ಕಾಂಗ್ರೆಸ್‌ನವರು ರೈತರಲ್ಲಿ ಸಂಶಯದ ಭೂತ ಬಿಟ್ಟಿದ್ದಾರೆ

Team Udayavani, Dec 26, 2020, 12:48 PM IST

ಹುಬ್ಬಳ್ಳಿ: ಕೇಂದ್ರ ಸರಕಾರ ಜಾರಿಗೊಳಿಸಿರುವ ಕೃಷಿ, ಎಪಿಎಂಸಿ ಹಾಗೂ ಅಗತ್ಯ ವಸ್ತುಗಳ ಸಂಗ್ರಹ ತಿದ್ದುಪಡಿ ಕಾಯ್ದೆಗಳು ರೈತರಿಗೆ ತುಂಬಾ ಉಪಯುಕ್ತವಾಗಿವೆ. ಆದರೆ ಕಾಂಗ್ರೆಸ್‌, ಇತರೆ ಪಕ್ಷಗಳ ಹಾಗೂ ದಲ್ಲಾಳಿಗಳ ಕುಮ್ಮಕ್ಕಿನಿಂದ ದೆಹಲಿಯಲ್ಲಿ ಬೋಗಸ್‌ ಹೋರಾಟ ನಡೆಯುತ್ತಿದೆ ಎಂದು ಬೃಹತ್‌ ಮತ್ತು ಮಧ್ಯಮ ಕೈಗಾರಿಕಾ ಸಚಿವ ಜಗದೀಶ ಶೆಟ್ಟರ ಹೇಳಿದರು.

ಇಲ್ಲಿನ ಗೋಪನಕೊಪ್ಪ ಶಿವಳ್ಳಿ ರಸ್ತೆಯ ಗವಿಸಿದ್ದೇಶ್ವರ ಕಾಲೋನಿಯಲ್ಲಿ ಹು-ಧಾ ಕೇಂದ್ರ ವಿಧಾನಸಭಾ ಕ್ಷೇತ್ರದ ವತಿಯಿಂದ ಶುಕ್ರವಾರ ಹಮ್ಮಿಕೊಂಡಿದ್ದ ಸುಶಾಸನ ದಿನ ಹಾಗೂ ಮಾಜಿ ಪ್ರಧಾನಿ ದಿ.ಅಟಲ್‌ ಬಿಹಾರಿ ವಾಜಪೇಯಿ ಸ್ಮರಣೆ ನಿಮಿತ್ತ ಎಲ್‌ ಇಡಿ ಪರದೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರ ಭಾಷಣ ನೇರಪ್ರಸಾರ ಕಾರ್ಯಕ್ರಮ ವೀಕ್ಷಿಸಿ ಹಾಗೂ ರೈತರೊಂದಿಗೆ ಸಂವಾದ ನಡೆಸಿ ಅವರು ಮಾತನಾಡಿದರು.

ಹಿಂದೆ ಕಾಂಗ್ರೆಸ್‌ ಅಧಿಕಾರದಲ್ಲಿದ್ದಾಗ ತನ್ನ ಪ್ರಣಾಳಿಕೆಯಲ್ಲಿ ಎಪಿಎಂಸಿ ಹೊರಗಡೆ ರೈತರು ತಮ್ಮ ಬೆಳೆ ಮಾರಾಟ ಮಾಡಲು ಅವಕಾಶವಿರಬೇಕು. ಬೆಳೆಗೆ ಯೋಗ್ಯ ಬೆಲೆ ಸಿಗಬೇಕೆಂದು ಹೇಳಿತ್ತು. ಈಗ ಬಿಜೆಪಿ ಸರಕಾರ ಅದನ್ನು ಜಾರಿಗೊಳಿಸಿದರೆ ವಿರೋಧ ವ್ಯಕ್ತಪಡಿಸುತ್ತಿದೆ. ದೆಹಲಿಯಲ್ಲಿ ನಡೆಸುತ್ತಿರುವ ಹೋರಾಟದಿಂದ ರೈತರಿಗೆ ತೊಂದರೆಯಾಗುತ್ತದೆ ಹೊರತು ಅವರಿಗೆ ಒಳ್ಳೆಯದಾಗಲ್ಲ. ರೈತರು ಎಪಿಎಂಸಿ ಹೊರತುಪಡಿಸಿ ತಮ್ಮ ಕೃಷಿ ಉತ್ಪನ್ನಗಳನ್ನು ತಾವು ನಿಗದಿಪಡಿಸಿದ ದರದಲ್ಲಿ ವ್ಯಾಪಾರಿಗಳಿಗೆ ಮಾರಾಟ ಮಾಡಬಹುದು. ಇದು ರೈತರ ಹಿತಕ್ಕಾಗಿ ಆಗಿದ್ದು, ಅದನ್ನು ಸ್ವಾಗತಿಸಬೇಕು ಎಂದರು.

