Italty: ಗ್ರಾಮಕ್ಕೆ ಬನ್ನಿ-ಮಾಸಿಕ 26 ಲಕ್ಷ ರೂ. ಕೊಡ್ತೇವೆ!- ಯುವಕರಿಗೆ ಗ್ರಾಮಸ್ಥರ ಆಹ್ವಾನ

Team Udayavani, Nov 4, 2023, 9:08 PM IST

ರೋಮ್‌: ಇಟಲಿಯ ಕ್ಯಾಲಿಬ್ರಿಯಾ ಗ್ರಾಮಸ್ಥರು ಯುವಕರಿಗೆ ಅದ್ಭುತ ಆಫ‌ರ್‌ ನೀಡಿದ್ದಾರೆ. ಗ್ರಾಮಕ್ಕೆ ಬಂದು ನೆಲೆಸುವವರಿಗೆ ಮುಂದಿನ ಮೂರು ವರ್ಷಗಳ ಕಾಲ ಪ್ರತಿ ತಿಂಗಳು 26.48 ಲಕ್ಷ ರೂ.(26,000 ಯೂರೋ) ಪಾವತಿಸಲಿದ್ದಾರೆ.

ಆದರೆ ಇದಕ್ಕೆ ಕೆಲವು ನಿಬಂಧನೆಗಳನ್ನು ಗ್ರಾಮದ ಆಡಳಿತ ಹಾಕಿದೆ. ಗ್ರಾಮಕ್ಕೆ ಬಂದು ನೆಲೆಸಲು ಅನುಮತಿ ಕೋರಿ ಅರ್ಜಿಯನ್ನು ಸಲ್ಲಿಸುವವರು 40 ವರ್ಷದೊಳಗಿನವರಾಗಬೇಕು. ಅರ್ಜಿ ಅನುಮೋದನೆಗೊಂಡ 90 ದಿನಗಳಲ್ಲಿ ಕ್ಯಾಲಿಬ್ರಿಯಾಗೆ ಸ್ಥಳಾಂತರವಾಗಲು ಸಿದ್ಧರಿರಬೇಕು. ಇಲ್ಲಿ ಬಂದು ನೂತನ ಉದ್ಯಮವನ್ನು ಆರಂಭಿಸಬೇಕು ಅಥವಾ ಗುರುತಿಸಿರುವ ನಿರ್ದಿಷ್ಟ ವೃತ್ತಿಪರ ಹುದ್ದೆಯನ್ನು ಆಲಂಕರಿಸಬೇಕು. ಕೆಲಸ ಮಾಡಲು ಹಾಗೂ ಸ್ಥಳೀಯ ಆರ್ಥಿಕತೆಗೆ ಕೊಡುಗೆ ನೀಡಲು ಸಿದ್ಧರಿರುವರಿಗೆ ಮೂರು ವರ್ಷಗಳ ಕಾಲ ಪ್ರತಿ ತಿಂಗಳು 26.48 ಲಕ್ಷ ರೂ. ಸಂಭಾವನೆ ನೀಡಲಾಗುತ್ತದೆ ಅಥವಾ ಉದ್ಯಮ ಆರಂಭಿಸಲು ಸಹಾಯಕವಾಗಿ ಒಮ್ಮೆಗೆ ದೊಡ್ಡ ಮೊತ್ತದ ಅನುದಾನ ನೀಡಲಾಗುತ್ತದೆ. ಯುವಕರು ರೆಸ್ಟೋರೆಂಟ್‌, ಅಂಗಡಿಗಳು, ಹೋಟೆಲ್‌ಗ‌ಳು ಸೇರಿದಂತೆ ತಮ್ಮ ಸ್ವಂತ ಉದ್ಯಮವನ್ನು ಆರಂಭಿಸಬಹುದು ಎಂದು ಕ್ಯಾಲಿಬ್ರಿಯಾ ಆಡಳಿತ ತಿಳಿಸಿದೆ.

“ಸ್ಥಳೀಯ ಆರ್ಥಿಕತೆಯನ್ನು ಹೆಚ್ಚಿಸುವುದು ಈ ಯೋಜನೆಯ ಪ್ರಾಥಮಿಕ ಗುರಿಯಾಗಿದೆ. ಇದರಿಂದ ಸಣ್ಣ ಉದ್ಯಮಗಳಿಗೆ ಉತ್ತೇಜನ ಜತೆಗೆ ಯುವಕರಿಗೆ ಸ್ವಂತ ಉದ್ಯೋಗ ಲಭ್ಯವಾಗಲಿದೆ’ ಎಂದು ಈ ಯೋಜನೆಯ ಹಿಂದಿನ ರೂವಾರಿ ಜಿಯಾನೂಕಾ ಗ್ಯಾಲೋ ತಿಳಿಸಿದ್ದಾರೆ. 3,000 ಹಾಗೂ ಅದಕ್ಕಿಂತ ಕಡಿಮೆ ಸಂಖ್ಯೆಯ ನಿವಾಸಿಗಳಿರುವ ಇಟಲಿಯ ಕೆಲವು ಗ್ರಾಮಗಳು ಸಹ ಈ ಯೋಜನೆಯನ್ನು ಅನುಷ್ಠಾನಗೊಳಿಸುತ್ತಿವೆ.