Google: ನಟಿ ಶ್ರೀದೇವಿಗೆ ಗೂಗಲ್‌ ಡೂಡಲ್‌ ಗೌರವ

Team Udayavani, Aug 13, 2023, 7:30 PM IST

ಮುಂಬೈ: ಭಾರತೀಯ ಸಿನಿರಂಗದ ದಂತಕಥೆ, ಖ್ಯಾತ ನಟಿ ಶ್ರೀದೇವಿ ಅವರ 60ನೇ ಜನ್ಮದಿನೋತ್ಸವಕ್ಕೆ ಗೂಗಲ್‌ ಸಂಸ್ಥೆಯು ತನ್ನ ಡೂಡಲ್‌ ಮೂಲಕ ವಿಶಿಷ್ಟ ರೀತಿಯಲ್ಲಿ ಶುಭಕೋರಿದೆ.

4 ದಶಕಗಳ ಕಾಲ 300ಕ್ಕೂ ಅಧಿಕ ಸಿನಿಮಾಗಳಲ್ಲಿನ ಅಮೋಘ ಅಭಿನಯ ಹಾಗೂ ತಮ್ಮ ಸೌಂದರ್ಯದ ಮೂಲಕವೇ ಸಿನಿರಸಿಕರ ಮನಗೆದ್ದಿದ್ದ ಶ್ರೀದೇವಿ ಅವರ ಚಿತ್ರವನ್ನು ಅತ್ಯದ್ಭುತವಾಗಿ ಗೂಗಲ್‌ ತನ್ನ ಡೂಡಲ್‌ ಆ್ಯನಿಮೇಷನ್‌ನಲ್ಲಿ ಪ್ರದರ್ಶಿಸಿದೆ. ಶ್ರೀದೇವಿ ಅವರ ಸೌಂದರ್ಯಕ್ಕೆ ಸರಿಹೊಂದುವಂಥ ಈ ಚಿತ್ರವನ್ನು ಮುಂಬೈ ಮೂಲದ ಕಲಾವಿದೆ ಭೂಮಿಕಾ ಮುಖರ್ಜಿ ರಚಿಸಿದ್ದಾರೆ.

ಜನ್ಮದಿನದ ಅಂಗವಾಗಿ ಗೂಗಲ್‌ ಸಮರ್ಪಿಸಿರುವ ಈ ಡೂಡಲ್‌ ಶ್ರೀದೇವಿ ಅವರು ಕೈತುಂಬಾ ಬಳೆಗಳನ್ನು ಧರಿಸಿಕೊಂಡಿರುವಂತೆ ರಚಿಸಲಾಗಿದೆ. ಶ್ರೀದೇವಿ ಅವರು ಇಹಲೋಕ ತ್ಯಜಿಸಿ ಸುಮಾರು 5 ವರ್ಷ ಸಂದಿದ್ದರೂ ಗೂಗಲ್‌ ಅವರಿಗೆ ಸಮರ್ಪಿಸಿರುವ ಡೂಡಲ್‌ ಸಿನಿಪ್ರಿಯರಿಗೆ ಅವರ ಚಿತ್ರಗಳನ್ನು ನೆನಪಿಸುವಂತೆ ಮಾಡಿದೆ.