LS polls: ಚುನಾವಣೆಯಲ್ಲಿ ಷಡ್ಯಂತ್ರಕ್ಕೆ ಬಲಿಯಾದೆ; ನಿಖಿಲ್‌ ಕಣ್ಣೀರು

Team Udayavani, Apr 4, 2024, 9:56 PM IST

ರಾಮನಗರ: ಬಿಜೆಪಿ-ಜೆಡಿಎಸ್‌ ಮೈತ್ರಿ ಅಭ್ಯರ್ಥಿ ಡಾ| ಸಿ.ಎನ್‌.ಮಂಜುನಾಥ್‌  ನಾಮ ಪತ್ರ ಸಲ್ಲಿಕೆ ಬಳಿಕ ನಡೆದ ಬೃಹತ್‌ ಸಮಾವೇಶದಲ್ಲಿ ಜೆಡಿಎಸ್‌ ಯುವ ಘಟಕದ ರಾಜ್ಯಾಧ್ಯಕ್ಷ ನಿಖಿಲ್‌ ಕುಮಾರಸ್ವಾಮಿ ಕಣ್ಣೀರಿಟ್ಟ ಪ್ರಸಂಗ ನಡೆಯಿತು.

ಸಮಾವೇಶದಲ್ಲಿ ಮಾತನಾಡುವ ವೇಳೆ, ಕಳೆದ ಚುನಾವಣೆಯಲ್ಲಿ ನಾನು ಷಡ್ಯಂತ್ರಕ್ಕೆ ಬಲಿಯಾದೆ. ರಾತೋರಾತ್ರಿ 5 ಸಾವಿರ ರೂ. ಕೂಪನ್‌ ಹಂಚಿ ಜನರಿಗೆ ಆಸೆ ಹುಟ್ಟಿಸಿ ಗೆಲುವು ಸಾಧಿಸಿದರು. ಆದರೂ ರಾಮನಗರದ ಪ್ರಜ್ಞಾವಂತ ಮತದಾರರು ನನಗೆ 76 ಸಾವಿರ ಮತಗಳನ್ನು ನೀಡಿದರು ಎಂದು ಕಣ್ಣೀರಿಟ್ಟರು.

ಡಾ| ಸಿ.ಎನ್‌.ಮಂಜುನಾಥ್‌ ಅವರನ್ನು  ರಾಜಕೀಯ ಹುಡುಕಿಕೊಂಡು ಬಂದಿದೆ. ನನಗಾದ ಮೋಸ ಅವರಿಗೆ ಆಗುವುದು ಬೇಡ. ಈ ಕ್ಷೇತ್ರದಲ್ಲಿ ಕೆಲವರು ಕುಕ್ಕರ್‌, ಸೀರೆ ಹಂಚುವ ಮೂಲಕ ಮತದಾರರ ದಾರಿ ತಪ್ಪಿಸುತ್ತಿದ್ದಾರೆ. ಹೀಗಾಗಿ ನಮ್ಮ ಕಾರ್ಯಕರ್ತರು ಚುನಾವಣ ಆಯೋಗದಂತೆ ಕೆಲಸ ಮಾಡಬೇಕಿದೆ ಎಂದರು.