ಯೂಟ್ಯೂಬ್‌ ಕಂಟೆಂಟ್‌ ಕ್ರಿಯೇಟರ್‌ ಕಿಲಿ ಪಾಲ್‌ ಮೇಲೆ ಅಜ್ಞಾತರಿಂದ ದಾಳಿ

Team Udayavani, May 2, 2022, 7:25 AM IST

ಹೊಸದಿಲ್ಲಿ: ಹಿಂದಿ ಚಿತ್ರಗೀತೆಗಳಿಗೆ ಲಿಪ್‌-ಸಿಂಕ್‌ ಮಾಡಲಾದ ವೀಡಿಯೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುವ ಮೂಲಕ “ಇಂಟರ್ನೆಟ್‌ನ ಹೊಸ ಸೆನ್ಸೇಷನ್‌’ ಎಂದೆನಿಸಿದ್ದ ಟಾಂಜಾನಿಯಾದ ಯೂಟ್ಯೂಬ್‌ ಕಂಟೆಂಟ್‌ ಕ್ರಿಯೇಟರ್‌ ಕಿಲಿ ಪಾಲ್‌ ಅವರ ಮೇಲೆ ಅಜ್ಞಾತ ವ್ಯಕ್ತಿಗಳು ಚಾಕುವಿನಿಂದ ದಾಳಿ ನಡೆಸಿದ್ದಾರೆ.

ಪ್ರಾಣಾಪಾಯದಿಂದ ಪಾರಾಗಿ ರುವ ಅವರು ಸದ್ಯಕ್ಕೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ತಮ್ಮ ಸಹೋದರಿ ನೀಮಾ ಅವರೊಂದಿಗೆ ಖ್ಯಾತ ಹಿಂದಿ ಚಿತ್ರಗೀತೆಗಳಿಗೆ ನೃತ್ಯ ಮಾಡುವ ವೀಡಿಯೋಗಳನ್ನು ಹರಿಯಬಿಡುವ ಮೂಲಕ ಅವರು ಜನಮನ ಗೆದ್ದಿದ್ದರು.

ಇದನ್ನು ಗುರುತಿಸಿ ಟಾಂಜಾನಿಯಾದಲ್ಲಿರುವ ಭಾರತೀಯ ರಾಯಭಾರ ಕಚೇರಿ, ಕಿಲಿಯವರನ್ನು ಇದೇ ಫೆಬ್ರವರಿಯಲ್ಲಿ ಸಮ್ಮಾನಿಸಿತ್ತು. ಅದೇ ತಿಂಗಳ ತಮ್ಮ “ಮನ್‌ ಕೀ ಬಾತ್‌’ ಬಾನುಲಿ ಕಾರ್ಯಕ್ರಮದಲ್ಲಿ ಪ್ರಧಾನಿ ಮೋದಿಯವರೂ ಕಿಲಿ, ನೀಮಾ ಅವರನ್ನು ಶ್ಲಾಘಿಸಿದ್ದರು.