ಇದನ್ನೂ ಓದಿ:ವಿಜಯಪುರ: ತಾಯಿ ನಿಂದನೆ ಪ್ರಶ್ನಿಸಿದ್ದಕ್ಕೆ ಯುವಕನ ಬರ್ಬರ ಹತ್ಯೆ

ರೈತರ ಕೃಷಿ ಉತ್ಪನ್ನಗಳಿಗೆ ಕನಿಷ್ಠ ಬೆಂಬಲ ಬೆಲೆ ಸಿಗಬೇಕು. ಆ ನಿಟ್ಟಿನಲ್ಲಿ ಕೇಂದ್ರ ರೈತರ ಬೆಳೆಗೆ ಯೋಗ್ಯ ದರ ಸಿಗಲು ಬೆಳೆಗೆ ಖರ್ಚು-ವೆಚ್ಚ ಹೊರತುಪಡಿಸಿ ಅದರ ಮೇಲೆ ಒಂದೂವರೆ ಪಟ್ಟು ಹೆಚ್ಚಿಗೆ ದರ ನಿಗದಿಪಡಿಸಿ ಎಂಎಸ್‌ಪಿ ಘೋಷಿಸಿದೆ. ಎಪಿಎಂಸಿ ಕಾಯ್ದೆ ಜಾರಿಯಾದರೂ ಕನಿಷ್ಠ ಬೆಂಬಲ ಬೆಲೆ ಹಿಂಪಡೆಯಲಾಗುತ್ತದೆ ಎಂಬುದು ಹಸಿ ಸುಳ್ಳು. ಕೇಂದ್ರ ಸರಕಾರ ಮತ್ತು ಕೃಷಿ ಸಚಿವರು ಎಂಎಸ್‌ಪಿ ಹಿಂದಕ್ಕೆ ಪಡೆಯಲ್ಲವೆಂದು ಲಿಖೀತ ಭರವಸೆ ನೀಡಲು ಮುಂದಾಗಿದ್ದಾರೆ. ಆದರೆ ಕಾಂಗ್ರೆಸ್‌ ಪ್ರಧಾನಿ ಮೋದಿ ವಿರುದ್ಧ ಉದ್ದೇಶಪೂರ್ವಕವಾಗಿ ಅಪಪ್ರಚಾರ ಮಾಡುತ್ತಿದೆ ಎಂದರು.

ಸಂಶಯದ ಭೂತ ಬಿಟ್ಟಿದ್ದಾರೆ: ನೂರಾರು ರೈತರು ಒಗ್ಗೂಡಿಕೊಂಡು ಸಾವಿರಾರು ಎಕರೆಯಲ್ಲಿ ಬೆಳೆದ ಬೆಳೆಯನ್ನು ನಿಮ್ಮದೇ ದರ ನಿಗದಿಪಡಿಸಿ ಖರೀದಿದಾರರಿಗೆ ಸಾಮೂಹಿಕವಾಗಿ ಮಾರಲು ಗುತ್ತಿಗೆಯ ಒಪ್ಪಂದ ಮಾಡಿಕೊಳ್ಳಬಹುದು. ಇದರಿಂದ ರೈತರ ಜಮೀನು ಮಾಲ್ಕಿ ಹಕ್ಕು ಹೋಗಲ್ಲ. ಖರೀದಿದಾರರೊಂದಿಗೆ ಒಪ್ಪಂದ ಮಾಡಿಕೊಳ್ಳೋದು ಬಿಡೋದು ರೈತರಿಗೆ ಬಿಟ್ಟ ವಿಷಯ. ಆದರೆ ಕಾಂಗ್ರೆಸ್‌ನವರು ಈ ವಿಷಯದಲ್ಲಿ ರೈತ ರಿಗೆ ಸಂಶಯದ ಭೂತ ಬಿಟ್ಟಿ ದ್ದಾರೆ ಎಂದು ಆರೋಪಿಸಿ ದರು. ಎರಡು ಗ್ರಾಮ ಸೇರಿ ಒಂದು ವಿಭಾಗಕ್ಕೆ ಯತ್ನ: ಫಸಲ್‌ ಬಿಮಾ ಯೋಜನೆಯಡಿ ನಗ ರ  ಭಾಗದ ಹಳ್ಳಿಗಳಿಗೆ ಸಮರ್ಪಕ ಪರಿಹಾರ ದೊರೆಯುತ್ತಿಲ್ಲ ಎಂಬ ಕೂಗಿದೆ. ನಗರ ಭಾಗದಲ್ಲಿರುವ ಗ್ರಾಮಗಳದ್ದು ಒಂದೇ ಘಟಕ ಮಾಡಿದ್ದಾರೆ. ಎರಡೂ ಗ್ರಾಮಗಳನ್ನು ಸೇರಿಸಿ ಒಂದು ವಿಭಾಗ ಮಾಡಲು ಪ್ರಯತ್ನಿಸಲಾಗುವುದು. ಆಗ ನಗರ ಪ್ರದೇಶದ ರೈತರಿಗೂ ಬೆಳೆವಿಮೆ ಪರಿಹಾರ ಸಮರ್ಪಕವಾಗಿ ಸಿಗಲು ಸಾಧ್ಯ. ಆ ಪ್ರಯತ್ನ ಮುಂದುವರಿಸಿ ಆದಷ್ಟು ಬೇಗ ಪರಿಹರಿಸುವೆ ಎಂದರು.