ದಾರೆ. ಈ ಮೂಲಕ ಈ ಸೌಲಭ್ಯ ಹೊಂದಿರುವ ವಿಶ್ವದ ಐದನೇ ರಾಷ್ಟ್ರವಾಗಿ ಭಾರತ ಹೊಮ್ಮಿದೆ. ಈಗಾಗಲೇ ಜಪಾನ್‌, ಅಮೆರಿಕ, ಆಸ್ಟ್ರೇಲಿಯಾ ಮತ್ತು ಲ್ಯಾಟಿನ್‌ ಅಮೆರಿಕಗಳಲ್ಲಿ ಈ ವ್ಯವಸ್ಥೆ ಇದೆ.

ಬಿಎನ್‌ಸಿಎಪಿ ರೇಟಿಂಗ್‌: ಭಾರತದಲ್ಲಿ ಆರಂಭಿಸಿರುವ ಎನ್‌ಸಿಎಪಿಗೆ ಭಾರತ್‌ ನ್ಯೂ ಕಾರ್‌ ಅಸೆಸೆ¾ಂಟ್‌ ಪ್ರೋಗ್ರಾಂ(ಬಿಎನ್‌ಸಿಎಪಿ) ಎಂದು ನಾಮಕರಣ ಮಾಡಲಾ­ಗಿದೆ. ಅ.1ರಿಂದ ಕಾರ್ಯಚಟುವಟಿಕೆ ಆರಂಭವಾಗಲಿದೆ. ವಾಹನದ ಸುರಕ್ಷತೆಯ ಕುರಿತು ಇದು ರೇಟಿಂಗ್‌ ನೀಡಲಿದೆ.

ಸುರಕ್ಷತೆಯ ಪರೀಕ್ಷೆ
ಇದು ಗರಿಷ್ಠ ಎಂಟು ಪ್ರಯಾಣಿಕರು ಕುಳಿತುಕೊಳ್ಳಬಹುದಾದ ಅಥವಾ ಗರಿಷ್ಠ 3.5 ಟನ್‌ ತೂಕದ ಕಾರುಗಳ ಸುರಕ್ಷತೆಯ ಸಾಮರ್ಥ್ಯವನ್ನು ಅಳೆಯಲಿದೆ. ಜಪಾನ್‌, ಅಮೆರಿಕದಂತಹ ಗುಣಮಟ್ಟದ ಶ್ರೇಣಿಯಲ್ಲಿಯೇ ಭಾರತದ ರಸ್ತೆ ಸುರಕ್ಷತೆಯನ್ನು ಗಮನದಲ್ಲಿರಿಸಿಕೊಂಡು ಬಿಎನ್‌ಸಿಎಪಿ ಜಾರಿಗೆ ತರಲಾಗಿದೆ.

ಹೇಗೆ ಮಾಪನ?
ಕಾರುಗಳನ್ನು ಮಾರುಕಟ್ಟೆಗೆ ಪರಿಚಯಿಸುವ ಮುನ್ನ ಕಾರಿನ ಪ್ರಂಟಲ್‌ ಇಂಪ್ಯಾಕ್ಟ್ ಟೆಸ್ಟ್‌, ಸೈಡ್‌ ಇಂಪ್ಯಾಕ್ಟ್ ಟೆಸ್ಟ್‌ ಮತ್ತು ಪೋಲ್‌ ಸೈಡ್‌ ಇಂಪ್ಯಾಕ್ಟ್ ಟೆಸ್ಟ್‌ ನಡೆಸಲಾಗುತ್ತದೆ. ಅಂದರೆ ಕಾರಿನ ಮುಂಭಾಗ, ಬದಿ ಮತ್ತು ಹಿಂಭಾಗ ಢಿಕ್ಕಿ ಹೊಡೆಸಿ, ಪರೀಕ್ಷೆ ನಡೆಸಲಾಗುತ್ತದೆ. ಅನಂತರ ದಕ್ಷತೆ ಆಧಾರದ ಮೇಲೆ ರೇಟಿಂಗ್‌ ನೀಡಲಾಗುತ್ತದೆ. ಗರಿಷ್ಠ 5 ಸ್ಟಾರ್‌ಗಳವರೆಗೆ ಬಿಎನ್‌ಸಿಎಪಿ ರೇಟಿಂಗ್‌ ನೀಡಲಿದೆ. ಈ ಸುರಕ್ಷತಾ ರೇಟಿಂಗ್‌ ಗಮನಿಸಿ ಗ್ರಾಹಕರು ಕಾರುಗಳನ್ನು ಖರೀದಿಸುತ್ತಾರೆ.