ಗಜ್ವೆಲ್‌ಗೆ ಕೆ. ಚಂದ್ರಶೇಖರ್‌ ರಾವ್‌ ಗುಡ್‌ಬೈ?

Team Udayavani, Aug 2, 2023, 12:38 AM IST

ಮುಂಬರುವ ತೆಲಂಗಾಣ ವಿಧಾನಸಭೆ ಚುನಾವಣೆಯಲ್ಲಿ ಸಿಎಂ ಕೆ. ಚಂದ್ರಶೇಖರ್‌ ರಾವ್‌ ಅವರು ತಮ್ಮ ಹಾಲಿ ಕ್ಷೇತ್ರ ಗಜ್ವೆಲ್‌ಗೆ ಗುಡ್‌ಬೈ ಹೇಳುತ್ತಾರಂತೆ! ಇಂಥದ್ದೊಂದು ಸುದ್ದಿ ರಾಜ್ಯಾದ್ಯಂತ ಹಬ್ಬುತ್ತಿದೆ. ಈ ಬಾರಿ ಗಜ್ವೆಲ್‌ ಕ್ಷೇತ್ರ ಬಿಟ್ಟು ಕೆಸಿಆರ್‌ ಕಮ್ಮಾರೆಡ್ಡಿ ವಿಧಾನಸಭಾ ಕ್ಷೇತ್ರದ ಕಡೆಗೆ ಮುಖ ಮಾಡಿದ್ದಾರಂತೆ. 2014ರಲ್ಲಿ ತೆಲಂಗಾಣ ರಚನೆಯಾದ ಅನಂತರ ಕೆಸಿಆರ್‌, ಸತತವಾಗಿ ಗಜ್ವೆಲ್‌ ಕ್ಷೇತ್ರದಿಂದ ಸ್ಪರ್ಧಿಸುತ್ತಿದ್ದಾರೆ.

ಇಲ್ಲಿ ಹಾಲಿ ಅಥವಾ ಮಾಜಿ ಸಿಎಂಗಳು ತಮ್ಮ ಕ್ಷೇತ್ರವನ್ನು ಬದಲಿಸುವುದು ಅಪರೂಪ. ಆದರೆ ಹಿಂದೆಂದೂ ಈ ರೀತಿ ಮಾಡಿಯೇ ಇಲ್ಲ ಎನ್ನುವಂತಿಲ್ಲ. ಚಿತ್ತೂರು ಜಿಲ್ಲೆಯ ಕುಪ್ಪಂ ಕ್ಷೇತ್ರದಿಂದ ಮಾಜಿ ಸಿಎಂ ಎನ್‌.ಚಂದ್ರಬಾಬು ನಾಯ್ಡು, ಕಡಪ ಜಿಲ್ಲೆಯ ಪುಲಿವೆಂದುಲ ಕ್ಷೇತ್ರದಿಂದ ಮಾಜಿ ಸಿಎಂ ದಿ| ಡಾ| ವೈ.ಎಸ್‌.ರಾಜಶೇಖರ ರೆಡ್ಡಿ, ಇದೀಗ ಅವರ ಪುತ್ರ ಆಂಧ್ರ ಹಾಲಿ ಸಿಎಂ ವೈ.ಎಸ್‌.ಜಗನ್‌ಮೋಹನ್‌ ರೆಡ್ಡಿ ಸತತವಾಗಿ ಸ್ಪರ್ಧಿಸುತ್ತಿದ್ದಾರೆ. ಆದರೆ ಮಾಜಿ ಸಿಎಂ ದಿ| ಎನ್‌.ಟಿ.ರಾಮರಾವ್‌ ಮಾತ್ರ ಹಿಂದೂಪುರ, ಗುಡಿವಾಡ, ತಿರುಪತಿ, ನಲ್ಗೊಂಡ ಮತ್ತು ತೆಕ್ಕಾಲಿ ಹೀಗೆ ಬೇರೆ ಬೇರೆ ಕ್ಷೇತ್ರಗಳಿಂದ ಸ್ಪರ್ಧಿಸಿದ್ದರು.