ಸ್ಮರಣಿಕೆಗಳ ಹರಾಜಿನಲ್ಲಿ ಭಾಗವಹಿಸುವಂತೆ ಜನರಿಗೆ ಪ್ರಧಾನಿ ನರೇಂದ್ರ ಮೋದಿ ಕರೆ

Team Udayavani, Sep 19, 2021, 7:50 PM IST

ನವದೆಹಲಿ:ಪ್ರಧಾನಿ ನರೇಂದ್ರ ಮೋದಿಯವರಿಗೆ ಕಳೆದ ಒಂದು ವರ್ಷದ ಅವಧಿಯಲ್ಲಿ ಬಂದಿರುವ ಸ್ಮರಣಿಕೆ ಮತ್ತು ಉಡುಗೊರೆಗಳ ಹರಾಜು ಪ್ರಕ್ರಿಯೆ ನಡೆಯುತ್ತಿದ್ದು, ಅದರಲ್ಲಿ ಭಾಗವಹಿಸಿ ಎಂದು ಪ್ರಧಾನಿ ಸಾರ್ವಜನಿಕರಿಗೆ ಕರೆ ಕೊಟ್ಟಿದ್ದಾರೆ.

“ನಮ್ಮ ಒಲಿಂಪಿಕ್ಸ್‌ ಮತ್ತು ಪ್ಯಾರಾಲಿಂಪಿಕ್ಸ್‌ ಕ್ರೀಡಾಪಟುಗಳು ನನಗೆ ಕೊಟ್ಟಿರುವ ಉಡುಗೊರೆಯೂ ಇ-ಹರಾಜಿನಲ್ಲಿ ಲಭ್ಯವಿದೆ. ಹರಾಜಿನಲ್ಲಿ ಬಂದ ಹಣವನ್ನು ನಮಾಮಿ ಗಂಗೆ ಯೋಜನೆಗೆ ಬಳಸಿಕೊಳ್ಳಲಾಗುವುದು. ಎಲ್ಲರೂ ಹರಾಜಿನಲ್ಲಿ ಭಾಗವಹಿಸಿ ’ಎಂದು ಪ್ರಧಾನಿ ಮೋದಿ ಭಾನುವಾರ ಕರೆ ನೀಡಿದ್ದಾರೆ.

ಸೆ. 17ರಿಂದ https://pmmementos.gov.in/#/ ವೆಬ್‌ಸೈಟ್‌ನಲ್ಲಿ ಇ-ಹರಾಜು ಆರಂಭವಾಗಿದ್ದು, ಅದು ಅ.7ರವರೆಗೆ ಮುಂದುವರಿಯಲಿದೆ.

ಇದನ್ನೂ ಓದಿ:ಕಾರು ಖರೀದಿಸಿ ತರುತ್ತಿದ್ದ ವೇಳೆ ಅಗ್ನಿ ಅವಘಡ : ಕಣ್ಣೆದುರೇ ಹೊತ್ತಿ ಉರಿದ ಕಾರು

10 ಕೋಟಿ ರೂ. ಪಟ್ಟಿಯಲ್ಲಿ 12 ವಸ್ತು
ಇ-ಹರಾಜು ಆರಂಭವಾಗಿ ಮೂರೇ ದಿನಗಳಲ್ಲಿ ಕೆಲವು ಸ್ಮರಣಿಕೆ/ಉಡುಗೊರೆಗಳ ಬೆಲೆ 10 ಕೋಟಿ ರೂಪಾಯಿ ತಲುಪಿದೆ. ನೀರಜ್‌ ಚೋಪ್ರಾ ಅವರ ಜಾವೆಲಿನ್‌, ಪಿವಿ ಸಿಂಧು ಅವರ ರಾಕೆಟ್‌, ಭವೀನಾ ಪಟೇಲ್‌ ಅವರ ಟೀ ಶರ್ಟ್‌, ಒಲಿಂಪಿಕ್ಸ್‌ ತಾರೆಗಳು ಆಟೋಗ್ರಾಫ್ ಹಾಕಿರುವ ಶಾಲು ಸೇರಿ ಒಟ್ಟು 12 ವಸ್ತುಗಳ ಬೆಲೆ 10 ಕೋಟಿ ರೂಪಾಯಿಗೆ ತಲುಪಿದೆ. ವಿಶೇಷವೆಂದರೆ ಈ ಎಲ್ಲ ವಸ್ತುಗಳು ಒಲಿಂಪಿಕ್ಸ್‌ ಮತ್ತು ಪ್ಯಾರಾಲಿಂಪಿಕ್ಸ್‌ ಕ್ರೀಡಾಪಟುಗಳಿಗೆ ಸಂಬಂಧಿಸಿರುವುದೇ ಆಗಿವೆ.