ಆರ್‌ಸಿಬಿ ವಿಜಯ ಗೀತೆಯಲ್ಲಿ ಅಪ್ಪು ಹಾಡುಗಳ ಸರಮಾಲೆ!

Team Udayavani, Apr 9, 2022, 8:25 AM IST

ಕರ್ನಾಟಕದ ಕ್ರಿಕೆಟಿಗರ ಕೊರತೆಯಿದ್ದರೂ ಕನ್ನಡಿಗರ ನೆಚ್ಚಿನ ಫ್ರಾಂಚೈಸಿಯಾ ಗಿರುವ ರಾಯಲ್‌ ಚಾಲೆಂಜರ್ ಬೆಂಗಳೂರು ತಂಡದ ಡ್ರೆಸ್ಸಿಂಗ್‌ ರೂಮ್‌ ಸಂಭ್ರಮ ಎಲ್ಲ ತಂಡಗಳಿಗೂ ಮಿಗಿಲು. ವಿಜಯ ಗೀತೆ, ಧ್ಯೇಯ ಗೀತೆ… ಹೀಗೆ ಏನಾದರೊಂದು ಹೊಸತನವನ್ನು ಇಲ್ಲಿ ಕಾಣಬಹುದು.

ಕಳೆದ ಯುಗಾದಿಗೆ ಆಟಗಾರರೆಲ್ಲ ಶುಭ ಹಾರೈಸಿದ ವೀಡಿಯೋ ವೈರಲ್‌ ಆಗಿತ್ತು. ಇದೀಗ “ಅಪ್ಪು’ ಪುನೀತ್‌ ರಾಜ್‌ಕುಮಾರ್‌ ಅವರ ಗೀತೆಗಳ ಸರಮಾಲೆಯೊಂದು ಆರ್‌ಸಿಬಿ ಪಾಳೆಯದಿಂದ ಕೇಳಿಬಂದಿದೆ!

ಮೊನ್ನೆ ರಾಜಸ್ಥಾನ್‌ ರಾಯಲ್ಸ್‌ ವಿರುದ್ಧ ಗೆಲುವು ಸಾಧಿಸಿದ ಬೆನ್ನಲ್ಲೇ ಆರ್‌ಸಿಬಿ ಆಟಗಾರರೆಲ್ಲ ಸೇರಿ “ವಿಜಯ ಗೀತೆ’ ಹಾಡಿ ಸಂಭ್ರಮಿಸಿದ್ದರು. “”ದ ಪ್ಯಾಂಟ್ಸ್‌ ಆರ್‌ ರೆಡ್‌… ದ ಶರ್ಟ್‌ ಈಸ್‌ ಬ್ಲೂ… ದ ಗೋಲ್ಡನ್‌ ಲಯನ್‌ ಶೈನಿಂಗ್‌ ತ್ರೂ .. ವಿ ಆರ್‌ ಆರ್‌ಸಿಬಿ…” ಎಂದು ಈ ಗೀತೆ ಸಾಗುತ್ತದೆ.
ಇದರ ವೀಡಿಯೋ ಬಿಡುಗಡೆಗೊಂಡ ಬೆನ್ನಲ್ಲೇ ಇದನ್ನು ಪುನೀತ್‌ ರಾಜ್‌ಕುಮಾರ್‌ ಚಿತ್ರಗಳ ಆಯ್ದ ಗೀತೆಗಳನ್ನು ಸೇರಿಸಿ ಎಡಿಟ್‌ ಮಾಡಲಾಗಿದೆ. ಮೂಲ ವಿಜಯಗೀತೆಯನ್ನೂ ಮೀರಿಸಿ ಜನಪ್ರಿಯಗೊಂಡಿರುವ ಈ ವೀಡಿಯೋ ಭಾರೀ ಸದ್ದು ಮಾಡುತ್ತಿದೆ.

ಪುನೀತ್‌ ಅಭಿನಯದ “ಅಭಿ’ ಚಿತ್ರದ “”ಈ ನನ್ನ ಕಣ್ಣಾಣೆ…” ಗೀತೆಯಿಂದ ಆರಂಭವಾಗುವ ಈ ದೃಶ್ಯಾವಳಿ ಬಳಿಕ “ಅಣ್ಣಾಬಾಂಡ್‌’ ಚಿತ್ರದ, ಹಿಂದೆ “ಚಲಿಸುವ ಮೋಡಗಳು’ ಚಿತ್ರಕ್ಕಾಗಿ ಪುನೀತ್‌ ಅವರೇ ಹಾಡಿರುವ “”ಕಾಣದಂತೆ ಮಾಯವಾದನು…” ಹಾಡಿನೊಂದಿಗೆ ಮುಂದುವರಿಯುತ್ತದೆ. ಆಟಗಾರರೆಲ್ಲರ ಅಭಿನಯವನ್ನು ಕಂಡಾಗ ಇವರೆಲ್ಲ ಪುನೀತ್‌ ಚಿತ್ರದ ಗೀತೆಗಳನ್ನೇ ಹಾಡುತ್ತಿದ್ದಾರೆ ಎಂದೆನಿಸದಿರದು!

ಟೀಮ್‌ ಆರ್‌ಸಿಬಿ ಮೂಲಕವೂ ಅಪ್ಪು ಅಮರರಾಗಿದ್ದಾರೆ ಎನ್ನೋಣ!