Jacqueline: ಜಾಕ್ವೆಲಿನ್‌ ಹೊರದೇಶಕ್ಕೆ ಹೋಗಬಹುದು: ದೆಹಲಿಯ ನ್ಯಾಯಾಲಯದಿಂದ ರಿಲೀಫ್

Team Udayavani, Aug 16, 2023, 8:49 PM IST

ನವದೆಹಲಿ: ವಂಚಕ ಸುಕೇಶ್‌ ಚಂದ್ರಶೇಖರ್‌ ವಿರುದ್ಧದ 200 ಕೋಟಿ ರೂ. ವಂಚನೆ ಪ್ರಕರಣದಲ್ಲಿ ಆರೋಪಿಯಾಗಿರುವ ನಟಿ ಜಾಕ್ವೆಲಿನ್‌ ಫ‌ರ್ನಾಂಡೀಸ್‌ಗೆ ದೆಹಲಿ ನ್ಯಾಯಾಲಯವೊಂದು ರಿಲೀಫ್ ನೀಡಿದೆ. ಆಕೆಯ ಜಾಮೀನು ಷರತ್ತುಗಳನ್ನು ಸಡಿಲಗೊಳಿಸಿ ಪೂರ್ವಾನುಮತಿ ಇಲ್ಲದೆಯೂ ವಿದೇಶಗಳಿಗೆ ಪ್ರಯಾಣಿಸಲು ಅನುಮತಿ ನೀಡಿದೆ.

ವಿಶೇಷ ನ್ಯಾಯಾಧೀಶ ಶೈಲೇಂದ್ರ ಮಲ್ಲಿಕ್‌ ಅವರ ನ್ಯಾಯಪೀಠವು ಕಳೆದ ವರ್ಷ ನವೆಂಬರ್‌ನಲ್ಲಿ ಜಾಕ್ವೆಲಿನ್‌ಗೆ ಜಾಮೀನು ನೀಡಿತ್ತು. ಆದಾಗ್ಯೂ, ಅದರಲ್ಲಿನ ಷರತ್ತುಗಳಿಂದ ಆಕೆ ವಿದೇಶಕ್ಕೆ ಪೂರ್ವಾನುಮತಿ ಇಲ್ಲದೇ ತೆರಳುವುದು ಅಸಾಧ್ಯವಾಗಿತ್ತು. ಇದರಿಂದ ವೃತ್ತಿಜೀವನದ ಸಾಕಷ್ಟು ಅವಕಾಶಗಳಿಂದ ಜಾಕ್ವೆಲಿನ್‌ ವಂಚಿತರಾಗಿದ್ದನ್ನೂ ತಿಳಿಸಿದ್ದರು. ಈ ಹಿನ್ನೆಲೆಯಲ್ಲಿ ನ್ಯಾಯಪೀಠ ನಿಯಮ ಸಡಿಲಗೊಳಿಸಿದೆ. ಆದರೆ, ವಿದೇಶಕ್ಕೆ ಪ್ರಯಾಣಿಸುವ 3-4 ದಿನದ ಮುಂಚೆಯೇ ಜಾರಿ ನಿರ್ದೇಶನಾಲಯ (ಇಡಿ)ಕ್ಕೆ ಮಾಹಿತಿ ನೀಡಬೇಕೆಂದು ಜಾಕ್ವೆಲಿನ್‌ ಅವರಿಗೆ ನಿರ್ದೇಶಿಸಿದೆ.