ಮಾತು ಮುಗಿಸಿದ “ಲವ್‌ ಮಿ ಆರ್‌ ಹೇಟ್‌ ಮಿ”

Team Udayavani, Jun 16, 2023, 5:16 PM IST

ನಟ ಡಾರ್ಲಿಂಗ್‌ ಕೃಷ್ಣ ಮತ್ತು ರಚಿತಾ ರಾಮ್‌ ಜೋಡಿಯಾಗಿ ಅಭಿನಯಿಸುತ್ತಿರುವ “ಲವ್‌ ಮೀ ಆರ್‌ ಹೇಟ್‌ ಮೀ’ ಸಿನಿಮಾದ ಚಿತ್ರೀಕರಣ ಅಂತಿಮ ಘಟಕ್ಕೆ ತಲುಪಿದೆ. ಸದ್ಯ ಸಿನಿಮಾದ ಮಾತಿನ ಭಾಗದ ಚಿತ್ರೀಕರಣ ಪೂರ್ಣಗೊಳಿಸಿರುವ ಚಿತ್ರತಂಡ, ಇದೀಗ ಸಿನಿಮಾದ ಬಿಡುಗಡೆಯ ದಿನಾಂಕವನ್ನು ಘೋಷಣೆ ಮಾಡಿದೆ.

ಇತ್ತೀಚೆಗೆ ನಡೆದ ನಟ ಡಾರ್ಲಿಂಗ್‌ ಕೃಷ್ಣ ಅವರ ಹುಟ್ಟುಹಬ್ಬ ಸಂದರ್ಭದಲ್ಲಿ “ಲವ್‌ ಮೀ ಆರ್‌ ಹೇಟ್‌ ಮೀ’ ಸಿನಿಮಾದ ಬಿಡುಗಡೆಯ ದಿನಾಂಕವನ್ನು ಪ್ರಕಟಿಸಿರುವ ಚಿತ್ರತಂಡ, ಇದೇ ಸೆಪ್ಟೆಂಬರ್‌ 29ಕ್ಕೆ ಸಿನಿಮಾವನ್ನು ರಿಲೀಸ್‌ ಮಾಡುವುದಾಗಿ ತಿಳಿಸಿದೆ.

“ದೀಪಕ್‌ ಗಂಗಾಧರ್‌ ಮೂವೀಸ್‌’ ಬ್ಯಾನರಿನಲ್ಲಿ ದೀಪಕ್‌ ಗಂಗಾಧರ್‌, ಸುನೀಲ್‌ ಬಿ. ಎನ್‌, ಮದನ್‌ ಗಂಗಾಧರ್‌, ಚಂದನ್‌ ಜೆ. ಹಾಗೂ ನಾಗರಾಜ್‌ ಗೌಡ ಜಂಟಿಯಾಗಿ ನಿರ್ಮಾಣ ಮಾಡುತ್ತಿರುವ “ಲವ್‌ ಮೀ ಆರ್‌ ಹೇಟ್‌ ಮೀ’ ಸಿನಿಮಾಕ್ಕೆ ದೀಪಕ್‌ ಗಂಗಾಧರ್‌ ಕಥೆ, ಚಿತ್ರಕಥೆ ಬರೆದು ಮೊದಲ ಬಾರಿಗೆ ನಿರ್ದೇಶನ ಮಾಡುತ್ತಿದ್ದಾರೆ.

ಅಂದಹಾಗೆ, ಸಿನಿಮಾದ ಹೆಸರೇ ಹೇಳುವಂತೆ, “ಲವ್‌ ಮೀ ಆರ್‌ ಹೇಟ್‌ ಮೀ’ ಔಟ್‌ ಆ್ಯಂಡ್‌ ಔಟ್‌ ಲವ್‌ ಸ್ಟೋರಿ ಸಿನಿಮಾವಾಗಿದ್ದು, ಈಗಾಗಲೇ ಸಿನಿಮಾದ ಮಾತಿನ ಭಾಗದ ಚಿತ್ರೀಕರಣ ಮುಕ್ತಾಯವಾಗಿದ್ದು, ಸಿನಿಮಾದ ಹಾಡುಗಳ ಚಿತ್ರೀಕರಣ ಮಾತ್ರ ಬಾಕಿಯಿದೆ. ಸಿನಿಮಾದ ಐದು ಹಾಡುಗಳಿಗೆ ವಿ. ಶ್ರೀಧರ್‌ ಸಂಭ್ರಮ್‌ – ನಕುಲ್‌ ಅಭಯಂಕರ್‌ ಸಂಗೀತ ಸಂಯೋಜಿಸಿದ್ದಾರೆ. ಚಿತ್ರಕ್ಕೆ ಸಂತೋಷ್‌ ರೈ ಪಾತಾಜೆ ಛಾಯಾಗ್ರಹಣ, ಕೆ. ಎಂ. ಪ್ರಕಾಶ್‌ ಸಂಕಲನವಿದೆ. ರವಿವರ್ಮ ಸಾಹಸ ನಿರ್ದೇಶನ, ಈಶ್ವರಿ ಕುಮಾರ್‌ ಕಲಾ ನಿರ್ದೇಶನ, ಮುರಳಿ ಹಾಗೂ ಮೋಹನ್‌ ಅವರ ನೃತ್ಯ ನಿರ್ದೇಶನವಿರುವ ಈ ಚಿತ್ರಕ್ಕೆ ಯೋಗಾನಂದ್‌ ಮುದ್ದಾನ್‌, ರಘು ನಡವಳ್ಳಿ ಹಾಗೂ ರಘು ಸಂಭಾಷಣೆ ಬರೆದಿದ್ದಾರೆ.

“ಲವ್‌ ಮೀ ಆರ್‌ ಹೇಟ್‌ ಮೀ’ ಸಿನಿಮಾದಲ್ಲಿ ಡಾರ್ಲಿಂಗ್‌ ಕೃಷ್ಣ, ರಚಿತಾ ರಾಮ್‌ ಅವರೊಂದಿಗೆ ರೂಪೇಶ್‌ ಶೆಟ್ಟಿ, ನಂದಿನಿ, ರಾಕೇಶ್‌ ಪೂಜಾರಿ, ದೀಪಿಕಾ, ಪ್ರವೀಣ್‌, ಸುಂದರ್‌ ವೀಣಾ, ರಮೇಶ್‌ ಭಟ್‌ ಮುಂತಾದವರು ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.