ಹಿಂದಿ ರಾಷ್ಟ್ರೀಯ ಭಾಷೆ: ಸುಪ್ರೀಂ!

Team Udayavani, Aug 4, 2023, 11:57 PM IST

ಹೊಸದಿಲ್ಲಿ: ಅಪಘಾತ ಪ್ರಕರಣವೊಂದರ ಆರೋಪಿಯೊಬ್ಬರು ಭಾಷಾ ಸಮಸ್ಯೆ ಹಿನ್ನೆಲೆ ಪ್ರಕರಣವನ್ನು ಉತ್ತರ ಪ್ರದೇಶದ ಫ‌ರೂಕಾಬಾದ್‌ನಿಂದ ಪಶ್ಚಿಮ ಬಂಗಾಲದ ನ್ಯಾಯಾಲಯಕ್ಕೆ ವರ್ಗಾಯಿಸುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ಸುಪ್ರೀಂ ಕೋರ್ಟ್‌ ಶುಕ್ರವಾರ ವಜಾಗೊಳಿಸಿದ್ದು, ಹಿಂದಿ ರಾಷ್ಟ್ರ ಭಾಷೆ ಎಂದಿದೆ. ಪ. ಬಂಗಾಲದ ಸಿಲಿಗುರಿಯಲ್ಲಿ ಅಪಘಾತ ನಡೆದಿದ್ದು, ಆರೋಪಿ ಅಲ್ಲಿಯವರಾದರೆ, ಸಂತ್ರಸ್ತರು ಉತ್ತರ ಪ್ರದೇಶದವರು. ಹೀಗಾಗಿ ಪ್ರಕರಣ ಉತ್ತರ ಪ್ರದೇಶದ ನ್ಯಾಯಾಲಯದಲ್ಲಿತ್ತು.

ಆದರೆ ಆರೋಪಿ ಪರ ಸಾಕ್ಷ್ಯಗಳನ್ನು ಪ್ರಸ್ತುತ ಪಡಿಸುವಾಗ ಅವರಿಗೆ ಹಿಂದಿ ಬಾರದೇ ಸಮಸ್ಯೆಯಾಗಿದ್ದ ಕಾರಣ, ಪ್ರಕರಣವನ್ನು ವರ್ಗಾಯಿಸುವಂತೆ ಕೇಳಲಾಗಿತ್ತು. ನ್ಯಾಯಮೂರ್ತಿ ದೀಪಂಕರ್‌ ದತ್‌ ಅವರ ನ್ಯಾಯಪೀಠವು ಈ ಅರ್ಜಿ ಆಲಿಸಿ, ದೇಶದಲ್ಲಿ 22 ಅಧಿಕೃತ ಭಾಷೆಗಳಿವೆ. ಆದರೆ, ಹಿಂದಿ ರಾಷ್ಟ್ರ ಭಾಷೆಯಾಗಿರುವ ಕಾರಣ ಸಾಕ್ಷಿಗಳು ತಮ್ಮ ವಾದವನ್ನು ಹಿಂದಿ ಭಾಷೆಯಲ್ಲೇ ಮಂಡಿಸಬೇಕು ಎಂದಿದ್ದಾರೆ.