Pakistan: ಪಾಕ್‌ನಲ್ಲಿ ಹಿಂದೂ ವ್ಯಾಪಾರಿಗಳ ಅಪಹರಣ

Team Udayavani, Aug 30, 2023, 10:33 PM IST

ಕರಾಚಿ: ಪಾಕಿಸ್ತಾನದ ಬಲೂಚಿಸ್ತಾನ ಪ್ರಾಂತ್ಯದಲ್ಲಿ ಶಸ್ತ್ರಸಜ್ಜಿತ ದರೋಡೆಕೋರರು ಇಬ್ಬರು ಹಿಂದೂ ವ್ಯಾಪಾರಿಗಳನ್ನು ಅಪಹರಿಸಿದ್ದು, ಅವರ ಕುಟುಂಬಗಳಿಂದ ತಲಾ 10 ಕೋಟಿ ಪಾಕಿಸ್ತಾನಿ ರೂಪಾಯಿಗಳಿಗೆ ಬೇಡಿಕೆ ಇಟ್ಟಿದ್ದಾರೆ. ಪಾಕಿಸ್ತಾನದಲ್ಲಿ ಹಿಂದೂಗಳ ಹತ್ಯೆ ಮತ್ತು ಅಪಹರಣ ಪ್ರಕರಣಗಳು ಹೆಚ್ಚುತ್ತಿವೆ.

ಒಂದು ಪ್ರಕರಣದಲ್ಲಿ, ಸಿಂಧ್‌ ಪ್ರಾಂತ್ಯದ ಕಾಶ್ಮೋರ್‌ ನಿವಾಸಿಯಾದ ಸಾಗರ್‌ ಕುಮಾರ್‌(25) ಎಂಬ ಯುವಕನನ್ನು ದರೋಡೆಕೋರರು ಅಪಹರಿಸಿದ್ದಾರೆ. ಬಲೂಚಿಸ್ತಾನದ ಒಂದು ಅಜ್ಞಾತ ಸ್ಥಳದಲ್ಲಿ ಆತನನ್ನು ಕೂಡಿ ಹಾಕಿರುವ ಅಪಹರಣಕಾರರು, ಆತನನ್ನು ಥಳಿಸಿದ್ದು, ಬಿಡುಗಡೆಗೆ 10 ಕೋಟಿ ಪಾಕಿಸ್ತಾನಿ ರೂಪಾಯಿ ನೀಡುವಂತೆ ಬೇಡಿಕೆಯಿಟ್ಟು ಕುಟುಂಬದವರಿಗೆ ವಿಡಿಯೊ ಕಳುಹಿಸಿದ್ದಾರೆ. ಇದೇ ರೀತಿಯ ಮತ್ತೂಂದು ಪ್ರಕರಣದಲ್ಲಿ ಬಲೂಚಿಸ್ತಾನ ಪ್ರಾಂತ್ಯದಲ್ಲಿ ಉದ್ಯಮಿ ಜಗದೀಶ್‌ ಕುಮಾರ್‌ (65) ಎಂಬುವವರನ್ನು ಅಪಹರಿಸಿದ್ದು, ಅನೇಕ ದಿನಗಳಿಂದ ಅವರನ್ನು ತಮ್ಮ ವಶದಲ್ಲಿ ಇರಿಸಿಕೊಂಡಿದ್ದಾರೆ. ಅವರನ್ನು ಹಿಗ್ಗಾಮುಗ್ಗಾ ಥಳಿಸಿರುವ ಅಪಹರಣಕಾರರು, 10 ಕೋಟಿ ರೂ.ಗೆ ಬೇಡಿಕೆಯಿಟ್ಟು ಜಗದೀಶ್‌ ಕುಟುಂಬದವರಿಗೆ ವಿಡಿಯೊ ಕಳುಹಿಸಿದ್ದಾರೆ. ಪಾಕಿಸ್ತಾನಿ ಪೊಲೀಸರು ಅಪಹರಣಕಾರರಿಂದ ಈ ಇಬ್ಬರನ್ನು ರಕ್ಷಿಸುವ ಯತ್ನದಲ್ಲಿದ್ದಾರೆ.