Mangaluru ಭೂಗತ ತೈಲಾಗಾರ ಜಾಗ ಖಾಸಗಿಗೆ ಗುತ್ತಿಗೆ?

Team Udayavani, Feb 7, 2024, 6:41 AM IST

ಮಂಗಳೂರು: ಮಂಗಳೂರು, ಪಾದೂರು ಹಾಗೂ ವಿಶಾಖಪಟ್ಟಣದಲ್ಲಿರುವ ಭೂಗತ ತೈಲ ಸಂಗ್ರಹಾಗಾರಗಳ ಜಾಗವನ್ನು ಪೂರ್ತಿಯಾಗಿ ದೇಶೀಯ ಹಾಗೂ ವಿದೇಶೀ ಸಂಸ್ಥೆಗಳಿಗೆ ಗುತ್ತಿಗೆ ಆಧಾರದಲ್ಲಿ ಕಚ್ಚಾ ತೈಲ ಸಂಗ್ರಹಕ್ಕೆ ನೀಡಲು ಸರಕಾರ ನಿರ್ಧರಿಸಿದೆ.

ಲಭ್ಯ ಮಾಹಿತಿ ಪ್ರಕಾರ ಸದ್ಯವೇ ಈ ಬಗ್ಗೆ ಗುತ್ತಿಗೆದಾರರನ್ನು ಆಹ್ವಾನಿಸುವ ಸಾಧ್ಯತೆ ಇದೆ.ಯುಎಇಯ ಅಬುಧಾಬಿಯಲ್ಲಿರುವ ನ್ಯಾಶನಲ್‌ ಆಯಿಲ್‌ ಕಂಪೆನಿ (ಆಡ್‌ನಾಕ್‌) ಈಗಾಗಲೇ ಪಾದೂರಿನ 2.5 ಹಾಗೂ ಮಂಗಳೂರಿನ ಪೆರ್ಮುದೆಯಲ್ಲಿರುವ 1.5 ಮಿಲಿಯ ಟನ್‌ ಸಂಗ್ರಹ ಸಾಮರ್ಥ್ಯದ ಭೂಗತ ತೆಲಾಗಾರಗಳಲ್ಲಿ ಅರ್ಧ ಭಾಗವನ್ನು ಗುತ್ತಿಗೆ ಪಡೆದಿದೆ.

ಪಾದೂರಿನ ಬಾಕಿ ಉಳಿದ 1.25 ಮಿಲಿಯ ಟನ್‌ ಅನ್ನು ಭಾರತೀಯ ವ್ಯೂಹಾತ್ಮಕ ಪೆಟ್ರೋಲಿಯಂ ಸಂಗ್ರಹ ಸಂಸ್ಥೆ (ಐಎಸ್‌ಪಿಆರ್‌ಎಲ್‌) ತುಂಬಿಸಿದೆ.

ಮಂಗಳೂರಿನಲ್ಲಿ ಬಾಕಿ ಉಳಿದ 0.75 ಮಿಲಿಯ ಟನ್‌ ಸಾಮರ್ಥ್ಯದ ಸುರಂಗದ ಖಾಲಿ ಭಾಗವನ್ನು ಗುತ್ತಿಗೆ ನೀಡಲಾಗುತ್ತಿದೆ ಎಂದು ತಿಳಿದು ಬಂದಿದೆ. ವಿಶಾಖಪಟ್ಟಣದಲ್ಲಿ 1.33 ಮಿಲಿಯ ಟನ್‌ ಸಂಗ್ರಹಾಗಾರದಲ್ಲಿ ಎಚ್‌ಪಿಸಿಎಲ್‌ ಒಂದು ಭಾಗವನ್ನು ಈಗಾಗಲೇ ಗುತ್ತಿಗೆ ಪಡೆದಿದ್ದರೆ, ಉಳಿದ ಭಾಗವನ್ನು ಬೇರೆಯವರಿಗೆ ನೀಡಲಾಗುವುದು.

ಕೇಂದ್ರ ಸರಕಾರಕ್ಕೇ ಮೊದಲ ಹಕ್ಕು
ಯಾವುದೇ ಕಂಪೆನಿಗೆ ಗುತ್ತಿಗೆ ಆಧಾರದಲ್ಲಿ ಜಾಗ ಕೊಟ್ಟರೂ ತುರ್ತು ಪರಿಸ್ಥಿತಿಗಳಲ್ಲಿ ಈ ತೈಲದ ಮೇಲೆ ಕೇಂದ್ರ ಸರಕಾರಕ್ಕೇ ನೇರ ಹಕ್ಕು ಇರಲಿದೆ. ಸಾಮಾನ್ಯ ಪರಿಸ್ಥಿತಿಯಲ್ಲಿ ಸಂಗ್ರಹಾಗಾರದಲ್ಲಿ ಜಾಗವನ್ನು ಗುತ್ತಿಗೆ ಪಡೆದ ಕಂಪೆನಿಗಳು ಕಚ್ಚಾ ತೈಲವನ್ನು ಇತರ ಬಳಕೆದಾರರಿಗೆ ಮಾರಾಟ ಮಾಡಬಹುದು.