ಸೋಂಕಿತನ ಬದಲು ತಾಯಿಯನ್ನು ವಾರ್ಡ್‌ಗೆ ದಾಖಲಿಸಿದರು!

Team Udayavani, Jul 12, 2020, 11:03 AM IST

ಕೆಜಿಎಫ್: ಸೋಂಕಿತ ವ್ಯಕ್ತಿಯನ್ನು ಕೋವಿಡ್‌-19 ಆಸ್ಪತ್ರೆಗೆ ದಾಖಲಿಸುವುದರ ಬದಲು ಸೋಂಕಿತ ವ್ಯಕ್ತಿಯ ತಾಯಿಯನ್ನು ದಾಖಲಿಸಿದ ಘಟನೆ ಸಂಭವಿಸಿದೆ.

ನಗರದ ಸುಮತಿ ನಗರದ ಬೆಮಲ್‌ ಉದ್ಯೋಗಿಯೊಬ್ಬರಿಗೆ ಕೋವಿಡ್‌-19 ಸೋಂಕು ಇರುವುದು ಪತ್ತೆಯಾಗಿ ಅವರನ್ನು ಕೋಲಾರದ ಜಾಲಪ್ಪ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಈ ವೇಳೆ ಉದ್ಯೋಗಿಯ ಪತ್ನಿಯನ್ನು ಸಹ ಬೇರೆ ಕಾಯಿಲೆಗೋಸ್ಕರ ಜಾಲಪ್ಪ ಆಸ್ಪತ್ರೆಯಲ್ಲಿಯೇ ದಾಖಲು ಮಾಡಿದ್ದರು.

ಪ್ರಾಥಮಿಕ ಸಂಪರ್ಕ ಹೊಂದಿದ್ದ ಬೆಮಲ್‌ ಉದ್ಯೋಗಿಯ ಪತ್ನಿ ಮತ್ತು ಮಗನಿಗೆ ಕೋವಿಡ್ ಸೋಂಕು ಪರೀಕ್ಷೆ ನಡೆಸಲಾಗಿತ್ತು. ಉದ್ಯೋಗಿಯ 26 ವರ್ಷದ ಮಗನಿಗೆ ಸೋಂಕು ಇರುವುದು ದೃಢಪಟ್ಟಿತು. ಆದರೆ ಆರೋಗ್ಯ ಸಿಬಂದಿ ಮಗನನ್ನು ಕೋವಿಡ್‌- 19 ಆಸ್ಪತ್ರೆಗೆ ದಾಖಲಿಸುವುದನ್ನು ಬಿಟ್ಟು, ಸೋಂಕು ಇರದ ಅವರ ತಾಯಿಯನ್ನು ಕೋವಿಡ್‌ ವಾರ್ಡ್‌ಗೆ ದಾಖಲಿಸಿದರು. ಮಗ ಆರೋಗ್ಯ ಅಧಿಕಾರಿಗಳ ಮೇಲೆ ಹರಿಹಾಯ್ದ ಬಳಿಕ ಎಲ್ಲರನ್ನೂ ಜಾಲಪ್ಪ ಆಸ್ಪತ್ರೆಯ ವಿಶೇಷ ಕೊಠಡಿಯಲ್ಲಿ ಇರಿಸಲಾಗಿದೆ.