ಹೆಚ್ಚಾಗುತ್ತಿದೆ ಲೈವ್‌ ಟ್ರೆಂಡ್‌

Team Udayavani, Jan 20, 2021, 4:12 PM IST

ಒಂದು ಸಮಯವಿತ್ತು, ಸಿನಿಮಾ ಮಂದಿ ತಮ್ಮ ಏನೇ ಅಪ್‌ ಡೇಟ್ಸ್‌ ಇದ್ದರೂ ನೇರವಾಗಿ ಮಾಧ್ಯಮದ ಮುಂದೆ ಬಂದು ಹಂಚಿಕೊಳ್ಳುತ್ತಿದ್ದರು. ಮುಖಾಮುಖೀ ಮಾತುಕತೆ ಮೂಲಕ ಹೆಚ್ಚೆಚ್ಚು ಆತ್ಮೀಯರಾಗುತ್ತಿದ್ದರು. ಆದರೆ, ಈಗ ಹೊಸ ಟ್ರೆಂಡ್‌ ಒಂದು ಶುರುವಾಗಿದೆ. ಅದು ಸೋಶಿಯಲ್‌ ಮೀಡಿಯಾ ಲೈವ್‌.

ಬಹುತೇಕ ಸಿನಿಮಾದ ನಟ-ನಟಿಯರು ಸೋಶಿಯಲ್‌ ಮೀಡಿಯಾದಲ್ಲಿ ಲೈವ್‌ ಬಂದು ತಮ್ಮ ಅಭಿಮಾನಿಗಳಿಗೆ ದರ್ಶನ ನೀಡುತ್ತಿದ್ದಾರೆ. ಜೊತೆಗೆ ತಮ್ಮ ಸಿನಿಮಾ ಅಪ್‌ಡೇಟ್ಸ್‌ ಗಳನ್ನು ಕೂಡಾ ಲೈವ್‌ ಮೂಲಕ ಹೇಳುವ ಅಭ್ಯಾಸ
ಬೆಳೆಸಿಕೊಳ್ಳುತ್ತಿದ್ದಾರೆ. ಅದರಲ್ಲೂ ಕೊರೊನಾ ನಂತರ ಲೈವ್‌ ಅಪ್‌ಡೇಟ್‌ ಮೂಲಕ ಅಭಿಮಾನಿಗಳಿಗೆ ದರ್ಶನ ನೀಡುವ ನಟರ ಸಂಖ್ಯೆ ಹೆಚ್ಚಾಗುತ್ತಿದೆ. ಮುಖ್ಯವಾಗಿ ಇತ್ತೀಚೆಗೆ ನಟ ದರ್ಶನ್‌, ಯಶ್‌, ಉಪೇಂದ್ರ, ದುನಿಯಾ ವಿಜಯ್‌, ರಕ್ಷಿತ್‌ ಶೆಟ್ಟಿ ಹಾಗೂ ಧ್ರುವ ಸರ್ಜಾ ಸೋಶಿಯಲ್‌ ಮೀಡಿಯಾ ಮೂಲಕ ಲೈವ್‌ ಬಂದು ತಮ್ಮ ಸಿನಿಮಾ ಕುರಿತು ಮಾತನಾಡಿದರು. ಈಗ ಪ್ರಜ್ವಲ್‌ ದೇವರಾಜ್‌ ಅಂಡ್‌ ಟೀಂ ಸರದಿ.

ಹೌದು, ಪ್ರಜ್ವಲ್‌ ದೇವರಾಜ್‌ ಅಭಿನಯದ “ಇನ್ಸ್‌ಪೆಕ್ಟರ್‌ ವಿಕ್ರಂ’ ಚಿತ್ರತಂಡ ತನ್ನ ಬಿಡುಗಡೆ ಕುರಿತಾದ ಅಪ್‌ಡೇಟ್‌ ನೀಡಲು ಇಂದು ಸೋಶಿಯಲ್‌ ಮೀಡಿಯಾದಲ್ಲಿ ಲೈವ್‌ ಬರುತ್ತಿದೆ. ಎಲ್ಲಾ ಓಕೆ, ಈ ಲೈವ್‌ ಟ್ರೆಂಡ್‌ ಎಷ್ಟು ಪ್ಲಸ್‌ ಎಂದು ಕೇಳಬಹುದು. ಮುಖ್ಯವಾಗಿ ಇಲ್ಲಿ ಅಭಿಮಾನಿಗಳಿಗೆ ನೇರ ದರ್ಶನಕ್ಕೆ ಅವಕಾಶವಿರುವ ಜೊತೆಗೆ ಅಭಿಮಾನಿಗಳಿಗೆ ಪ್ರಶ್ನೋತ್ತರಕ್ಕೂ ಅವಕಾಶವಿರುತ್ತದೆ. ಇದು ಅಭಿಮಾನಿಗಳಿಗೂ ಖುಷಿ ಕೊಡುತ್ತದೆ. ಆ ಕಾರಣದಿಂದಲೇ ನಟರು ಹೆಚ್ಚೆಚ್ಚು ಲೈವ್‌ ಮೊರೆ ಹೋಗುತ್ತಾರೆ. ಲೈವ್‌ ಬರೋದನ್ನು ಮೊದಲೇ ಅನೌನ್ಸ್‌ ಮಾಡುವ ಮೂಲಕ ಅಭಿಮಾನಿಗಳ ಕಾತರಕ್ಕೆ ಕಾರಣವಾಗುತ್ತಿದ್ದಾರೆ.

ಅಂದಹಾಗೆ, ಸೋಶಿಯಲ್‌ ಮೀಡಿಯಾದಲ್ಲಿ ಜೈಕಾರ ಹಾಕುವ ಮಂದಿಯೆಲ್ಲಾ ಸಿನಿಮಾಕ್ಕೆ ಬರುತ್ತಾರೆ ಎಂದು ಹೇಳುವಂತಿಲ್ಲ. ನಿಜವಾದ ಸಿನಿಮಾ ಪ್ರೇಮಿಗಳಷ್ಟೇ ಸಿನಿಮಾಗಳಿಗೆ ಬೆನ್ನೆಲುಬಾಗಿರುತ್ತಾರೆ ಎಂಬುದನ್ನು ಮರೆಯುವಂತಿಲ್ಲ.