Sandalwood: 2 ಕೋಟಿಗೂ ಅಧಿಕ ವೀಕ್ಷಣೆ ಕಂಡ ʻಕಾಂತಾರ ಚಾಪ್ಟರ್‌ 1ʼ ಫಸ್ಟ್‌ಲುಕ್‌ ಟೀಸರ್‌

Team Udayavani, Nov 30, 2023, 6:05 PM IST

ಬೆಂಗಳೂರು: ಸ್ಯಾಂಡಲ್‌ವುಡ್‌ನಲ್ಲಿ ಬಿರುಗಾಳಿ ಎಬ್ಬಿಸಿದ್ದ ರಿಷಬ್‌ ಶೆಟ್ಟಿ ನಟನೆಯ ಕಾಂತಾರ ಸಿನಿರಂಗದಲ್ಲಿ ಈಗ ಮತ್ತೊಂದು ಮೈಲುಗಲ್ಲು ಸ್ಥಾಪಿಸಲು ಹೊರಟಿದೆ. ಕನ್ನಡದ ಬಹುನಿರೀಕ್ಷಿತ ಸಿನೆಮಾ ʻಕಾಂತಾರ ಚಾಪ್ಟರ್‌ 1ʼ ನ ಟೀಸರ್‌ ಯೂಟ್ಯೂಬ್‌ನಲ್ಲಿ ನಿರೀಕ್ಷೆಯಂತೆಯೇ ನಂ.1 ಟ್ರೆಂಡಿಂಗ್‌ನಲ್ಲಿದೆ.

ಈಗಾಗಲೇ 2 ಕೋಟಿಗೂ ಹೆಚ್ಚು ಜನ ಕಾಂತಾರ ಚಾಪ್ಟರ್‌ 1 ನ ಫಸ್ಟ್‌ಲುಕ್‌ ಟೀಸರ್‌ ವೀಕ್ಷಿಸಿದ್ದಾರೆ. ಕೇವಲ 24 ಗಂಟೆಯಲ್ಲೇ ಸುಮಾರು 1 ಕೋಟಿ 20 ಲಕ್ಷಕ್ಕೂ ಹೆಚ್ಚು ಮಂದಿ ಈ ಸಿನೆಮಾದ ಪ್ರೀಕ್ವೆಲ್‌ ವೀಕ್ಷಿಸಿದ್ದು ದಾಖಲೆಯಾಗಿದೆ.

ಟೀಸರ್‌ ವೀಕ್ಷಿಸಿದ ಚಿತ್ರರಸಿಕರು ರಿಷಬ್‌ ಶೆಟ್ಟಿ ತಂಡಕ್ಕೆ ಮೆಚ್ಚುಗೆ ಸೂಚಿಸಿದ್ದಾರೆ. ದಕ್ಷಿಣ ಭಾರತದ ಸ್ಟಾರ್‌ ನಟರಾದ ಪ್ರಭಾಸ್‌, ಪೃಥ್ವಿರಾಜ್‌ , ರಕ್ಷಿತ್‌ ಶೆಟ್ಟಿ ಮೊದಲಾದವರು ಟೀಸರ್‌ ನೋಡಿ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.

ಗೂಗಲ್‌ ಸರ್ಚ್‌ನಲ್ಲೂ ಕಾಂತಾರ 1 ರಿಲೀಸ್‌ ಡೇಟ್‌ ಬಗ್ಗೆ ಅತಿ ಹೆಚ್ಚು ಸರ್ಚ್‌ ಮಾಡಲಾಗಿದೆ. ಇದಕ್ಕಾಗಿ ಗೂಗಲ್‌ ಇಂಡಿಯಾ ತನ್ನ ʻಎಕ್ಸ್‌ʼ ಖಾತೆಯಲ್ಲಿ ಮೆಚ್ಚುಗೆ ಸೂಚಿಸಿದೆ. ಈ ವೇಳೆ ʻಕಾಂತಾರ 1ʼ ಎಂದು ಕನ್ನಡದಲ್ಲೇ ಬರೆದಿದ್ದಕ್ಕೆ ಕನ್ನಡಿಗರು ಖುಷ್‌ ಆಗಿದ್ದಾರೆ.

