ಭಾರತ-ಚೀನಾ ಗಡಿ ಕಾಯಲು ಹೊರಟ ವನಿತೆಯರು

ಇದೇ ಮೊದಲ ಬಾರಿಗೆ ಐಟಿಬಿಪಿಗೆ ಮಹಿಳಾ ಅಧಿಕಾರಿಗಳ ಸೇರ್ಪಡೆ

Team Udayavani, Aug 8, 2021, 9:30 PM IST

ನವದೆಹಲಿ: ಭಾರತ-ಚೀನಾ ಗಡಿ (ಎಲ್‌ಎಸಿ) ಕಾವಲು ಕಾಯುವ ಇಂಡೋ-ಟಿಬೆಟಿಯನ್‌ ಗಡಿ ಪೊಲೀಸ್‌ ಪಡೆ(ಐಟಿಬಿಪಿ)ಯು ಇದೇ ಮೊದಲ ಬಾರಿಗೆ ತನ್ನ ಯುದ್ಧ ಸಂಬಂಧಿ ಘಟಕಕ್ಕೆ ಇಬ್ಬರು ಮಹಿಳಾ ಅಧಿಕಾರಿಗಳನ್ನು ಸೇರ್ಪಡೆ ಮಾಡಿದೆ.

ಐಟಿಬಿಪಿ ಅಧಿಕಾರಿಗಳ ತರಬೇತಿ ಅಕಾಡೆಮಿಯಿಂದ ಉತ್ತೀರ್ಣರಾದ 53 ಸಿಬ್ಬಂದಿಗೆ ಭಾನುವಾರ ಪ್ರಮಾಣ ವಚನ ಬೋಧಿಸಲಾಯಿತು. ಪ್ರಕೃತಿ ಹಾಗೂ ದೀಕ್ಷಾ ಹೆಸರಿನ ಇಬ್ಬರು ಮಹಿಳೆಯರು ಕೂಡ ತರಬೇತಿಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದು, ಪ್ರಮಾಣ ವಚನ ಸ್ವೀಕ ರಿಸಿದ್ದಾರೆ. ಅವರಿಬ್ಬರನ್ನು ಅರೆ ಸೇನಾಪಡೆಯ ಪ್ರವೇಶ ಮಟ್ಟದ ಹುದ್ದೆಯಾದ ಸಹಾಯಕ ಕಮಾಂಡೆಂಟ್‌ ಹುದ್ದೆಗೆ ನೇಮಿಸಿಕೊಳ್ಳಲಾಗಿದೆ.

ಎಲೆಕ್ಟ್ರಿಕಲ್‌ ಇಂಜಿನಿಯರಿಂಗ್‌ ನಲ್ಲಿ ಪದವಿ ಹೊಂದಿರುವ ಪ್ರಕೃತಿಯ ತಂದೆ ಭಾರತೀಯ ವಾಯುಪಡೆಯ ನಿವೃತ್ತ ಅಧಿಕಾರಿ ಇನ್ನು ದೀಕ್ಷಾ ಅವರ ತಂದೆ ಕಮಲೇಶ್‌ ಕುಮಾರ್‌ ಐಟಿಬಿಪಿಯಲ್ಲಿ ಅಧಿಕಾರಿಯಾಗಿದ್ದಾರೆ. ಪ್ರಮಾಣವಚನ ಕಾರ್ಯಕ್ರಮದ ನಂತರ ಸಮವಸ್ತ್ರದಲ್ಲಿದ್ದ ತಂದೆ ಮಗಳಿಬ್ಬರು ಪರಸ್ಪರ ಸೆಲ್ಯೂಟ್‌ ಹೊಡೆದು, ಆಲಿಂಗಿಸಿಕೊಂಡಿದ್ದಾರೆ.

ಐಟಿಬಿಪಿ 2016ರಿಂದ ಮಹಿಳಾ ಸಿಬ್ಬಂದಿಯನ್ನು ಪಡೆಗೆ ನೇಮಿಸಿಕೊಳ್ಳುತ್ತಿದೆ. ಯುಪಿಎಸ್‌ಸಿ ನಡೆಸುವ ಪರೀಕ್ಷೆಯಲ್ಲಿ ತೇರ್ಗಡೆ ಹೊಂದಿದವ ರಿಗೆ ಮುಂದಿನ ಹಂತದ ನೇಮಕಾತಿ ಪ್ರಕ್ರಿಯೆ ಇರುತ್ತದೆ. ಈವರೆಗೆ ಸ್ಥಿರ ಶ್ರೇಣಿ (ಕಾನ್‌ಸ್ಟೆಬುಲರಿ ರ್‍ಯಾಂಕ್‌) ಹುದ್ದೆಗಳಿಗೆ ಮಾತ್ರ ಮಹಿಳೆಯ ರನ್ನು ನೇಮಕ ಮಾಡಿಕೊಳ್ಳಲಾಗುತ್ತಿತ್ತು. ಆದರೆ ಇದೇ ಮೊದಲ ಬಾರಿಗೆ, ಯುದ್ಧಕ್ಕೆ ಸಂಬಂಧಿಸಿದ ಕಾರ್ಯಾಚರಣೆಗಳಲ್ಲೂ ಮಹಿಳೆಯರು ಸಕ್ರಿಯರಾಗಿ ಭಾಗವಹಿಸಲಿದ್ದಾರೆ.