Nipah: ಕೋಯಿಕ್ಕೋಡ್‌: ಕೇಂದ್ರ ತಂಡದ ಪರಿಶೀಲನೆ, ಸಭೆ

Team Udayavani, Sep 14, 2023, 10:58 PM IST

ತಿರುವನಂತಪುರ/ಕೋಯಿಕ್ಕೋಡ್‌: ನಿಫಾ ಸೋಂಕು ಕಂಡುಬಂದಿರುವ ಕೇರಳದ ಕೋಯಿಕ್ಕೋಡ್‌ ಜಿಲ್ಲೆಗೆ ಆರು ಸದಸ್ಯರ ಕೇಂದ್ರ ತಂಡ ಆಗಮಿಸಿ ಪರಿಶೀಲನೆ ನಡೆಸಿದೆ. ಸೋಂಕು ಕಂಡು ಬಂದಿರುವ ಸ್ಥಳಗಳಿಗೆ ಕೂಡ ತಂಡ ಭೇಟಿ ನೀಡಿದೆ. ಜತೆಗೆ ಕೇರಳ ಆರೋಗ್ಯ ಇಲಾಖೆಯ ಜತೆ ಪರಾಮರ್ಶೆ ನಡೆಸಿದೆ.

ಇನ್ನೊಂದೆಡೆ ತಿರುವನಂತ­ಪುರ­ದಲ್ಲಿ ಸಭೆ ನಡೆಸಿದ ಆರೋಗ್ಯ ಸಚಿವೆ ವೀಣಾ ಜಾರ್ಜ್‌, ಸೋಂಕು ನಿವಾರಣೆಗೆ ಬೇಕಾಗಿರುವ ಮೊನೊಕ್ಲೋನಲ್‌ ಪ್ರತಿಕಾಯ ರಾಜ್ಯಕ್ಕೆ ತಲುಪಿದೆ. ಆದರೆ ಇದು ಎಷ್ಟರ ಮಟ್ಟಿಗೆ ಪ್ರಯೋಜನ­ವಾಗಲಿದೆ ಎಂಬುದು ಕ್ಲಿನಿಕಲ್‌ ಟ್ರಯಲ್‌ನಲ್ಲಿ ಗೊತ್ತಾಗಿಲ್ಲ. ಸದ್ಯಕ್ಕೆ ಈ ಔಷಧ ನೀಡದೆ ದಾರಿ ಇಲ್ಲ ಎಂದು ಹೇಳಿದ್ದಾರೆ. ಸೋಂಕು ಪ್ರಕರಣ 5ಕ್ಕೆ ಏರಿಕೆಯಾಗಿ­ದ್ದರೂ, ಅವರೊಂದಿಗೆ ಸಂಪರ್ಕದಲ್ಲಿ ಇರುವ 76 ಮಂದಿಯ ಆರೋಗ್ಯ ಸ್ಥಿರವಾಗಿದೆ ಎಂದು ಹೇಳಿದ್ದಾರೆ.

ಹೊಸ ಲ್ಯಾಬ್‌: ಪುಣೆಯಲ್ಲಿರುವ ರಾಷ್ಟ್ರೀಯ ವೈರಾಣು ಸಂಸ್ಥೆ (ಎನ್‌ಐವಿ) ಕಲ್ಲಿಕೋಟೆಗೆ ಸಂಚಾರಿ ಪ್ರಯೋಗ ಶಾಲೆಯನ್ನು ಕಳುಹಿಸಿಕೊಟ್ಟಿದ್ದು, ಇನ್ನು ಕ್ಷಿಪ್ರಗತಿಯಲ್ಲಿ ವೈರಸ್‌ ದೃಢಪಡಿಸಲು ನೆರವಾಗಿದೆ. ಬಿಎಸ್‌ಎಲ್‌-3 ದರ್ಜೆ ಹೊಂದಿರುವ ದಕ್ಷಿಣ ಏಷ್ಯಾದ ಮೊದಲ ಸಂಚಾರಿ ಲ್ಯಾಬ್‌ ಎಂಬ ಹೆಗ್ಗಳಿಕೆಗೆ ಕೂಡ ಅದು ಪಾತ್ರವಾಗಿದೆ. ಇದರಿಂದಾಗಿ ಸ್ಯಾಂಪಲ್‌ಗ‌ಳನ್ನು ಪುಣೆಗೆ ಕಳುಹಿಸದೆ, ಕಲ್ಲಿಕೋಟೆಯಲ್ಲಿಯೇ ಪರೀಕ್ಷೆಗೆ ಒಳಪಡಿಸಿ ಸೋಂಕು ದೃಢಪಡಿಸಲು ಸಾಧ್ಯವಾಗಲಿದೆ.

ಅಪಾಯಕಾರಿಯಲ್ಲ: ಪರಿಸ್ಥಿತಿ ಬಗ್ಗೆ ಮಾತನಾಡಿದ ಆರೋಗ್ಯ ಖಾತೆ ಮಾಜಿ ಸಚಿವೆ ಕೆ.ಕೆ.ಶೈಲಜಾ 2018ಕ್ಕೆ ಹೋಲಿಕೆ ಮಾಡಿದರೆ ಈ ಬಾರಿ ಪರಿಸ್ಥಿತಿ ಅಪಾಯಕಾರಿಯಾಗಿಲ್ಲ ಆ ಸಂದರ್ಭದಲ್ಲಿ ಅದು ಹೊಸತಾಗಿತ್ತು ಎಂದರು. ಕಲ್ಲಿಕೋಟೆ ಜಿಲ್ಲೆಯಲ್ಲಿ ಶನಿವಾರ­ದವರೆಗೆ ಶಿಕ್ಷಣ ಸಂಸ್ಥೆಗಳಿಗೆ ರಜೆ ಘೋಷಿಸಲಾಗಿದೆ. ಕಂಟೈನ್‌ಮೆಂಟ್‌ ವಲಯಗಳಲ್ಲಿ ಬೀಚ್‌, ಪಾರ್ಕ್‌ಗಳನ್ನು ಬಂದ್‌ ಮಾಡಲಾಗಿದೆ.