ಕನ್ನಡ, ಮಲಯಾಳಂ, ತಮಿಳು, ತೆಲುಗು, ಹಿಂದು ಮತ್ತು ಬೆಂಗಾಲಿ ಭಾಷೆಗಳಲ್ಲಿ ಕಾಂತಾರ 1 ಫಸ್ಟ್‌ ಲುಕ್‌ ಬಿಡುಗಡೆಯಾಗಿತ್ತು. ವಿಶೇಷವೆಂದರೆ ಒಂದೇ ವೀಡಿಯೊ ಟ್ರ್ಯಾಕ್‌ನಲ್ಲಿ ಭಾಷೆಗಳನ್ನು ಬದಲಾಯಿಸುವ ಅವಕಾಶವನ್ನು ನೀಡಲಾಗಿತ್ತು.

ಇತ್ತೀಚೆಗೆ ಗೋವಾದಲ್ಲಿ ನಡೆದ ಇಫ್ಫಿ ಚಿತ್ರೋತ್ಸವದಲ್ಲಿ ಕಾಂತಾರ ಚಿತ್ರಕ್ಕೆ ಸ್ಪೆಷಲ್‌ ಜ್ಯೂರಿ ಅವಾರ್ಡ್‌ ನೀಡಿ ಗೌರವಿಸಲಾಗಿತ್ತು. ಈ ವೇಳೆ ಪ್ರತಿಕ್ರಿಯಿಸಿದ ರಿಷಬ್‌ ಶೆಟ್ಟಿ ʻಕಾಂತಾರ 1 ದ ಫಸ್ಟ್‌ಲುಕ್‌ ಟೀಸರ್‌ಗೆ ಸಿಕ್ಕಿರುವ ಪ್ರತಿಕ್ರಿಯೆ ನೋಡಿ ಸಂತಸವಾಗಿದೆ. ಇದು ನಮ್ಮ ಮೇಲಿನ ಜವಾಬ್ದಾರಿಯನ್ನು ಹೆಚ್ಚಿಸಿದೆ. ದಿನದ 24 ಗಂಟೆ ಕೆಲಸ ಮಾಡಿದರೂ ಕಮ್ಮಿಯೇ ಎನ್ನುವಂತಾಗಿದೆ. ನನ್ನನ್ನು ದೇಶಕ್ಕೆ ಪರಿಚಯಿಸಿದ್ದು ಕಾಂತಾರ. ಹೀಗಾಗಿ ಜನರ ಪ್ರೀತಿಗೆ, ಅಭಿಮಾನಕ್ಕೆ ಎಂದಿಗೂ ಕೃತಜ್ಙʼ ಎಂದು ಹೇಳಿದ್ಧಾರೆ.

ನಿರ್ಮಾಪಕ ವಿಜಯ್‌ ಕಿರಗಂದೂರು ಅವರಿಂದ ನಿರ್ಮಾಣವಾಗುತ್ತಿರುವ ಈ ಸಿನೆಮಾದ ಬಜೆಟ್‌ ಬರೋಬ್ಬರಿ 125 ಕೋಟಿ ರೂ. ಹೀಗಾಗಿ ಸಹಜವಾಗಿಯೇ ಈ ಚಿತ್ರದ ಮೇಲೆ ಜನರ ನಿರೀಕ್ಷೆ ಹೆಚ್ಚಾಗಿದೆ. 2024 ರಲ್ಲಿ ಏಳು ಭಾಷೆಗಳಲ್ಲಿ ಕಾಂತಾರ ಚಾಪ್ಟರ್‌ 1 ಹೊರಬರಲಿದ್ದು ಸ್ಯಾಂಡಲ್‌ವುಡ್‌ನ ಕೀರ್ತಿ ಪತಾಕೆಯನ್ನು ಮತ್ತೊಮ್ಮೆ ಜಗದಗಲ ಹಾರಿಸಲಿದೆ ಎಂಬ ನಂಬಿಕೆ ಸಿನಿಪ್ರೇಮಿಗಳಲ್ಲಿದೆ.