Kota ಮಗು ಸಾವು ಪ್ರಕರಣ: ರೆಸಾರ್ಟ್‌ ಮಾಲಕನ ವಿರುದ್ಧ ದೂರು

Team Udayavani, Nov 22, 2023, 11:58 PM IST

ಕೋಟ: ಆಟವಾಡುತ್ತಿದ್ದ ವೇಳೆ ರೆಸಾರ್ಟ್‌ನ ಗೇಟ್‌ ಮೈ ಮೇಲೆ ಬಿದ್ದು ಸ್ಥಳೀಯ ನಿವಾಸಿ ಸುಧಿಧೀರ್‌ ಕೋಟ್ಯಾನ್‌ ಅವರ ಪುತ್ರ ಸುಶಾಂತ್‌ (3) ಮೃತಪಟ್ಟ ಘಟನೆ ಕೋಟತಟ್ಟು-ಪಡುಕರೆಯಲ್ಲಿ ಮಂಗಳವಾರ ಸಂಜೆ ಸಂಭವಿಸಿತ್ತು. ಇದೀಗ ದುರ್ಘ‌ಟನೆಗೆ ರೆಸಾರ್ಟ್‌ ಮಾಲಕನ ನಿರ್ಲಕ್ಷತನ ಹಾಗೂ ಬೇಜವಾಬ್ದಾರಿತನ ಕಾರಣವಾಗಿದ್ದು ಸೂಕ್ತ ಕಾನೂನು ಕ್ರಮ ಕೈಗೊಳ್ಳುವಂತೆ ಮಗುವಿನ ಹೆತ್ತವರು ಕೋಟ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಘಟನೆಗೆ ರೆಸಾರ್ಟ್‌ನ ಗೇಟ್‌ ಸರಿಯಾಗಿ ಜೋಡಣೆ ಮಾಡದಿರುವುದು ಹಾಗೂ ಸುಸ್ಥಿತಿಯಲ್ಲಿಡದೇ ನಿರ್ಲಕ್ಷ್ಯ ತೋರಿದ್ದು ಕಾರಣವಾಗಿದ್ದು, ಮಾಲಕ ಪೃಥ್ವಿರಾಜ್‌ ಮತ್ತು ಪಾಲುದಾರರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಹೆತ್ತವರು ದೂರಿನಲ್ಲಿ ಮನವಿ ಮಾಡಿದ್ದಾರೆ.

ಶಾಸಕರ ಭೇಟಿ; ಅಕ್ರಮ ವಿರುದ್ಧ ಆಕ್ರೋಶ
ಮೃತ ಮಗುವಿನ ಮನೆಗೆ ಶಾಸಕ ಕಿರಣ್‌ ಕುಮಾರ್‌ ಕೊಡ್ಗಿ ಬುಧವಾರ ಭೇಟಿ ನೀಡಿ ಸಾಂತ್ವನ ತಿಳಿಸಿದರು. ಈ ಸಂದರ್ಭ ನಿಯಮಗಳನ್ನು ಉಲ್ಲಂಘಿಸಿ ಕಾರ್ಯಚರಿಸುತ್ತಿರುವ ಅಕ್ರಮ ರೆಸಾರ್ಟ್‌ಗಳಿಂದ ಸ್ಥಳೀಯರಿಗೆ ಸಮಸ್ಯೆಯಾಗುತ್ತಿದೆ. ಈ ಬಗ್ಗೆ ದೂರು ನೀಡಿದರು ಕ್ರಮಕೈಗೊಳ್ಳುವವರಿಲ್ಲ ಎಂದು ಸ್ಥಳೀಯರು ದೂರಿದರು ಹಾಗೂ ಇಂತಹ ಅನಧಿಕೃತ ರೆಸಾರ್ಟ್‌ಗಳ ವಿರುದ್ಧ ಕ್ರಮಕೈಗೊಳ್ಳ ಬೇಕು, ಸಂತ್ರಸ್ತ ಕುಟುಂಬಕ್ಕೆ ಹೆಚ್ಚಿನ ಪರಿಹಾರ ಒದಗಿಸಬೇಕು ಎಂದು ಮನವಿ ಮಾಡಿದರು.

ಘಟನೆ ಬಗ್ಗೆ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಗಳ ಜತೆ ಚರ್ಚಿಸಿದ್ದು ಸೂಕ್ತ ಕ್ರಮ ಕೈಗೊಳ್ಳುವಂತೆ ತಿಳಿಸಿದ್ದೇನೆ ಎಂದು ಶಾಸಕರು ಭರವಸೆ ನೀಡಿದರು.