Indonesia ಮಾಸ್ಟರ್ ಬ್ಯಾಡ್ಮಿಂಟನ್‌: ಚಿರಾಗ್‌ ಶೆಟ್ಟಿ-ಸಾತ್ವಿಕ್‌ ಸ್ಪರ್ಧೆ ಇಲ್ಲ

Team Udayavani, Jan 22, 2024, 11:07 PM IST

ಜಕಾರ್ತಾ: ಕಳೆದೆರಡೂ ಬ್ಯಾಡ್ಮಿಂಟನ್‌ ಪಂದ್ಯಾವಳಿಗಳಲ್ಲಿ ರನ್ನರ್ ಆಪ್‌ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದ ಚಿರಾಗ್‌ ಶೆಟ್ಟಿ-ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ ಮಂಗಳವಾರ ಆರಂಭವಾಗಲಿರುವ “ಇಂಡೋನೇಷ್ಯಾ ಮಾಸ್ಟರ್ 500” ಟೂರ್ನಿಯಲ್ಲಿ ಆಡದಿರಲು ನಿರ್ಧರಿಸಿದ್ದಾರೆ.

ಬಿಡುವಿಲ್ಲದ ಸ್ಪರ್ಧೆಗಳಿಂದ ಒಂದಿಷ್ಟು ವಿಶ್ರಾಂತಿ ಪಡೆಯುವುದು ಚಿರಾಗ್‌-ಸಾತ್ವಿಕ್‌ ಜೋಡಿಯ ಉದ್ದೇಶವಾಗಿದೆ. ಏಷ್ಯನ್‌ ಗೇಮ್ಸ್‌ ಚಾಂಪಿಯನ್‌ ಆಗಿರುವ ಇವರು “ಮಲೇಷ್ಯಾ ಓಪನ್‌ ಸೂಪರ್‌ 1000” ಮತ್ತು “ಇಂಡಿಯಾ ಓಪನ್‌ ಸೂಪರ್‌ 750” ಪಂದ್ಯಾವಳಿಗಳೆರಡರ ಫೈನಲ್‌ನಲ್ಲೂ ಪರಾಭವಗೊಂಡಿದ್ದರು.

ಚಿರಾಗ್‌-ಸಾತ್ವಿಕ್‌ ಗೈರಲ್ಲಿ ಭಾರತವನ್ನು ಪ್ರತಿನಿಧಿಸಲಿರುವ ಏಕೈಕ ಪುರುಷರ ಜೋಡಿಯೆಂದರೆ ಎಂ.ಆರ್‌. ಅರ್ಜುನ್‌-ಧ್ರುವ ಕಪಿಲ.

ಏಕೈಕ ಶ್ರೇಯಾಂಕಿತ ಆಟಗಾರ
ಎಚ್‌.ಎಸ್‌. ಪ್ರಣಯ್‌ ಪುರುಷರ ಸಿಂಗಲ್ಸ್‌ ವಿಭಾಗದಲ್ಲಿ ಭಾರತದ ಏಕೈಕ ಶ್ರೇಯಾಂಕಿತ ಆಟಗಾರನಾಗಿದ್ದಾರೆ. 7ನೇ ಶ್ರೇಯಾಂಕ ಪಡೆದ ಪ್ರಣಯ್‌ ಅವರ ಮೊದಲ ಸುತ್ತಿನ ಎದುರಾಳಿ ಸಿಂಗಾಪುರದ ಲೋಹ್‌ ಕೀನ್‌ ವ್ಯೂ. ಭಾರತದ ಮತ್ತೋರ್ವ ಭರ ವಸೆಯ ಆಟಗಾರ ಲಕ್ಷ್ಯ ಸೇನ್‌ ಕೂಡ ಇಲ್ಲಿ ಕಣಕ್ಕಿಳಿಯಲಿದ್ದು, ಮೊದಲ ಸುತ್ತಿನ ಕಂಟಕದಿಂದ ಪಾರಾಗುವ ಪ್ರಯತ್ನದಲ್ಲಿದ್ದಾರೆ. ಕಳೆದ ವಾರ “ಇಂಡಿಯಾ ಓಪನ್‌”ನಲ್ಲಿ ತವರಿನ ಪ್ರಿಯಾಂಶು ರಾಜಾವತ್‌ ವಿರುದ್ಧ ಪ್ರಥಮ ಸುತ್ತಿನಲ್ಲಿ ಸೋಲನುಭವಿಸಿದ್ದರು.